މިއުނިކް (ޖެނުއަރީ 8) - ޖަރުމަނުގެ ފުޓްބޯޅަ ލެޖެންޑް، ފްރާންޒް ބެކެންބާއު، އުމުރުން 78 އަހަރުގައި މަރުވެއްޖެ އެވެ.
ބެކެންބާއު އަކީ ފުޓްބޯޅައިގެ ތާރީހުގައި ފީފާ ވޯލްޑް ކަޕް ކުޅުންތެރިއެއްގެ ގޮތުގައި އަދި ކޯޗެއްގެ ގޮތުގައި ކާމިޔާބުކުރި ތިން މީހުންގެ ތެރެއިން އެކަކެވެ. އެކަން ހާސިލްކުރީ، ބެކެންބާއުގެ އިތުރުން ފްރާންސްގެ ޑިޑިއޭ ޑެޝޯމްޕްސް އާއި ބްރެޒިލްގެ ލެޖެންޑް މާރިއޯ ޒަގާލޯ އެވެ.
މީގެ ތެރެއިން، ޒަގާލޯ ވަނީ މީގެ ދެ ދުވަސް ކުރިން، އުމުރުން 92 އަހަރުގައި މަރުވެފަ އެވެ.
ވެސްޓް ޖަރުމަނުގެ ކެޕްޓަނެއްގެ ގޮތުގައި، ބެކެންބާއު ފީފާ ވޯލްޑް ކަޕްގެ ތަށި އުފުލާލީ، 1974 ވަނަ އަހަރުގަ އެވެ. އަދި ކޯޗެއްގެ ގޮތުގައި ވަނީ 1990 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްފަ އެވެ.
ކްލަބް ކެރިއަރުގައި ޖަރުމަނުގެ ގަދަބާރު، ބަޔާން މިއުނިކަށް 582 މެޗު ކުޅެދިން ބެކެންބާއު ވަނީ އެ ޓީމުގެ ކުޅުންތެރިއެއް އަދި ކޯޗެއްގެ ގޮތުގައި ޖަރުމަނުގެ މުބާރާތްތައް ކާމިޔާބުކޮށްފަ އެވެ. އޭގެ ތެރޭގައި ތިން ލީގު ތަށްޓާއި، ޔޫރަޕްގެ ކްލަބް މުބާރާތް ތިން ފަހަރު ހޯދުން ހިމެނެ އެވެ.
ބެލޮންޑިއޯ އެވޯޑް ދެ ފަހަރު ހޯދި ބެކެންބާއު ވަނީ ޔޫރޯ ތަށި 1972 ވަަނަ އަހަރު ހޯދައިފަ އެވެ.
ފީފާ ވޯލްޑް ކަޕް، 1966 ވަނަ އަހަރު ބޭއްވިއިރު، އެންމެ މޮޅު ޒުވާން ކުޅުންތެރިޔާގެ މަގާމު ހޯދި ބެކެންބާއު ވަނީ ޖަރުމަނު ޓީމަށް 103 މެޗު ކުޅެދީފަ އެވެ.
