ގާޒާގައި ސިއްހީ ހިދުމަތް ދެމުން އައި އެންމެފަހު ތަންތަނުގެ ތެރޭގައި ހިމެނޭ އަލް އަގްސާ ހޮސްޕިޓަލުން ތެޔޮ ހުސްވެ އެއްކޮށް ހުއްޓުމަކާ ހަމައަށް ހިނގައްޖެ އެވެ.
އަލް އަގްސާ ހޮސްޕިޓަލުން ތެޔޮ ހުސްވެ މުޅި އެ ހޮސްޕިޓަލުން ކަރަންޓު އެއްކޮށް ކެނޑިފައިވާއިރު، އިޒްރޭލުން ގެންދަނީ އެ ހޮސްޕިޓަލް ވަށައިގެންވާ ސަރަހައްދަށް ކެނޑިނޭޅި ބޮން އަޅަމުން ކަމަށް މީޑިއާ ރިޕޯޓުތައް ބުނެ އެވެ.
އަލް އަގްސާ ހޮސްޕިޓަލުގެ ޑޮކްޓަރަކާ ހަވާލާދީ އަލްޖަޒީރާއިން ރިޕޯޓުކޮށްފައިވާ ގޮތުގައި ތެޔޮ ހުސްވެ ކަރަންޓު ކެނޑުނުއިރު، އެ ހޮސްޕިޓަލުގައި އެނދުމަތިކޮށްގެން ވަރަށް ހާލު ބޮޑެތި ބަލި މީހުންނަށް ދަނީ ފަރުވާ ދެމުންނެވެ. އޭގެތެރޭގައި ގިނަ އަދަދަކަށް ކުޑަކުދިން ވެސް ހިމެނޭ ކަމަށް އަލްޖަޒީރާއިން ރިޕޯޓު ކޮށްފައިވެ އެވެ.
"އަހަރުމެން މިދަނީ އަހަރުމެން އަތުގައި ހުރި ވަސީލަތަކުން ހިދުމަތް ދެވޭތޯ މަސައްކަތް ކުރަމުން، އެކަމަކު މިތަނުގައި އެއްވެސް ކަރަންޓެއް ނެތިއްޔާ މަސައްކަތް ކުރުން އެއްކޮށް ހުއްޓައިލަން މަޖުބޫރުވާނެ، ހޮސްޕިޓަލް މިއޮއްތީ ކަނު އަނދިރީގައި، މި ހާލަތުގައި ކިހިނެއް ބަލި މީހުންނަށް ފަރުވާ ދޭނީ،" އަލް އަގްސާ ހޮސްޕިޓަލުގެ ޑޮކްޓަރަކު އަލްޖަޒީރާއަށް ދިން އިންޓަވިއުއެއްގައި ވިދާޅުވި އެވެ.
ގާޒާ ސަރުކާރުގެ މީޑިއާ އޮފީހުން ނެރުނު ބަޔާނެއްގައި ބުނީ، އެ ހޮސްޕިޓަލުން ތެޔޮ ހުސްވުމުގެ ސަބަބުން އެންމެ ބޮޑު ނުރައްކަލަކަށް ހުށަހެޅިފައިވަނީ ދުވަސް ނުފުރާ ވިހާފައި ތިބި ކުދިން ހިމެނޭހެން ތުއްތު ކުދިން ކަމަށެވެ. އޭގެއިތުރުން އައިސީޔޫތަކުގައި ފަރުވާ ދެމުންދާ ބަލި މީހުންގެ ފުރާނައަށް ވެސް ނުރައްކާވެފައިވާ ކަމަށް އެ އޮފީހުގެ ބަޔާނުގައި ބުނެފައިވެ އެވެ.
"ފޯނުން އަލިކޮށްގެން އަހަރުމެން މަސައްކަތް ކުރިން އައިސީޔޫގައި ތިބި ކުދިންނަށް ފަރުވާ ދޭން، އެކަމަކު އެ ތަކެއްޗަކީ ޗާޖު ކޮށްގެން ބޭނުން ކުރެވޭ އެއްޗެހި، އެ އެއްޗެހި މަސައްކަތް ކުރުން ހުއްޓިއްޖެއްޔާ އެ ކުދިންގެ ފުރާނަ ވެސް ގެއްލިގެން ދާނެ،" އަލް އަގްސާ ހޮސްޕިޓަލުގެ ނާސަރީގައި މަސައްކަތް ކުރާ، ޑރ. ވަރްދާ އަލް އަވާވްދޭ ވިދާޅުވި އެވެ.
އެ ހޮސްޕިޓަލުގައި މިހާރުވެސް އިންކިއުބޭޓަރުގައި ފަރުވާދޭ، ތިން ކުދިންނާއި އެހެނިހެން ކޮޓަރިތަކުގައި ބައިތިއްބައިގެން ހާއްސަ ފަރުވާދޭ 10 ކުދިން އެބަތިބި ކަމަށް އެ ހޮސްޕިޓަލުގެ ޑޮކްޓަރުންނާ ހަވާލާދީ އަލްޖަޒީރާގައި ރިޕޯޓު ކޮށްފައިވެ އެވެ.
މިދިޔަ އަހަރު އޮކްޓޫބަރު 7 ވަނަ ދުވަހުން ފެށިގެން ގާޒާއަށް އިޒްރޭލުން ދެމުންދާ ހަމަލާތަކުގައި މިހައިތަނަށް 23،843 މީހުން ޝަހީދުވެފައިވެ 60،317 މީހުން ޒަހަމުވެފައިވާ ކަމަށް ގާޒާގެ ހެލްތު މިނިސްޓަރީން ބުނެ އެވެ.
ގާޒާގެ 70 އިންސައްތައަށްވުރެ ގިނަ އިމާރާތްތައް ބިމާހަމަކޮށްލާފައިވާއިރު، އެ ސިޓީގައި ސިއްހީ ހިދުމަތް ދެވޭ ހުރީ ވަރަށް މަދު ތަނެކެވެ. މި ހަނގުރާމައިގައި އިޒްރޭލުން ވަނީ ގާޒާގެ ބެޕްޓިސްޓު ހޮސްޕިޓަލަށް ހަމަލާދީ ގޮއްވާލައިފަ އެވެ. އޭގެފަހުން ޔަހޫދީންގެ ހައްދުފަހަނައެޅި ސިފައިން ވަނީ އަލް ޝިފާ ހޮސްޕިޓަލް ހިފައި އެތަނުގައި ތިބި ހުރިހާ ބަލި މީހުން މަގުމަތި ކޮށްލައިފަ އެވެ.
