ޖަރުމަނުން މި ފަހަރުގެ ޔޫރޯ ފުޓްބޯޅަ މުބާރާތުގައި ވާދަކުރާނީ ބާއްވާ ގައުމުގެ ހައިސިއްޔަތުންނެވެ. ޖުމްލަ އެކު، މީގެ ކުރިން ޖަރުމަނުން ވަނީ ޔޫރޯ ފުޓްބޯޅަ މުބާރާތްތަކުގައި 13 ފަހަރު ވާދަކޮށްފަ އެވެ. ކުރިން ހުޅަނގު ޖަރުމަނުގެ ނަމުގައި ވެސް އެ ޓީމު ވަނީ ވާދަކޮށްފަ އެވެ.
ޖަރުމަނުން އެންމެ ފުރަތަމަ ޔޫރޯ ފުޓްބޯޅަ މުބާރާތުގައި ވާދަކުރިއިރު، 1972 ވަނަ އަހަރު ވަނީ މުބާރާތުގެ ޗެމްޕިއަންކަން ހޯދައިފަ އެވެ. އޭގެ ފަހުން، އެ ޓީމުން ޗެމްޕިއަންކަން ހޯދީ 1980 ވަނަ އަހަރާއި 1996 ވަނަ އަހަރު އެވެ. އެކާވީސް ވަނަ ގަރުނުގައި ޖަރުމަނުން ޔޫރޯ ފުޓްބޯޅަ މުބާރާތުގެ ފައިނަލުގައި އެނއް ފަހަރު ކުޅުނެވެ. އެއީ 2008 ވަނަ އަހަރު އެވެ. އެ ފަހަރު ވަނީ ސްޕެއިން އަތުން ފައިނަލުގައި ބަލިވެފަ އެވެ. އޭގެ ފަހުން ޖެހިޖެހިގެން ތިން ސެމީ ފައިނަލުގައި ކުޅުމަށް ފަހު، އެންމެ ފަހުން ބޭއްވި ޔޫރޯ އިން ކެޓީ ގަދަ 16 ބުރުގަ އެވެ.
މި ފަހަރުގެ ޔޫރޯ ފުޓްބޯޅަ މުބާރާތަށް ޖަރުމަނުން މި ނުކުންނަނީ، ބައިނަލްއަގުވާމީ ފުޓްބޯޅައިގައި ވޭތުވެދިޔަ ހަ ވަރަކަށް އަހަރު ހިތި ތަޖުރިބާތަކެއް ކޮށްފަ އެެވެ. އެ ގޮތުން، ޖެހިޖެހިގެން ދެ ވޯލްޑް ކަޕްގެ ގްރޫޕް ސްޓޭޖުން ކެޓިއިރު، ނަތީޖާތަށް ވެސް ފެނުނީ ހައިރާންކުރަނިވި ގޮތަކަށެވެ.
ޖަރުމަނު ފުޓްބޯޅަ ހަމަމަގަށް އަޅުވަން މި ފަހަރުގެ ޔޫރޯ ފުޓްބޯޅަ މުބާރާތުގައި ފުރުސަތު ލިބިފައިވާއިރު، އަމިއްލަ ގައުމުގައި 2006 ވަނަ އަހަރުގެ ފީފާ ވޯލްޑް ކަޕަށް ފަހު، ބާއްވާ ފުރަތަމަ ބޮޑު މުބާރާތުގައި ޖަރުމަނު ޓީމުގެ ޒިންމާއާ ހަވާލުވެހުރީ، ޒުވާން ކޯޗު ހޫލިއަން ނާގަލްސްމަން އެވެ. ނާގަލްސްމަން އަށް ޖަރުމަނު ކޯޗުކަން ފުރަތަމަ ހަވާލުކުރީ މި މުބާރާތުގެ ނިޔަލަށެވެ. އެކަމަކު، އޭނާގެ މަސައްކަތް ރަނގަޅުވުމުން، 2026 ވަަނަ އަހަރުގެ ވޯލްޑް ކަޕްގެ ނިޔަލަށް ވަނީ ކޮންޓްރެކްޓް އާ ކޮށްފަ އެވެ.
ޖަރުމަނު ހިމެނެނީ ސްކޮޓްލެންޑާއި ހަންގޭރީ އަދި ސްވިޒަލެންޑާ އެކު ގްރޫޕް އޭ ގަ އެވެ.
ޖަރުމަނު ޓީމަކީ ތަރިންގެ ޓީމެކެވެ. މި ފަަހަރުގެ މުބާރާތުގައި ޓޯނީ ކްރޫސް، އެނބުރި ޓީމަށް އައުމަކީ ލިބިގެންދިޔަ ބޮޑު ފަސޭހަ އެކެވެ.
