ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ފުރަތަމަ ޑިވިޝަންގެ ކްލަބްތަކަށް ދޭ ފައިސާގެ މައުލޫމާތު ސްޕޯޓްސް ކޮމިޝަނަރަށް ފޮނުވުމަށް އެދިއްޖެ އެވެ.
ސްޕޯޓްސް ކޮމިޝަނަރުގެ އޮފީހުގެ، ޑިރެކްޓާ ޖެނެރަލް، އަލީ ޝަމީމް ސޮއިކޮށް، ފުރަތަމަ ޑިވިޝަން ކްލަބްތަކަށް މިދިޔަ މަހު 30 ވަނަ ދުވަހު (އަންގާރަ ދުވަހު) ފޮނުވި ސިޓީގައި ބުނެފައިވަނީ މިދިޔަ ހަތަރު އަހަރު (2020-2024 އަށް) ފީފާ ނުވަތަ އޭއެފްސީން ފަރާތުން އެފްއޭއެމުން މެދުވެރިވެގެން ދިން ފައިސާ ހަރަދުކޮށްފައިވާ ގޮތުގެ ތަފުސީލު އަންނަ އާދިއްތަ ދުވަހުގެ ކުރިން، ސްޕޯޓްސް ކޮމިޝަނަރު އޮފީހަށް ފޮނުވައިދިނުމަށެވެ.
އެ ސިޓީގައި ދެން ބުނެފައިވަނީ، އެފްއޭއެމް އިން ދޭ އެ ފައިސާ ކްލަބްތަކުން ހަރަދުކުރާ ގޮތުގެ ތަފުސީލު ފީފާ ނޫނީ އޭއެފްސީގެ ޕޯޓަލް އަށް އަޕްލޯޑްކޮށް، އަދި އެ ތަފުސީލުތައް އެފްއޭއެމަށް ވެސް ކްލަބްތަކުން ހިއްސާ ކުރަމުންދާ ކަމުގެ މައުލޫމާތު ކޮމިޝަނަށް ލިބިފައިވާ ކަމަށެވެ.
މި ސިޓީއާ ގުޅޭ މައުލޫމާތު އޮޅުންފިލުވަން ފުރަތަމަ ޑިވިޝަނުގެ ބައެއް ކްލަބްތަކުން ވަނީ ކޮމިޝަނާ އޮފް ސްޕޯޓްސްގެ އޮފީހަށް ވެސް ގޮސްފަ އެވެ. އެ ކްލަބްތަކަކީ، ޔުނައިޓެޑް ވިކްޓަރީ (ޔޫވީ)، ބުރު ސްޕޯޓްސް ކްލަބް، ކްލަބް އީގަލްސް އަދި ކްލަބް ގްރީން ސްޓްރީޓްސް އެވެ.
މި ކްލަބްތަކުން އިއްޔެ މެންދުރު ފަހު، މެންހެޓަން ބިޒްނަސް ހޮޓެލްގައި ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ ކްލަބްތަކެއްގެ މާލީ ކަންކަމާ ގުޅޭ އެ ފަދަ މައުލޫމާތުތަކެއްގެ ތަފުސީލުތައް ފޮނުވަން ސްޕޯޓްސް ކޮމިޝަނާ އެންގުމުން ކަންބޮޑުވާ ކަމަށެެވެ.
އަދި މި ކަމަކީ، އެފްއޭއެމް އިންތިހާބަށް ސްޕޯޓްސް ކޮމިޝަނަރު، މުހައްމަދު ތޮލާލް، ނުފޫޒު ފޯރުވުމުގެ ގޮތުން ކުރާ ކަމެއްގެ ގޮތުގައި ބެލެވޭ ކަމަށް ވެސް އެ ކްލަބްތަކުން ތުހުމަތުކުރެ އެވެ.
މި ކްލަބްތަކަކީ އެފްއޭއެމް އިން ބާއްވަން އުޅުނު އިންތިހާބުގައި ވާދަކުރާ، އެއް ކެންޑިޑޭޓް ކަމަށްވާ މުފާވިޒް ހާޝިމް (މުފާ) އަށް ތާއީދުކުރާ ހަތަރު ކްލަބް އެވެ. މީގެ ކުރިން މުފާ ވެސް މީޑިއާ އަށް ދިން އިންޓަވިއުއެއްގައި ވަނީ ސްޕޯޓްސް ކޮމިޝަނަރުގެ ކަންކަން އިންސާފުވެރިކޮށް ކުރިއަށްގެންދިއުމަށް އެދޭ ކަމަށް ވިދާޅުވެފަ އެވެ.
ސްޕޯޓްސް ކޮމިޝަނަރުގެ އޮފީހުން ކްލަބްތަކަށް މި ސިޓީ ފޮނުވިއިރު، ދާދި ފަހުން، ކްލަބް ވެލެންސިއާގެ ބޯޑް އޮޅުވާލައިގެން ބަދަލުކޮށްދީފައިވާ ކަމަށް ބުނެ، އެ ކްލަބްގެ ވަކިކުރި ބޯޑް މެމްބަރުން ހިމެނޭ ގޮތަށް ވަނީ ތޮލާލް ދިރިއުޅޭ ގޭ ކައިރީ މުޒާހަރާކޮށްފަ އެވެ. އެ އެއްވުމުގައި އެ ފަރާތްތަކުން ވަނީ ތޮލާލްގެ އިސްތިއުފާ އަށް ވެސް ގޮވައިފަ އެވެ.
