ރިޔާދު، ސައުދީ އަރަބިއްޔާ (ޑިސެމްބަރު 18) - ސައުދީ ޕްރޮފެޝަނަލް ލީގު (ޕްރޯ ލީގު)ގެ ކްލަބް އަލް އިއްތިހާދަށް ކުޅެމުން އަންނަ ފްރާންސްގެ ފޯވާޑް ކަރީމް ބެންޒެމާ އަންނަ އަހަރު ފުޓްބޯޅައިން ރިޓަޔާކުރުމުގެ ވިސްނުމެއް ގެންގުޅެމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ސާދަ އަހަރަށް ފަހު، ރެއާލް މެޑްރިޑް ދޫކޮށް، ބެންޒެމާ، އަލް އިއްތިހާދަށް ސޮއިކުރީ ތިން އަހަރުގެ ކޮންޓްރެކްޓެއްގަ އެވެ. އެ ގޮތުން، 2026 ވަނަ އަހަރުގެ ސައުދީ ޕްރޯ ލީގުގެ ސީޒަނުގެ ނިޔަލަށް ބެންޒެމާ، 36، ގެ ކޮންޓްރެކްޓް އޮތް ނަމަވެސް، އޭނާގެ ވިސްނުން ހުރީ އަންނަ ސީޒަނަށް ފަހު ފުޓްބޯޅައިން ރިޓަޔާވުމަށް ކަމަށް ރިޕޯޓްތައް ބުނެ އެވެ.
އަލްޖީރިއާ ދަރިކޮޅަށް ނިސްބަތްވާ، ބެންޒެމާ އަށް އަލް އިއްތިހާދުން ދިން ކޮންޓްރެކްޓްގެ ޖުމްލަ އަގަކީ މުސާރަ އާއި އެހެނިހެން ކަންކަން ހިމެނޭ ގޮތަށް 400 މިލިއަން ޑޮލަރު ކަމަށް ރިޕޯޓްތައް ބުނެ އެވެ. އެ ކޮންޓްރެކްޓްގެ ފަހު ޕޭމަންޓް ކަމަށްވާ 100 މިލިއަން ޑޮލަރު ދޭނީ، އެއްބަސްވުން ފުރިހަމަކޮށްފިނަމަ އެވެ. އެހެންކަމުން، އަންނަ ސީޒަނަށް ފަހު، އިއްތިހާދު ދޫކޮށްލަން ބެންޒެމާ ނިންމައިފިނަމަ، ފަހު ޕޭމަންޓް ނުލިބޭނެ އެވެ.
ރިޓަޔާކުރުމަށް ފަހު، ބެންޒެމާ ވަނީ ކުރީގެ ކްލަބް ރެއާލްގެ އެމްބަސަޑަރު ރޯލެއްގައި މަސައްކަތްކުރަން އެއްބަސްވެފަ އެވެ.
ރެއާލްގައި ހޭދަކުރި 14 އަހަރު ތެރޭ ބެންޒެމާ ވަނީ އެ ޓީމަށް ކުޅެދިން 648 މެޗުން 354 ގޯލު ޖަހައިފަ އެވެ. ބެންޒެމާ ވަނީ ރެއާލަށް ކުޅުނުއިރު ޖުމްލަ އެކު، 24 ތަށި އުފުލާލައިފަ އެވެ. އޭގެ ތެރޭގައި ފަސް ފަހަރު ޗެމްޕިއަންސް ލީގު ކާމިޔާބު ކުރުން ހިމެނެ އެވެ. އަދި އެ ޓީމުގައި ހުރެ، ފްރާންސް ފުޓްބޯލް އިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ހޯދި އެވެ.
ލިޔޯން ދޫކޮށް، 33 މިލިއަން ޑޮލަރުގެ ފީ އަކަށް، 2009 ވަނަ އަހަރު، ރެއާލަށް ބަދަލުވި ބެންޒެމާ، ވަނީ ލިޔޯނަށް ކުޅުނުއިރު، ހަތަރު ފަހަރު އެ ޓީމާ އެކު، ލީގު ޗެމްޕިއަންކަން ހޯދައިފަ އެވެ.
