ޕެރިސް (ޖެނުއަރީ 17) - ފްރާންސްގެ އިންޓީރިއާ މިނިސްޓަރު، ޖެރާލްޑް ޑާމަނިންގެ މައްޗަށް އަބުރުގެ ދައުވާ ކުރަން ފްރާންސްގެ ފޯވާޑް، ކަރިމް ބެންޒެމާ ހުށަހަޅައިފި އެވެ.
ފްރާންސްގެ ސަރުކާރުގެ އިސް މީހެއް ކަމަށްވާ ޖެރާލްޑް، ވަނީ މިދިޔަ އަހަރު، ބެންޒެމާ އަށް އެކްސް (ކުރިން ޓްވިޓާ) ގައި ކުރި ޕޯސްޓެއްގައި ފާޑުކިޔައިފަ އެވެ. އެ ގޮތުން، ފަލަސްތީނަށް އަރައި އިޒްރޭލުން ހިންގަމުން އަންނަ ލާއިންސާނީ އަމަލުތަކާ ދެކޮޅަށް، ގާޒާގެ ރައްޔިތުންނަށް ހަމްދަރުދީ ފާޅުކޮށް، ބެންޒެމާ، އެކްސްގައި ކުރި ޕޯސްޓަކާ ބެހޭގޮތުން، ޖެރާލްޑް ވަނީ ބެންޒެމާ އަކީ، މުސްލިމުންގެ ޖަމާތެއް ކަމަށްވާ "މުސްލިމް ބްރަދަހުޑް"އާ ގުޅުން އޮތް ފަރާތެއް ކަމަށް ވިދާޅުވެފަ އެވެ.
މި މައްސަލައިގައި މީގެ ކުރިން ބެންޒެމާ ރަސްމީކޮށް އެއްވެސް އެއްޗެއް ފާޅުކަން ބޮޑުކޮށް ހާމަކޮށްފައި ނުވި ނަމަވެސް އޭނާގެ ގާނޫނީ ޓީމުގެ ހާއްސަ ވަކީލް، ހިގޭސް ވިޖިއާ ވަނީ އިއްޔެ ފްރާންސްގެ ކޯޓަށް ޖެރާލްޑްގެ މައްސަލައެއް ހުށަހަޅައިފަ އެވެ.
ހުށަހަޅާފައިވާ މައްސަލައިގައި ބެންޒެމާގެ ގާނޫނީ ޓީމުން ބުނެފައިވަނީ، މިއީ ސަރުކާރުގެ މަގާމެއްގައި ހުރި ފަރާތަކުން ބެންޒެމާގެ ނަން ހަޑިކުރުމަށާއި މީހުންގެ މެދުގައި އޭނާގެ އަގުވައްޓާލަން ކުރި ކަމެއް ކަމަށެވެ. އެހެންވެ، މި މައްސަލަ ސީރިއަސް ކަމެއްގެ ގޮތުގައި ބަލަން އެދޭ ކަމަށެވެ.
ބެންޒެމާ ވަނީ އޭނާ އަކީ "މުސްލިމް ބްރަދަހުޑް"އާ އެއްވެސް ގޮތަކަށް ގުޅުމެއް އޮތް ފަރާތެއް ނޫން ކަމަށް ބުނެފަ އެވެ. އަދި އެ ފަދަ ނަމެއްގައި ޖަމާއަތަކުން ހިންގާ އެއްވެސް އަމަލެއްގައި އޭނާ ބައިވެރިވެފައިނުވާނެ ކަމަށެވެ.
މީގެ ކުރިން ވެސް އެކި ފަހަރު މަތިން، ޖެރާލްޑް ވަނީ ބެންޒެމާ އަށް ފާޑުކިޔައިފަ އެވެ. އެ ގޮތުން، ފްރާންސް ގައުމީ ޓީމުގެ މެޗުތަކުގައި ބެންޒެމާ ގައުމީ ސަލާމް ނުކިޔާކަމަށް ބުނެ، ވެސް ޖެރާލްޑް ވަނީ ބެންޒެމާ އަށް ބޭއަދަބީކޮށް ވާހަކަ ދައްކައިފަ އެވެ.
ފްރާންސް ގައުމީ ޓީމަށް 2022 ވަނަ އަހަރު ކުޅުން ހުއްޓާލި ބެންޒެމާ، އަށް މީގެ ކުރިން، ގައުމީ ޓީމާ ދުރުގައި ހަ އަހަރު ހުންނަން ޖެހުނީ ސިޔާސީ ފިއްތުންތަކާ ހެދި ކަމަށް މީޑިއާގައި ވާހަކަ ދެކެވުނެވެ.
އަލްޖީރިއާ ދަރިކޮޅަށް ނިސްބަތްވާ ބެންޒެމާ އެންމެ ފުރަތަމަ 2007 ވަނަ އަހަރު ފްރާންސަށް ކުޅެން ފެށިއިރު، އޭނާ އަކީ ޓީމުގެ މުހިންމު ތަރިއެކެވެ. އެކަމަކު ފަހުންކަންކަން ބަދަލުވެ، ގައުމީ ޓީމުން ފުރުސަތު ނުދޭން ފެށީ 2015 ވަނަ އަހަރު އެވެ. އެއީ، އޮރިޔާން ކާޑު ބޭނުންކޮށްގެން ބްލެކްމެއިލްކުރި މައްސަލައެއްގެ ތުހުމަތު އޭނާގެ މައްޗަށް ކުރި ހިސާބުންނެވެ.
އޮރިޔާންކާޑު ބޭނުންކޮށްގެން ފްރާންސްގެ މިޑްފީލްޑަރު މެތިއު ވަލްބުއޭނާ އަށް ބިރުދައްކަން މަސައްކަތްކުރި ކަމަށް ބެންޒެމާގެ މައްޗަށް ކޮށްފައިވާ ތުހުމަތުގެ މައްސަލައިގައި ފަސް ވަރަކަށް އަހަރު ފަހުން 2021 ވަނަ އަހަރު ޖެނުއަރީ މަހު ބަަލަން ފެށި އެވެ. އެކަމަކު، ފަހުން އެ ވާހަކަ މީޑިއާގައި ނުދައްކައި މައްސަލަ ބޭއްވީ އެވެ.
އަލުން، އަވަސް އަރުވާލައިގެން މައްސަލަައިގައި ސީދާ ގޮތެއް ނުނިންމައި، 2021 ވަނަ އަހަރު ބޭއްވި ޔޫރޯގައި ބެންޒެމާ އަށް ފްރާންސް ޓީމުން ފުރުސަތު ދިނެވެ. އެކަމަކު، އެ ފަހުން ވެސް މެދުކެނޑުމެއްނެތި ބެންޒެމާ އަށް ދިޔައީ ފްރާންސްގެ ސިޔާސީ ފަރާތްތަކުން ފާޑުކިޔަމުންނެވެ.
އެންމެ ފަހުން، ބެންޒެމާ ވަނީ 2022 ވަނަ އަހަރުގެ ވޯލްޑް ކަޕްގެ ކުރިން ގައުމީ ޓީމަށް ކުޅުން ހުއްޓާލަން ނިންމައިފަ އެެވެ. އެއީ އޭނާ އަށް އަނިޔާވެ، ވޯލްޑް ކަޕަށް ފިޓްނުވާނެ ކަމަށް ބުނެ، ކޯޗު ޑިޑިއޭ ޑެޝޯމްޕްސް މީޑިއާގައި އެކި ފަހަރު އެކި ގޮތަށް ވާހަކަ ދައްކާތީ އެވެ.
