ރޯދަ މަހުގެ ތެރޭގައި މިހާރު ބާއްވަން ނިންމާފައިވާ ރައްޔިތުންގެ މަޖިލީހުގެ އިންތިހާބު ރޯދައިގެ ފަހުން ބާއްވަން ވެސް އިލެކްޝަންސް ކޮމިޝަނުން އޮތީ ތައްޔާރަށް ކަމަށް އެ ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވެއްޖެ އެވެ.
ޕީއެސްއެމްއަށް ދެއްވި އިންޓަވިއުއެއްގައި ހަބީބު ވިދާޅުވީ މިހާރު މާޗް 17، ގައި ބާއްވަން ނިންމާފައިވާ އިންތިހާބު ރޯދައިގެ ފަހަށް ބަދަލުކޮށްފިއްޔާ ވޯޓުލާން ނުކުންނަ މީހުންގެ އަދަދު ގިނަވާނެ ކަމަށެވެ.
"އިލެކްޝަނުން އަމަލު ކުރާނީ ގާނޫނުގައި އޮންނަ ގޮތަކަށް، ގާނޫނަށް ބަދަލު ގެނެސްގެން ރޯދައިގެ ފަހުން އިންތިހާބު ބާއްވާނަމަ ރައްޔިތުންނަށް ވަރަށް ބޮޑެތި ފަސޭހަތައް ވާނެ، ރޯދަ މަހު ވޯޓު ލާން އުފުލަން ޖެހޭ ތަކުލީފު އޭރުން އުފުލާކަށް ނުޖެހޭނެ، އެހެންވީމަ ވޯޓުލާ މީހުންގެ ނިސްބަތް ވެސް އިތުރު ވާނެ ކަމަށް ވަރަށް ބޮޑަށް ލަފާ ކުރެވޭ،" ހަބީބް ވިދާޅުވި އެވެ.
ރޯދައިގެ ފަހުން އިންތިހާބު ބާއްވާ ނަމަ މިހާރު ނިންމާފައި ހުރި ބައެއް ކަންކަމަށް ބަދަލުތައް އަންނާނެ ކަމަށާއި އެގޮތުން، ވޯޓު ލުމަށް ޝަރުތު ހަމަވާ މީހުންގެ އަދަދު ވެސް އިތުރުވެ، އަލުން ރީ ރަޖިސްޓްރޭޝަނަށް ވެސް ހުޅުވާލަން ޖެހޭނެ ކަމަށް ހަބީބް ވިދާޅުވި އެވެ.
ރޯދަ މަހު މަޖިލިސް އިންތިހާބު ބޭއްވުން މަނާ ކުރަން އިންތިހާބުތަކާ ބެހޭ އާންމު ގާނޫނަށް މިހާރު ވަނީ އިސްލާހެއް ވެސް ހުށަހަޅައިފަ އެވެ. އެ އިސްލާހު ހުށަހެޅުއްވީ އިހަވަންދޫ ދާއިރާގެ އެމްޑީޕީ މެމްބަރު މެމްބަރު މުހައްމަދު ޝިފާއު އެވެ.
އިސްލާހުގައި އޮތީ އެއްވެސް އިންތިހާބެއް ރޯދަ މަހުގެ ދުވަހެއްގައި ނުބޭއްވޭނެ ކަމަށެވެ. އަދި އެއްވެސް އިންތިހާބެއް ރޯދަ މަހުގެ ދުވަހަކާ ދިމާވާ ނަމަ އެ އިންތިހާބެއް ބާއްވަން ޖެހޭނީ ރޯދަ މަސް ނިމޭތާ 10 ދުވަސް ފަހުން ކަމަށް ވެސް އިސްލާހުގައި ބުނެފައިވެ އެވެ.
