ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސްގެ މަގާމުން މުހައްމަދު ރަނޭޝް (ރަނޭ) އިސްތިއުފާދީފި އެވެ.
ވީއޭއެމްގެ ރައީސްގެ މަގާމަށް 2021 ވަނަ އަހަރުގެ އޭޕްރީލް މަހުގެ ތެރޭގައި އިންތިހާބުވެވަޑައިގެންނެވި، ރަނޭ، މަގާމުން އިސްތިއުފާދޭން ނިންމީ، މި ވަގުތުު ވަޒީފާ އާއި ދިރިއުޅުމުގެ ކަންތައްތައް، ގައުމުން ބޭރަށް ބަދަލުކުރަން ޖެހުމުންނެވެ.
ގައުމީ އެއާލައިން، މޯލްޑިވިއަންގެ ސީނިއާ ކެޕްޓަނެއްގެ ގޮތުގައި މަސައްކަތް ކުރެއްވި، ރަނޭ، މިހާރު ވަނީ ވަޒީފާގެ ފުރުސަތެއް ލިބުމުން، ޔޫއޭއީ އަށް ދިރިއުޅުން ބަދަލުކޮށްފަ އެވެ. އިސްތިއުފާ ދިނުމުގެ މައިގަނޑު ސަބަބަކީ ވެސް މި އެވެ.
ރަނޭގެ ރައީސް ކަމުގެ ދައުރުގައި ބާކީ އަހަރަކަށް ވުރެ ގިނަ ދުވަސް އޮއްވައި، މަގާމުން އިސްތިއުފާދޭން ނިންމިކަން ވަނީ މިއަދު ސިޓީ އަކުން އަންގައިފަ އެވެ. ސިޓީގައި ހިމަނާފައިވަނީ، މާޗް 1 ވަނަ ދުވަހުން ފެށިގެން މަގާމުގައި އިތުރަށް ކުރިއަށްނުދާން ނިންމާފައިވާ ކަމަށެވެ.
އިސްތިއުފާ ދޭން ނިންމިކަން ކަަށަވަރުކޮށްދެއްވައި، ރަނޭ، މިއަދު، "އަދަދު" އަށް ވިދާޅުވީ، ކޮވިޑް-19ގެ ސަބަބުން އައި ހުއްޓުމާއި އެހެނިހެން ކަންކަމުގައި ދިމާވި ދަތިތަކަށް ބަލާއިރު، މަގާމުގެ ޒިންމާ އަދާކުރަން ރަނގަޅަށް ލިބުނީ، ދޮޅު އަހަރެއްހާ ދުވަސް ކަމަށެވެ.
ދުނިޔޭގެ ވޮލީބޯޅަ ފެޑެރޭޝަން (އެފްއައިވީބީ)ގެ ކޮންގްރެސްގައި ރަނޭ ވާހަކަ ދައްކަވަނީ: ރަނޭ އަކީ މި ކޮންގްރެސްގައި ވާހަކަ ދެއްކެވި ރާއްޖޭގެ ހަމައެކަނި ފަރާތް
"ވަރަށް ގިނަ ކަންތައްތަކެއް ހަގީގަތުގައި ކޮށްދެވުނު ކަމަށް ދެކެވެނީ، އޭގެ ތެރޭގައި ބައިނަލްއަގުވާމީ ގޮތުން ރާއްޖޭގެ ވޮލީ އަށް ފުރުސަތު ހޯދައިދިނުމާއި ރާއްޖޭގެ ވޮލީ އަށް ރަން މެޑަލެއް ހޯދައިދިނުމުގެ އިތުރުން ދެން، ސަރުކާރާ ގުޅިގެން ތަރައްގީގެ ގިނަ މަސައްކަތައް،" ރަނޭ ވިދާޅުވި އެވެ.
"އެކަމަކު، ފަސް އެނބުރި ބަލާލާއިރު، ނުކުރެވި ދިގުލައި ދިޔަ އެއް ކަމަކީ، ގުޑް ގަަވަރްނަސްގެ ކަންކަމަށް އަހައްމިއްޔަތުކަން ދީ އެސޯސިއޭޝަން ހިންގުމުގައި އެ ކުރަން ޖެހޭ ބައެއް ކަންކަން. އެކަން ނުކުރެވި ދިއުމުން، އެހެން ކަންކަން ރަނގަޅަށް ގެންދަން އުނދަގޫވި، އިރާދަކުރެއްވިއްޔާ، މަގާމުން އިސްތިއުފާ މި ދެނީ، އެކަން ވެސް ނިންމާލާފައި، ސްޕޯޓްސް ކޮމިޝަނަރުގެ ރުހުން ލިބޭ ގޮތަށް އަސާސީ ގަވާއިދު ވެސް ފާސްކޮށްފައި،"
ރަނޭ، ވިދާޅުވީ، އޭނާ މަގާމުގައި ހުއްޓަސް އަދި ނެތް ކަމުގައި ވިޔަސް، ދެން އަންނަ ފަރާތަކަށް ވޮލީ ހިންގުމުގައި ދަތިނުވާނެ ގޮތަށް މިހާރު ކަންކަން މަގުފަހިވެފައި ހުންނާނެ ކަމަށެވެ.
ވީއޭއެމްގެ ކުރީގެ ދައުރުގެ ސީނިއާ ނައިބު ރައީސްގެ މަގާމުގައި ހުންނެވި ރަނޭ، ވޮލީ ރައީސް ކަމަށް އިންތިހާބުވުމަށް ފަހު، ވީ މުއްދަތުގެ ތެރޭގައި ގިނަ ކަންތައްތަކެއް ކޮށްފައިވެ އެވެ.
އެ ގޮތުން ބަލާއިރު، ބީޗްވޮލީބޯޅަ އަށް ހާއްސަ އަހައްމިއްޔަތުކަމެއް ދީގެން ކުރި މަސައްކަތުން، ބީޗްވޮލީން ވަނީ ސަރަހައްދީ މުބާރާތަކުން ރަން މެޑަލެއް ހޯދައި، ތާރީހީ ކާމިޔާބެއް ހޯދައިފަ އެވެ.
ސަރުކާރާ ގުޅިގެން ކުރި މަސައްކަތުން ވަނީ ރާއްޖޭގައި ގައުމީ އަންހެން އަދި ފިރިހެން ޓީމަށް ބައިނަލްއަގުވާމީ މެޗުތަކާއި މުބާރާތްތައް ކުޅުމުގެ ފުރުސަތު ހޯދައިދީފަ އެވެ. އޭގެތެރެއިން އެއް މުބާރާތުގައި އަންހެން ވޮލީބޯޅަ ޓީމަށް ވަނީ ރިހި މެޑަލެއް ލިބިފަ އެވެ. އަދި ރާއްޖޭގެ އެކި ކަންކޮޅުތަކުގައި ވޮލީ ކޯޓުތައް ތަރައްގީކޮށްފައިވެ އެވެ.
މީގެ އިތުރުން، 2022 ވަނަ އަހަރު ރާއްޖޭގެ ވޮލީބޯޅަ ސީޒަން ހަރުފަތެއް މައްޗަށް ޖައްސައި، ބޭރުގެ ގިނަ ކުޅުންތެރިން ގެނެސްގެން ކުޅެ، ވޮލީގެ ފޯރި ގަދަކޮށްލެވުނު ކަމަށާއި ރިސޯޓް ވޮލީ މުބާރާތާއި ކޮމްޕެނީ/އޮފީސް ވޮލީ މުބާރާތްތަކުގެ އިތުރުން، އިންޓަ ސްކޫލް ވޮލީ އަށް އަހައްމިއްޔަތުކަން ދީގެން އަލުން އެ މުބާރާތްތައް ފެށުމަކީ ވެސް ކުރެވުނު މުހިންމު ކަންތައްތަކެއް ކަމަށް ރަނޭ ފާހަގަކުރައްވައިފައިވެ އެވެ.
އަދި މުޅި ރާއްޖެ އަށް ހުޅުވާލި، އަތޮޅު މުބާރާތްތައް އަލުން ފެށި ނަމަވެސް، އެ ކުރިއަށްނުދިއުމަކީ، ހިތާމަކުރާ އެއް ކަންތައް ކަމަށް ވެސް ވަނީ ވިދާޅުވެފަ އެވެ.
ރަނޭ ވިދާޅުވީ، ވޮލީ އަށް ކާމިޔާބެއް ލިބެން އޮތީ މީގެ ތިބި އެންމެން އެކުވެގެން އެއް މާހައުލެއްގައި މަސައްކަތް ކޮށްގެން ކަމަށެވެ.
"ގަބޫލުކުރަނީ އަދިވެސް ރާއްޖޭގެ ވޮލީ އަށް އިތުރު ހަރުފަތެއް މައްޗަށް ދެވޭނެއޭ. އަމިއްލަ ކަންކަން އެއްފަރާތްކޮށް، ޕްލޭނެއްގެ ތެރެއިން މަސައްކަތްކޮށްގެން، އެންމެންގެ ކޮންޓްރިބިއުޝަން ބޮޑުކޮށްގެން މިކަން ކުރެވިދާނެ،" ރަނޭ ވިދާޅުވި އެވެ.
ޒަމާނުއްސުރެ ވޮލީ އެސޯސިއޭޝަންގެ އަސާސީ ގަވާއިދަށް ހެޔޮ ބަދަލެއް އައިސްފައި ނެތުމުގެ ކަންތައްތަކަށް ހައްލެއް ހޯދައިދެވުމަކީ ރަނޭ އަށް ބޮޑު ހިތްހަމަ ޖެހުމެކެވެ. އެ ގޮތުން، ދާދި ފަހުން، ވޮލީބޯލް އެސޯސިއޭޝަންގެ އެކްސްޓްރާ އޯޑިނަރީ ކޮންގްރެސް އެއް ބާއްވައި، ކްލަބްތަކުގެ ރުހުމާ އެކު، އަސާސީ ގަވާއިދެއް ފާސްކޮށް، ކޮމިޝަނާ އޮފް ސްޕޯޓްސްގެ ރުހުން ވެސް އެ އަށް ހޯދައިދެވުމަކީ، ރަނޭ ދެކިލައްވާ ގޮތުގައި، ދެން އަންނަ ވޮލީގެ ރައީސަކަށް ވެސް ކުރިއަށްދާން ލިބޭ އެންމެ ބޮޑު ފަސޭހަ އެވެ.
"އަޅުގަނޑު ދެކެނީ، ވަރަށް ރަނގަޅަށް ކުރިއަށްދެވޭ ގޮތަށް ވޮލީ މިހާރު އެ އޮތީ، އެތައް އަހަރެއް ވަންދެން ނުވެ އޮތް ކަންކަން ވެސް ފުރިހަމަ ކޮށްދީފައި އެއް ކައިރިއަށް މި ޖެހިލަނީ،" ރަނޭ ވިދާޅުވި އެވެ.
ގައުމީ ޓީމުގެ ކުރީގެ ކުޅުންތެރިޔާ، ރަނޭގެ ދައުރުގައި ރާއްޖޭގެ ވޮލީބޯޅަ އަށް ފުރުސަތު އިތުރުކުރީ، ބައިނަލްއަގުވާމީ ފެޑެރޭޝަންތަކާ ގުޅިގެންނެވެ. އެ ގޮތުން، އެފްއައިވީބީއާ ގުޅިގެން، ރާއްޖޭގެ ވޮލީ ކުރިއަރުވަން ރަނގަޅު ބިދޭސީ ކޯޗުން ގެނަ އެވެ. އޭގެ ތެރޭގައި ބީޗްވޮލީ އަށް ހާއްސަކޮށް ކޯޗު، ވިނީޝިއުސް އާއި އިންޑޯ ވޮލީ ޓީމަށް ގެނައި ކޯޗު ސާޖިއޯ ހިމެނެ އެވެ. މި ދެ ކޯޗުންނާ އެކު ކުޅުންތެރިންނަށް ކުރިއެރުން އައި ކަމަށް ރަނޭ ވަނީ ފާހަގަކުރައްވައިފަ އެވެ. އަދި އަންހެން ވޮލީ ޓީމަށް ގެނައި ތައިލެންޑްގެ ކޯޗު، ވިޗީޕޮން ފޯންޗާޓްޔިންޗީޕްގެ މަސައްކަތުން ވެސް ޒުވާން އަންހެން ކުޅުންތެރިންނާ އެކު، ރަނގަޅު ސްކޮޑެއް އެކުލަވާލެވުނު ކަމަށް ރަނޭ ވިދާޅުވި އެވެ.
