ކުރީގެ ސަރުކާރުގެ ހައުސިން ސްކީމްތަކުގެ ގޯއްޗާއި ފްލެޓުތަކުގެ ރަޖިސްޓްރީ މި ހަފުތާގެ ނިޔަލަށް ހަވާލު ކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި އޮތަސް، ހައުސިން މިނިސްޓްރީން އެގޮތަށް މަސައްކަތް ކުރިއަށް ނުގެންގޮސް، ފްލެޓު ލިޔުން ދޫކުރުމުގެ މަސައްކަތް ފަށާނީ އޭސީސީން މައްސަލަ ބަލައި އެންގުމުން ކަމަށް ރޭ އެ މިނިސްޓްރީން ބުނެފި އެވެ.
ގޯއްޗާއި ފްލެޓް ލިބޭ މީހުން ހިމެނޭ ގެޒެޓުކޮށްފައިވާ ލިސްޓުގައިވާ ގޮތަށް ރަޖިސްޓްރީ ހަވާލު ކުރުމުގެ މަސައްކަތް މި ހަފުތާގެ ނިޔަލަށް ނިންމާނެ ކަމަށް ރައީސް މުއިއްޒު ވިދާޅުވީ ޖެނުއަރީ 2، 2024 ގަ އެވެ.
"ގޯތި އަދި ފްލެޓް ލިބޭނެ ކަމަށް ފައިނަލް ލިސްޓުގައި ހިމެނޭ ގެޒެޓްކޮށްފައިވާ ފަރާތްތަކަށް ރަޖިސްޓްރީ ހަދައިދީ، ގޯތި/ފްލެޓް ހަވާލު ކުރުމަކީ އަޅުގަނޑު ވައުދުވީ ގޮތަށް ކުރިއަށްދާނެ ކަމެއް. މި ހަފުތާ އާއި އަންނަ ހަފުތާ ތެރޭގައި ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިން މިނިސްޓްރީން ކުރިއަށް ގެންދާނެ،" ޖެނުއަރީ 2، 2024 ގައި ރައީސް މުއިއްޒު ކުރެއްވި އެކްސްގައި ކުރެއްވި ޕޯސްޓެއްގައި ވިދާޅުވި އެވެ.
ރައީސް މުއިއްޒު ވިދާޅުވި ގޮތުން ނަމަ މިއަދުގެ ނިޔަލަށް އެ މަސައްކަތް ނިންމަންޖެހެ އެވެ.
އެހެންވެ، ލިޔުން ހަވާލުކުރުމުގެ މަސައްކަތް މިއަދު ފަށާނެ ކަމުގެ އަޑުތައް ފެތުރިގެން ވެސް ދިޔަ އެވެ. ނަމަވެސް އެއީ ސައްހަ ވާހަކަތަކެއް ނޫން ކަމަށް ހައުސިން މިނިސްޓްރީން ނެރުނު ބަޔާނެއްގައި ބުނެފައިވެ އެވެ.
މިނިސްޓަ އޮފް ހައުސިން ލޭންޑު އެންޑު އާބަން ޑިވެލޮޕްމެންޓު ޑރ. އަލީ ހައިދަރު އަހުމަދު ނޮވެމްބަރު 19، 2023 ގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައި ވަނީ ފްލެޓު ހަވާލުކުރުމުގެ މަސައްކަތް ކުރިއަށް ނުގެންގޮސް ހުއްޓާލާފައި ވަނީ އޭސީސީން މި ސްކީމުގެ މަސައްކަތް ހުއްޓާލުމަށް އަންގާފައިވާތީ ކަމަށެވެ.
އެ މަސައްކަތް އަލުން ފަށާނީ އޭސީސީން އެންގުމުން ކަމަށް އެ މިނިސްޓްރީން ބުނެފައިވެ އެވެ.
ފްލެޓުތަކުގެ ލިޔުން ހަވާލު ކުރަން ނުފެށި ނަމަވެސް، ގޯތީގެ ލިޔުންތައް ހަވާލުކުރުމުގެ މަސައްކަތް ވަނީ ފަށައިފަ އެވެ.
ބިންވެރިޔާ ސްކީމުގެ ދަށުން 9000 އަށް ވުރެ ގިނަ ގޯތި ދޫކޮށްފައި ވާއިރު، އެންމެ ގިނަ ގޯތި ދޫކުރީ ގިރާވަރުންނެވެ. އެ ރަށުން 5,433 ގޯތި ދޫކޮށްފައި ވާއިރު، ހުޅުމާލެއިން 1351 ގޯތި އަދި ގުޅީފަޅުން 2,219 ދޫކޮށްފައިވެ އެވެ.
މިދިޔަ ސަރުކާރު ނިމުނުއިރު ގިނަ ގޯތިތަކުގެ ރަޖިސްޓްރީ ވަނީ ހަވާލުކޮށް ނިންމައިފަ އެވެ.
