ރިޔާދު، ސައުދީ އަރަބިއްޔާ (ޖެނުއަރީ 30) - ސައުދީ ޕްރޮފެޝަނަލް ލީގު (ޕްރޯ ލީގު)ގެ ކްލަބް، އަލް އިއްތިހާދަށް ކުޅެމުން އަންނަ ފްރާންސްގެ ފޯވާޑް، ކަރިމް ބެންޒެމާ، އަށް އަލް އިއްތިހާދުން ދިން އާ އެއްބަސްވުމާ މެދު ހިތްހަމަނުޖެހި، އެކަން ހައްލުނުވަނިސް އެ ޓީމުގެ މެޗުތަކުގައި ނުކުޅެން ނިންމާފައިވާ ކަމަށް ރިޕޯޓްތައް ބުނެފި އެވެ.
ސާދަ އަހަރަށް ފަހު، 2023 ވަނަ އަހަރު ރެއާލް މެޑްރިޑް ދޫކޮށް، ބެންޒެމާ، 38، އަލް އިއްތިހާދަށް ސޮއިކުރީ ތިން އަހަރުގެ ކޮންޓްރެކްޓެއްގަ އެވެ. އެ ގޮތުން، 2026 ވަނަ އަހަރުގެ ޖޫންގެ ނިޔަލަށް ބެންޒެމާގެ ކޮންޓްރެކްޓް އޮތްއިރު، އޭނާ އަންނަނީ މުސްތަގުބަލާ ގުޅޭގޮތުން ގޮތެއް ނިންމުމަށް ވިސްނަމުންނެވެ. ރިޓަޔާކުރަން އުޅޭ ވާހަކަ ދޮގުކޮށް ބެންޒެމާ މިދިޔަ މަހު އަލް އިއްތިހާދާ އެކު އާ އެއްބަސްވުމުގެ މަޝްވަރާތައް ފެށި އެވެ.
އެކަމަކު، ރިޕޯޓްތައް ބުނާގޮތުން، އަލް އިއްތިހާދުން ހުށަހެޅި އާ ކޮންޓްރެކްޓްގައި ބެންޒެމާގެ އިމޭޖް ރައިޓްސް އަށް ފައިދާއެއް ނުވާގޮތަށް، ކްލަބުން އޭނާ އިސްތިހާރު ކުރެވޭ ގޮތަށް އެއްބަސްވުމުގައި ހިމަނައި، މުސާރަ ވެސް އެކަށީގެންވާ ވަރަށް ބޮޑުނުވާތީވެ، ބެންޒެމާ ނިންމީ، ކަންކަން ކުރިއަށްދާނެ ގޮތުގެ ސާފު މަަންޒަރު ނުފެނި، މެޗުތަކަށް ސަމާލުކަން ދެވެން ނެތުމުން ކުޅެވެން ނެތް ކަމަށެވެ.
ކުރިން ލިޔޯނަށް ކުޅުނު ބެންޒެމާ ވަނީ އަލް އިއްތިހާދަށް 83 މެޗުން 54 ލަނޑު ޖަހައި، 17 ލަނޑު ޖަހަން ފުރުސަތު ތަނަވަސްކޮށްދީފަ އެެވެ.
