ރިސޯޓު ތަރައްގީކުރަން ދޫކޮށްފައިވާ ރަށްތަކުގެ ތެރެއިން ނުހުޅުވި މަސައްކަތް ހުއްޓިފައިވާ ރަށްތަކުގެ ތެރެއިން، މަދުވެގެން 30 ޕަސެންޓު ރަށް، މި ފަސް އަހަރުގެ ތެރޭގައި މާކެޓަށް ނެރުމަކީ އަމާޒެއް ކަމަށް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ފައިސަލް ވިދާޅުވީ ފަތުރުވެރިކަމަށް ދޫކޮށްފައިވާ ރަށްތަކުގެ ތެރެއިން ގިނަ އަދަދެއްގެ ރަށްތައް ނުހެދި، ހުއްޓިފައި ހުރުމަކީ ރާއްޖޭގެ ފަތުރުވެރިކަމަށް އޮތް އެންމެ ބޮޑު ގޮންޖެހުން ކަމަށެވެ. ތަފާސްހިސާބުން ދައްކާ ގޮތުން 63 ރަށެއް ތަރައްގީ ނުކުރެވި، މަސައްކތް ހުއްޓިފައިވާ ކަމަށް އޭނާ ވިދާޅުވި އެވެ.
"ބައެއް ރަށްރަށް އެބަހުރި 20 އަހަރު 15 އަހަރު މާކެޓަށް ނުނިކުމެ،" ޕީއެސްއެމްގެ 'ރާއްޖެމިއަދު" ޕްރޮގްރާމުގައި ވާހަކަ ދައްކަވަމުން އޭނާ ވިދާޅުވި އެވެ.
ހުއްޓިފައި ހުރި ރަށްތައް ތަރައްގީކޮށް ހުޅުވުމަށްޓަކައި، އެ ރަށްތަކުގެ އިންވެސްޓަރުންނާއި ބައްދަލުކުރުމުގެ މަސައްކަތް މިނިސްޓްރީން ކުރަމުން އަންނަކަން ފައިސަލް ފާހަގަ ކުރެއްވި އެވެ. އަދި ސަރުކާރަށް ވެދެވޭނެ އެހީތެރިކަން ދެނެގަނެ، ގާނޫނީ ގޮތުން ކުރެވޭނެ މަސައްކަތްތައް ދެނެގަތުމަށްޓަކައި އެޓާނީ ޖެނެރަލްއާ މަޝްވަރާތަކެއް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ފިނޭންސް މިނިސްޓްރީން މިއަހަރު އާންމުކުރި "ފިސްކަލް ހިރާސްތަކުގެ ބަޔާން 2023" ގައިވާ ތަފާސްހިސާބުތަކުގައި ވާގޮތުން ރާއްޖޭގެ ޖުމުލަ 256 ރަށެއް ވަނީ ފަތުރުވެރިކަމަށް ދޫކޮށްފަ އެވެ. އޭގެ ތެރެއިން އޮޕަރޭޓް ކުރަމުން ދަނީ 168 ރަށެެކެވެ. ބާކީ 88 ރަށް ތަރައްގީކުރުމުގެ މަސައްކަތް އެއްބަސްވުމާއި އެއްގޮތައް ކުރިއަށް ނުދާކަން ބަޔާނުގައި ވަނީ ފާހަގަކޮށްފަ އެވެ.
މަސައްކަތް ހުއްޓިފައިވާ ރަށްތަކުގެ އަދަދު އެންމެ ގިނައީ ކ. އަތޮޅުގަ އެވެ. އެ އަތޮޅުގެ 29 ރަށެއް ފަތުރުވެރިކަމުގެ ބޭނުމަށް ދޫކޮށް، އޮޕަރޭޝަނަށް ނުގެނެވި އެބަ އޮތެވެ.
