އުރުދުންގައި ހުންނަ އެމެރިކާގެ އަސްކަރީ މަރުކަޒަށް ދިން ޑްރޯން ހަމަލާއެއްގައި ސިފައިންގެ ތިން މީހަކު މަރާލައި، 25 މީހުން ޒަހަމްކޮށްލައިފި އެވެ.
މިއީ މިދިޔަ އަހަރުގެ އޮކްޓޯބަރު 7 ގައި ފެށި އިޒްރޭލް-ހަމާސް ހަނގުރާމައިގެ ފަހުން، އިޒްރޭލްގެ އެންމެ ބޮޑު ވާގިވެރިޔާ އެމެރިކާ ސިފައިންނަށް އަމާޒުކޮށް ދިން ހަމަލާއެއްގައި ބަޔަކު މަރުވި ފުރަތަމަ ފަހަރެ އެވެ.
މީގެ ކުރިން ވެސް އެ ސަރަހައްދުގެ ގައުމުތަކުގައި ގާއިމުވެ ތިބި އެމެރިކާގެ ސިފައިންނަށް އަމާޒުކޮށް ގިނަ ހަމަލާތަކެއް ދީފައިވެ އެވެ.
އުރުދުންގައި ހުންނަ މަރުކަޒަށް ހަމަލާ ދިނީ އިރާނާ ގުޅުން އޮތް ހަނގުރާމަވެރި ޖަމާއަތަކުން ކަމަށް އެމެރިކާއިން ތުހުމަތު ކުރެ އެވެ.
އެފަރާތްތައް ޒިންމާކުރުވާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެފައި ވާއިރު، އެމެރިކާއިން އިހުތިޔާރުކުރާ ގޮތެއްގައި ރައްދު ހަމަލާ ދޭނެ ކަމަށް ވިދާޅުވި އެވެ.
އެހެންވެ، ކުރިއަށް އޮތް ތަނުގައި މަޝްރަހު ގޯސްވެގެންދާނެ ކަމަށް ބެލެވެ އެވެ.
އެ ހަމަލާއަކީ އެމެރިކާއަށް ދިން މެސެޖެއް ކަމަށް ވެސް ހަމާސްގެ ތަރުޖަމާނު ސާމީ އަބޫ ޒުހްރީ ވިދާޅުވި އެވެ.
