އޭޝިއާ ވޮލީބޯލް ކޮންފަޑަރޭޝަން (އޭވީސީ)ގެ އެގްޒެކެޓިވް ޒޯނަލްގެ ނައިބު ރައީސަކަށް ރާއްޖޭގެ ވޮލީބޯލް އެސޯސިއޭޝަންގެ ކުރީގެ ރައީސް އަދި މިހާރު ސެންޓްރަލް ޒޯން ވޮލީބޯލް އެސޯސިއޭޝަން (ކާވާ) ގެ ރައީސްކަން ކުރައްވަމުން އަންނަ މުހައްމަދު ލަތީފް (ލަތީބެ) ހަމަޖައްސައިފި އެވެ.
އޭވީސީން މިއަދު އޮންލައިންކޮށް ބޭއްވި އެ އިދާރާގައި އާންމު ބައްދަލުވުމުގައި ލަތީބެ އޭވީސީގެ އެގްޒެކެޓިވް ޒޯނަލްގެ ނައިބު ރައީސަކަށް ހަމަޖެއްސުމާ އެކު, ލަތީބެެއަށް އޭވީސީގެ އެސްކޯގައި މަސައްކަތް ކުރުމުގެ ފުުރުސަތު ލިބިގެންދާނެ އެވެ. މިއީ ރާއްޖެގެ ފަރާތެއް އޭވީސީ އެގްޒެކެޓިވް ކޮމިޓީގައި ހުރުމުގެ ފުރުސަތު ލިބުނު ފުރަތަމަ ފަހަރެވެ.
ލަތީފް މި މަގާމަށް ހަމަޖެއްސީ ކުރިން މި މަގާމުގައި ހުރި ފަރާތުގެ މަގާމު ގެއްލުމާއެކުގަ އެވެ.
ލަތީފް، "އަދަދު" އަށް ވިދާޅުވީ, މިއީ ރާއްޖޭގެ ވޮލީ އަށް ލިބިގެންދިޔަ ކާމިޔާބީއެއް ކަމުގައި ދެކޭ ކަމަށެވެ. އަދި މި ކާމިޔާބީއާ އެކު މަސައްކަތް ކުރައްވާނީ ރާއްޖޭގެ ކުޅުންތެރިންނާ ވޮލީއަށް އިތުރު ފުރުސަތުތައް ހޯއްދަވައިދެއްވުމަށް ކަމަށް ލަތީފް ވިދާޅުވި އެވެ.
"މިއީ ޖުމްލަކޮށް ރާއްޖޭގެ ވޮލީ އަށް ލިބުނު ކާމިޔާބީއެއްގެ ގޮތުގައި އަޅުގަނޑު ދެކެނީ. ދެން މި މަގާމާއެކު އަޅުގަނޑުގެ މަސައްކަތަކަށް ވާނީ ރާއްޖޭގެ ކުޅުންތެރިންނާ ވޮލީއަށް އިތުރު ފުރުސަތުތައް ހޯދައި ދިނުން" ލަތީފް ވިދާޅުވި އެވެ.
ރާއްޖޭގެ ވޮލީ އެސޯސިއޭޝަންގެ ރައީސް ކަމަށް ލަތީފް އިންތިހާބުވީ 2016 ވަނަ އަހަރު އެވެ. ވިއޭއެމްގައި ލަތީފްގެ ލީޑަޝިޕްގެ ކަންކަން ދަނީ، ގަވާއިދުތަކާ އެއްގޮތަށް ނޫން ކަމަށް ބުނެ، މިދިޔަ ސަރުކާރުގެ ކޮމިޝަނާ އޮފް ސްޕޯޓްސް، ހީނާ އަހުމަދު ސަލީމް ވަނީ، ވީއޭއެމް ހިންގުން، ނޯމައިލިން ކޮމިޓީއެއްގެ ބެލުމުގެ ދަށަށް ގެންގޮސްފަ އެވެ.
އޭގެ ފަހުން، ވޮލީ އެސޯސިއޭޝަންގެ ހިންގުން ހުސްކަމެއްގެ ތެރެއަށް ދިޔައިރު، 2021 ވަނަ އަހަރު އިންތިހާބެއް ބާއްވައި، ރައީސް ކަމަށް އައީ، ލަތީފްގެ ހިންގާ ކޮމިޓީގައި ނައިބު ރައީސަކަށް މަސައްކަތް ކުރެއްވި މުހައްމަދު ރަނޭޝް (ރަނޭ) އެވެ.
ލަތީފް މަސައްކަތް ކުރައްވާނެ، އޭޝިއާ ވޮލީބޯލް ކޮންފަޑަރޭޝަން (އޭވީސީ) އަކީ އެފްއައިވީބީން އޭޝިއާ ސަރަހައްދަށް ކަނޑައަޅާފައިވާ މައި، ޖަމިއްޔާ އެވެ. މި ޖަމިއްޔާގެ މެމްބަރުންގެ ގޮތުގައި އޭޝިއާގެ 65 ގައުމު ހިމެނެ އެވެ.
