އުތުރު ގާޒާ އެއްކޮށްހެން ސުންނާފަތި ކޮށްލުމަށް ފަހު ދެކުނާއި މެދުތެރޭ ގާޒާގައި ތިބި ހަމާސްގެ މުޖާހިދުންނަށް ހަމަލާތައް އަމާޒު ކުރުމަށް ނިންމާފައިވާ ކަމަށް އިޒްރޭލުން ބުނެފި އެވެ.
އިޒްރޭލު އަސްކަރިއްޔާގެ ތަރުޖަމާނު, ޑެނިއަލް ހަގާރީ ބުނީ އުތުރު ގާޒާއިން ހަމާސްގެ ބާރު ކަނޑުވާލެވިފައިވާ ކަމަށާއި މިހާރު އަމާޒަކީ މެދުތެރެއާއި ދެކުނު ގާޒާގައި ހަމާސް ބަލިކުރުން ކަމަށެވެ.
"އަހަރުމެންގެ މިހާރުގެ އަމާޒަކީ މެދުތެރެއާއި ދެކުނު ގާޒާއިން ހަމާސްގެ ބާރު ކަނޑުވައިލުން،"
އޭނާ ބުނީ އުތުރު ގާޒާގައި ހަރަކާތްތެރިވި ހަމާސްގެ 8000 އެއްހައި މުޖާހިދުން މަރާލެވިފައިވާ ކަމަށާއި އެ ސަރަހައްދުގައި އޮތް ހަމާސްގެ އަސްކަރީ އޮނިގަނޑު އެއްކޮށް އިޒްރޭލުން ރޫޅާލާފައިވާ ކަމަށެވެ.
ނަމަވެސް އަސްކަރީ ކޮމާންޑަރުންނާ ނުލައި އަދިވެސް އެ ސަރަހައްދުގައި ހަމާސްގެ މުހާޖިދުން ހަރަކާތްތެރިވަމުން ދާކަމަށް އޭނާ ބުންޏެވެ.
ވައިގެ މަގުން ޑްރޯންއާއި މިސައިލުގެ އިތުރުން ފައިމަގުގައި ގާޒާއަށް ވަދެގަނެ އިޒްރޭލުން ހަމަލާދޭން ފެށީ މިދިޔަ އަހަރުގެ އޮކްޓޫބަރު 7 ވަނަ ދުވަހު ހަމާސްއިން އިޒްރޭލަށް ދިން ކުއްލި ހަމަލާއަށް ބަދަލު ހިފުމަށެވެ.
ތޫފާނުލް އަގުސާގެ ނަމުގައި ދިން ކުއްލި އެ ހަމަލާގައި އިޒްރޭލުގެ 1140 މީހުން މަރާލައި 240 މީހުން އަސީރުންގެ ގޮތުގައި ހަމާސްއިން އަތުލައިގަތެވެ. ބަދަލުގައި އިޒްރޭލުން ގާޒާއަށް ދެމުންދާ ހަމަލާތަކުގައި މިހަތަނަށް ޝަހީދުވި ފަލަސްތީނީންގެ އަދަދު ވަނީ 23،000 އާ ގާތްވެފަ އެވެ.
ފަލަސްތީނުގައި އިޒްރޭލުން ހިންގަމުން ގެންދާ އަމަލުތަކަކީ ގަތުލުއާއްމުތަކެއްގެ ގޮތުގައި ސިފަކޮށް ދުނިޔޭގެ އެކި ކަންކޮޅުން ދަނީ ހަނގުރާމަ ހުއްޓައިލުމަށް ގޮވައިލަމުންނެވެ. ނަމަވެސް އިޒްރޭލުން ބުނެފައި ވަނީ ހަނގުރާމަ ހުއްޓައިލާނީ ހަމާސްގެ ވަސް ފަލަސްތީނުން ފުހެލުމަށްފަހު ކަމަށެވެ.
