އިޒްރޭލުން ފަލަސްތީނުގައި ހިންގަމުން ގެންދަނީ ގަތުލުއާންމެއް ކަމާއި އެއީ ހަނގުރާމައިގެ ޖަރީމާތަކެއް ކަމަށް ބުނެ ދެކުނު އެފްރިކާއިން އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް ހުށަހެޅި މައްސަލާގައި ނަސްލު ނައްތާލުމުގެ އަމާޒުގައި އިޒްރޭލުން ހިންގަމުންދާ ހުރިހާ އަމަލެއް ހުއްޓުމަށް ކުރި އަމުރާ ގުޅޭ ގޮތުން އދ. ގެ ސަލާމަތީ މަޖިލީހުގެ ބައްދަލުވުމެއް ބާއްވަން ނިންމައިފި އެވެ.
ބުދަ ދުވަހު ބާއްވާ މި ބައްދަލުވުމަށް ގޮވައިލި އަލްޖީރިއާއިން ބުނެފައިވަނީ އެ ބައްދަލުވުމަކީ އައިސީޖޭގެ ނިންމުން ތަންފީޒުކުރުމަށް އެޅޭ ބާރަކަށް ވެގެންދާނެ ކަމަށް ގަބޫލުކުރެވޭ ކަމަށެވެ.
ފަލަސްތީނު-އިޒްރޭލްގެ މައްސަލައިގައި ސަލާމަތީ މަޖިލީހުގައި ޒަމާނުއްސުރެ ވެސް ހިޔާލުތަފާތުވުން އޮވެ އެވެ. ނަމަވެސް މިހާރު ކުރިއަށްދާ ހަނގުރާމަ އޮކްޓޯބަރު 7 ގައި ފެށުނު ފަހުން ދުނިޔޭގެ ޕްރެޝަރާއެކު ސަލާމަތީ މަޖިލީހުން ދެ ގަރާރެއް ނިންމައިފައިވެ އެވެ. އޭގެ ތެރޭގައި ގާޒާއަށް އެހީގެ ގާފިލާތައް ވަނުމަށް ހުއްދަ ދިނުމުގެ ގަރާރު ހިމެނެ އެވެ.
އިޒްރޭލާ ދެކޮޅަށް ދެކުނު އެފްރިކާއިން ހުށަހެޅި 84 ސަފުހާގެ އެ މައްސަލައިގައި ބުނެފައި ވަނީ ގަތުލުއާއްމުތައް ހުއްޓުވުމުގެ ބައިނަލްއަގުވާމީ މުއާހަދާއާ ވެސް އިޒްރޭލުން ހިލާފުވެފައިވާ ކަމަށެވެ.
އެހެންވެ ދެކުނު އެފްރިކާއިން ބޭނުންވަނީ ހަނގުރާމަ މެދުކަނޑާލަން އައިސީޖޭއިން އެންގުމެވެ. ނަމަވެސް، ހަނގުރާމަ މެދުކަނޑާލަން އަމުރުކޮށްފައި ނުވެ އެވެ.
އިޒްރޭލަކީ އދ. ގެ އާންމު ގަރާރަކުން ވުޖޫދުކުރި ގައުމަކަށްވީ ނަމަވެސް އެ ޖަމިއްޔާގެ ބޮޑު އަގުލަބިއްޔަތުން ފާސްކުރާ ގަރާރުތަކަށް ވެސް އެ ގައުމުން އަމަލެއް ނުކުރެ އެވެ.
ދެކުނު އެފްރިކާއިން ހުށަހެޅި މައްސަލަ އަށް ގިނަ ގައުމުތަކުން ތާއިދުކޮށްފައި ވާއިރު، ތާއިދު ނުކުރާ ގައުމުތަކުގެ ތެރޭގައި އިޒްރޭލުގެ އެންމެ ބޮޑު ވާގިވެރިޔާ އެމެރިކާ އަދި އިނގިރޭސި ވިލާތް ހިމެނެ އެވެ. އެ މައްސަލަ އަށް ތާއިދުކުރާކަން ހާމަކޮށްފައިވާ ފަރާތްތަކުގެ ތެރޭގައި އިސްލާމީ 57 ގައުމު ހިމެނޭ އޯގަނައިޒޭޝަން އޮފް އިސްލާމިކް ކަންޓްރީސް (އޯއައިސީ) ހިމެނެ އެ އެވެ.
އޮކްޓޯބަރު 7، 2023 ގައި ފެށި ހަނގުރާމައިގައި މިހައިތަނަށް ފަލަސްތީނުގެ 26،000 އަށް ވުރެ ގިނަ މީހުން ޝަހީދުކޮށްލާފައިވެ އެވެ.
