އައު އަހަރު ފާހަގަ ކުރުމާ ގުޅުވައިގެން، ފަލަސްތީނާ ދެކޮޅަށް އިޒްރޭލުން ކުރަމުންދާ ހަނގުރާމަ ހުއްޓައިލަން ގޮވައިލުމަށް ހާއްސަ ކޮށްގެން ދުނިޔޭގެ އެކި ކަންކޮޅުގައި ރޭ ވަރުގަދަ ހަރަކާތެއް ހިންގައިފި އެވެ.
އިނގިރޭސިވިލާތާއި ޖަރުމަނު އަދި ސްވިޒަލޭންޑާއި އޮސްޓްރޭލިއާ ފަދަ ގައުމުތައް ވެސް ހިމެނޭހެން ޖުމުލަ 30 އަށްވުރެ ގިނަ ގައުމުގައި ކުރިއަށް ގެންދިޔަ އެ ހަރަކާތުގައި ގިނަ އަދަދެއްގެ ބަޔަކު ބައިވެރިވި އެވެ. ރާއްޖޭގައި ވެސް ރޭ ވަނީ އެ ހަރަކާތް ކުރިއަށް ގެންގޮސްފަ އެވެ.
ކައުންޓްޑައުން2ސީޒްފަޔާ ގެ އެކައުންޓުތަކުން ވަނީ ދުނިޔޭގެ އެކި ކަންކޮޅުގައި ކުރިއަށް ގެންދިޔަ އެ ހަރަކާތްތައް ލައިވްކޮށްފަ އެވެ.
އެ ހަރަކާތުގެ ބައިވެރިން ވަނީ ބައިގަޑިއިރު ވަންދެން ފަލަސްތީނުގެ ރައްޔިތުންގެ ހައްގުގައި އެކި ޝުއޫރުތައް ފާޅުކޮށްފަ އެވެ. އަދި ފަލަސްތީނުގެ ތާރީހަކީ ކޮބައިކަން އައު ޖީލުތަކަށް އަންގައިދިނުމުގެ މުހިންމު ކަމަށް އަލިއަޅުވާލައި އެ ހަރަކާތުގެ ބައިވެރިން ވަނީ އިޒްރޭލުގެ އަމަލުތަކާ ދެކޮޅަށް ކޮންމެ މީހަކަށް ވެސް ކުރެވުނު މިންވަރަކުން އަމަލު ކުރުމަށް ގޮވާލައިފަ އެވެ.
ކޮންމެ އައު އަހަރަކާ ދިމާކޮށް އެމީހަކު ބޭނުންވާ ކަމަކަށް ހިތު ނިޔަތް ގަތުން ނުވަތަ ގެންނަން އެދޭ ބަދަލަކާ ގުޅުވައި އައު އަޒުމުތަކެއް ކަނޑައެޅުމަކީ ވިލާތުގެ އާދަކާދައިގެ ތެރެއިން ދުނިޔެއަށް ތައާރަފުވެފައިވާ ކަމެކެވެ. އެހެންކަމުން އިޒްރޭލުން ގާޒާގައި ހިންގަމުންދާ ގަތުލުއާއްމުތަކާ ދެކޮޅަށް އަޑުއުފުލާ އެކްޓިވިސްޓުން މިފަހަރުގެ އައު އަހަރުގެ ކައުންޓްޑައުން ހާއްސަ ކުރީ ފަލަސްތީނުގެ ރައްޔިތުންނަށެވެ.
އޮކްޓޫބަރު 7 ވަނަ ދުވަހުން ފެށިގެން އިޒްރޭލުން ގާޒާއަށް ދެމުންދާ ހަމަލާތަކުގައި މިހައިތަނަށް 21،500 އަށްވުރެ ގިނަ ފަލަސްތީނީން ޝަހީދު ކޮށްލާފައިވާއިރު، އޭގެތެރޭގައި 10،000 އަށްވުރެ ގިނައިން ހިމެނެނީ ކުށެއް ނެތް މައުސޫމް ތުއްތު ކުދިންނެވެ.
ނަމަވެސް ހަނގުރާމަ ހުއްޓައިލުމަށް ގޮވާލައި އދ އިން ފާސްކުރަން މަސައްކަތް ކުރި ހުރިހާ ގަރާރަކަށް ވެސް އިޒްރޭލުގެ އެންމެ ބޮޑު ވާގިވެރިޔާ، އެމެރިކާއިން ވަނީ ވީޓޯ ކުރުމުގެ ބާރުގެ ބޭނުން ހިފައި ހުރަސް އަޅައިފަ އެވެ.
އެމެރިކާގެ އަމަލުތައް ކުށްވެރިކޮށް ދުނިޔޭގެ ހަތަރު ބިތުގައި ވެސް ދަނީ ހަނގުރާމަ ހުއްޓައިލުމަށް ގޮވާލައި މުޒާހަރާތައް ކުރަމުންނެވެ. އިންސާނީ ހައްގުތަކަށް ވަކާލާތު ކުރާ ހިއުމަން ރައިޓްސް ވޮޗްއާއި އެމްނެސްޓީ އިންޓަނޭޝަނަލް އަދި ޑޮކްޓާސް ވިތައުޓް ބޯޑާސް ފަދަ ޖަމާއަތްތަކުން ވެސް ވަނީ ހަނގުރާމަ ހުއްޓައިލުމަށް ގޮވާލާ ގަރާރުތައް އެމެރިކާއިން ވީޓޯ ކުރުން ކުށްވެރިކޮށް އެކަމާ ދެކޮޅަށް އަޑު އުފުލައިފަ އެެވެ.
އިންސާނީ ބޮޑު ކާރިސާއަކަށް ވެފައިވާ ފަލަސްތީނު ހަނގުރާމައަކީ ދެވަނަ ބޮޑު ހަނގުރާމައިގެ ފަހުން ދުނިޔޭގައި ހިނގާ ހަނގުރާމައިގެ އެންމެ ބޮޑު ޖަރީމާކަމަށް ބީބީސީގެ ތަހުގީގީ ނޫސްވެރިން ރިޕޯޓުކޮށްފައިވެ އެވެ.
އައު އަހަރު ފާހަގަ ކުރުމާ ގުޅުވައި ދުނިޔޭގެ ހުރިހާ ބައްރެއްގައި ރޭ ކުރިއަށް ގެންދިޔަ ހަރަކާތުގެ މަގުސަދަކީ މުޅި ދުނިޔެ އޮތީ އިޒްރޭލުން ހިންގާ ޖަރީމާތަކާ ދެކޮޅަށްކަން ހާމަ ކޮށްދިނުން ކަމަށް ހަރަކާތް އިންތިޒާމު ކުރި ފަރާތުން ބުނެފައިވެ އެވެ.
