ބާލިން (ސެޕްޓެމްބަރު 14) - ޖަރުމަނުގެ ގައުމީ ފުޓްބޯޅަ ޓީމުގެ ކޯޗުކަމަށް އެ ގައުމުގެ ފުޓްބޯޅަ ފެޑެރޭޝަނުން ފަސް ކޯޗަކު ޝޯޓްލިސްޓްކޮށްފި އެވެ.
ޖަރުމަންގެ ގައުމީ ކޯޗުގެ މަގާމް ހުސްވެފައިމިވަނީ ކުރީގެ ކޯޗު ހަންސީ ފްލިކް މަގާމުން ވަކިކުރުމާ ގުޅިގެންނެވެ. ހަންސީ ފްލިކްގެ އިރުޝާދުގެ ދަަށުން އެންމެ ފަހުން ޖަރުމަންގެ ގައުމީ ޓީމް ކުޅުނު ފަސް މެޗުގެ ތެރެއިން ހަތަރު މެޗުން ވަނީ ބަލިވެފަ އެވެ.
ފްލިކްގެ ބަދަލުގައި ޖަރުމަންގެ ގައުމީ ޓީމްގެ ކޯޗަކަށް ގެންނަން ފަސް ކޯޗެއްވަނީ ޝޯޓްލިސްޓުކޮށްފަ އެވެ. އޭގެ ތެރޭގައި އެންމެ ބޮޑަށް ފާހަގަކޮށްލެވެނީ ލިވަޕޫލްގެ ކޯޗު ޔާގެން ކްލޮޕް އެވެ. ނަމަވެސް ލިވަޕޫލާއިއެކު 2026ގެ ޖޫން މަހާ ހަމައަށް ކޮންޓްރެކްޓުގައި ހުރި ކޯޗު ޖަރުމަންގެ ގައުމީ ޓީމަށް ދިޔުމުގެ ވިސްނުމެއް މިވަގުތު ނެތެވެ.
މީޑިއާ ރިޕޯޓްތައް ބުނާ ގޮތުން އާ ކޯޗުގެ މަގާމަށް އައުން އެންމެ ގާތީ އެންމެ ފަހުން ފްރާންސް އަތުން 2-1 އިން ޖަރުމަން މޮޅުވި މެޗުގައި އެޓީމަށް އިރުޝާދުދިން ރޫޑީ ވޮލާ އެވެ. ޖަރުމަންގެ ފުޓްބޯޅަ ޓީމްގެ ސްޕޯޓިން ޑިރެކްޓަރުގެ މަގާމުގައި ހުރި ވޮލާ ކޯޗުކަމާ ހަވާލުވާން އެޓީމްގެ ގިނަ ކުޅުންތެރިންވެސް ބޭނުންވެ އެވެ.
ދެން ޝޯޓްލިސްޓުކުރި ކޯޗުންނަކީ ބަޔާން މިޔުނިކްގެ ކުރީގެ ކޯޗު ހޫލިއަން ނޭގަލްސްމަން އާއި ޖަރުމަންގެ ކުރީގެ ފޯވާޑް މިރޮސްލާވް ކްލޯސާ އަދި ނެދަލޭންސްގެ ކުރީގެ ކޯޗު ލުއީ ވެންހާލް އެވެ.
މި ކޯޗުންގެ ތެރެއިން ލުއީ ވެންހާލްގެ ސިއްހީ ހާލަތު ހުރި ގޮތުން 72 އަހަރުގެ ކޯޗަށް ޖަރުމަން ކަހަލަ ޓީމަކަށް އިރުޝާދުދިނުމުގައި އުނދަގޫތަކެއް ހުންނާނެކަމަށް ބެލެވެ އެވެ. 2022ގެ ވޯލްޑް ކަޕްގެ ކުއާޓާ ފައިނަލަށް ފަހު ނެދަލޭންޑްސްގެ ގައުމީ ޓީމުން އޭނާ ވަނީ ވަކިވެފަ އެވެ.
ގިނަ ބަޔަކު ގަބޫލުކުރާ ގޮތުގައި ޖަރުމަންގެ އާ ކޯޗަކަށް ގެނައުން ގާތީ 36 އަހަރުގެ ނާގެލްސްމަން އެވެ. ބަޔާން މިޔުނިކާއި، ރެޑްބުލް ލިއެޕްޒިގެ ކުރީގެ ކޯޗު މިވަގުތު ހުރީ ވަޒީފާއެއް ނެތިފަ އެވެ. އޭނާގެ ޒުވާން އުމުރާއި ކޯޗިން ސްޓައިލަށް ބަލާއިރު ޖަރުމަންގެ ގައުމީ ޓީމަށް ކުރިއެރުން ގެނެވޭނެކަމަށް ތަޖުރިބާކާރުން ގަބޫލުކުރެ އެވެ.
ޖަރުމަނަކީ އަބަދުވެސް އަމިއްލަ ގައުމުގެ ކޯޗުން ގައުމީ ޓީމްގައި ބެހެއްޓުމަށް އިސްކަންދޭ ގައުމެކެވެ. އެހެންކަމުން ނާގެލްސްމަންއަށް މި ފުރުސަތު ލިބުން ބޮޑުކަމަށްވެސް ބެލެވެ އެވެ.
ނާގެލްސްމަން އަށް މި ފުރުސަތު ނުލިބެއްޖެނަމަ ދެން އެ ގައުމުގެ ފެޑެރޭޝަނުން ބޭނުންވާނެ ކޯޗެއްގެ ގޮތުގައި ކްލޯސާވެސް ފާހަގަވެ އެވެ. އެ ގޮތުން، 2001 އިން ފެށިގެން 2014އާ ހަމައަށް ޖަރުމަންގެ ގައުމީ ޓީމަށް ކުޅުނު ފޯވާޑް ވަނީ 2016 އިން ފެށިގެން 2018 އަށް ގައުމީ ޓީމްގެ އެސިސްޓަންޓް ކޯޗުގެ ގޮތުގައި މަސައްކަތްކޮށްފަ އެވެ. އޭގެ ފަހުން ބަޔާން މިއުނިކްގެ އެސިސްޓަންޓް ކޯޗުގެ ގޮތުގައި ވެސް ކްލޯސާ މަސައްކަތްކުރި އެވެ.
ޖަރުމަންގެ ގައުމީ ޓީމަށް ކުރިއަށް ކުޅެން ހުރި މެޗުތަކަށް ބަލާއިރު މިއަހަރު ކުރިއަށް އޮތީ އެކުވެރިކަމުގެ ތިން މެޗެވެ. އެއީ އަންނަ މަހު އެމެރިކާ އާއި މެކްސިކޯއާ ދެކޮޅަށް ކުޅޭ ދެ މެޗާއި، ނޮވެމްބަރު މަހު އޮސްޓްރިއާއާ ދެކޮޅަށް ކުޅޭ މެޗެވެ.
އަންނަ އަހަރުގެ ޔޫރޯ އަމިއްލަ ގައުމުގައި ބާއްވާތީއާ އެކު މި އަހަރު ބާކީ ހުރި އެކުވެރިކަމުގެ މެޗުތަކުގެ ކުރިން ގައުމީ ޓީމަށް ކޯޗެއް ހަމަޖައްސާނެ ކަމަށް ބެލެވެ އެވެ.
ޖަރުމަނުން އެންމެ ފަހުން ޔޫރޯ ކާމިޔާބުކޮށްފައިވަނީ 1996 ވަނަ އަހަރުގަ އެވެ. އޭގެ ފަހުން އެގައުމުން ވަނީ 2014ގެ ފީފާ ވޯލްޑް ކަޕް ކާމިޔާބުކޮށްފަ އެވެ.
