ގަލޮޅު ރަސްމީ ފުޓްބޯޅަ ދަނޑުގެ ލައިޓްތަކަށް ދިމާވެފައިވާ މައްސަލަ ހައްލުކުރަން، ސިފައިންގެ ވެލްފެއާ ޕްރައިވެޓް ލިމިޓެޑް (ސިވެކް)އާ ހަވާލުކޮށްފި އެވެ.
މިކަމާ ގުޅޭ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު، އިބްރާހިމް އާމިރު އެވެ. އަދި ސިވެކްގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަޙުމަދު ޒުބެއިރު އެވެ.
އެއްބަސްވުމުގައިވާ ގޮތުން، މަސައްކަތް ފަށާތާ 30 ދުވަހުގެ ތެރޭގައި ދަނޑުގެ ލައިޓިން މަރާމާތުކޮށް ނިންމައި ހަވާލުކުރަން ޖެހޭނެ އެވެ. މި މަސައްކަތުގެ އަގަކީ 3،985،745.79 (ތިން މިލިއަން ނުވަ ލައްކަ އަށްޑިހަ ފަސްހާސް ހަތް ސަތޭކަ ސާޅީސް ފަސް ރުފިޔާ ހަތްދިހަ ނުވަ ލާރި) އެވެ.
މި އެއްބަސްވުމުގެ ތެރެއިން ކުރުމަށް ހަމަޖެހިފައިވާ ކަންތައްތަކުގެ ތެރޭގައި ލައިޓްތަކުގެ މިހާރުގެ ހާލަތު ބެލުމަށް ފަހު، ބަދަލުކުރަން ޖެހޭ ލައިޓްތައް ބަދަލުކުރުމާއި، މުޅި ލައިޓް ސިސްޓަމްގެ ވަޔަރިން ބަދަލުކުރުމުގެ އިތުރުން ލައިޓިން ސިސްޓަމްގެ އެހެނިހެން މަރާމާތުތައް ކަންކަން ހިމެނެ އެވެ.
ސިވެކް އާއި ސްޕޯޓްސް މިނިސްޓްރީން އެއްބަސްވުމުގައި ސޮއިކުރުމަށް ފަހު.--- ފޮޓޯ: ސްޕޯޓްސް މިނިސްޓްރީ
ވެތުވެދިޔަ ހަތަރެއް ނޫނީ ފަސް ވަރަކަށް އަހަރަށް ބަލާއިރު، ރާއްޖޭގެ ފުޓްބޯޅަ ސީޒަނެއްގެ ކޮންމެ ވެސް ހިސާބަކުން ގަލޮޅު ފުޓްބޯޅަ ދަނޑުގެ ލައިޓްތަކުގެ މައްސަލަ ޖެހެ އެވެ. މިދިޔަ އަހަރުގެ އޮގަސްޓް މަހުން ފެށިގެން ދަނޑުގެ ލައިޓިން މައްސަލަތަކެއް ޖެހި، އެންމެ ފަހުން ރޭގަނޑު މެޗެއް ނުކުޅެވޭ ހާލަތަށް ވަނީ ގޮސްފަ އެވެ.
މިދިޔަ މަހުގެ 26 ވަނަ ދުވަހުން ފެށިގެން ކުރިއަށްދާ އެފްއޭއެމް އެމްޕީއެލް ދެ ވަނަ ޑިވިޝަން ފުޓްބޯޅަ މުބާރާތުގެ ހުރިހާ މެޗެއް ހަވީރު ކުޅެން ނިންމި، ސަބަބަކީ، ރޭގަނޑު މެޗުތައް ކުޅެވޭ ވަރަށް ދަނޑުގެ ލައިޓްތަކުގެ އަލި ނެތުމެވެ. މެޗުތައް ފަށާފައި ލައިޓް ނިވިގެން ހުއްޓާލަން ޖެހިދާނެ ފަދަ ހާލަތެއް ކުރިމަތިވެދާނެތީ އެކަން ނުވާންް އެދޭތީ އެވެ. އެއީ، މި ފަހުން، އެމްޑަބްލިއުއެސްސީ ދިވެހި ޕްރިމިއާ ލީގުގައި، މާޒިޔާ ސްޕޯޓްސް އެންޑް ރެކްރިއޭޝަން އާއި ބުރު ސްޕޯޓްސް ކްލަބް ކުޅުނު މެޗުގައި، ލައިޓް ނިވިގެން އެ ފަދަ ހާލަތެއް ކުރިމަތިވެފައިވާތީ އެވެ.
ދެ ވަނަ ޑިވިޝަން ފުޓްބޯޅަ މުބާރާތް ފެށީ ތިން ފަހަރެއްގެ މަތިން ފަސް ކުރުމަށް ފަހު އެވެ. އެ މުބާރާތް ފެށުން ލަސްވާތީ، ދެ ވަނަ ޑިވިޝަނުގެ މެޖޯރިޓީ ކްލަބްތަކުން ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ)އާ އެކު ބޭއްވި ބައްދަލުވުމުގައި ވެސް ވަނީ ދަނޑުގެ ލައިޓިން މައްސަލައިގެ ކަންކަން ފާހަގަކޮށްފަ އެވެ.
ގަލޮޅު ދަނޑުގެ ލައިޓްތަކުގެ ހާލަތު ރޭގަނޑު މެޗުތައް ކުޅޭ ވަރަށް ނެތުމާ އެކު، އޭއެފްސީ ކަޕްގައި މި ސީޒަނުގައި، މާޒިޔާ އިން ކުޅުނު ހޯމް ތިން މެޗު ވެސް ފެށީ 3 ޖެހިއިރު އެވެ. އަދި ފީފާ ވޯލްޑް ކަޕް ކޮލިފައިންގައި ގައުމީ ފުޓްބޯޅަ ޓީމުން ބަންގްލަދޭޝާ ކުޅުނު މެޗު ވެސް ކުޅެން ޖެހުނީ ހަމަ އެ ވަގުތުގަ އެވެ. އެނގިފައިވާ ގޮތުގައި އެ މެޗުތައް ކުޅޭ ވަގުތަށް ބަދަލުގެންނަން ޖެހުނީ ވެސް ލައިޓްތަކުގެ މައްސަލަ ހައްލެއް ނުލިބި އޮތުމުން، އޭއެފްސީ އަށް އެކަން އަންގައިގެންނެވެ.
