އަންނަ އަހަރު ދެ މިލިއަން ފަތުރުވެރިން ރާއްޖެއަށްް ޒިޔާރަތް ކުރާނެ ކަމަށް ލަފާކުރެވޭ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން މިނިސްޓަރު ފައިިސަލް ވިދާޅުވީ، މި ފަތުރުވެރިކަމުގެ އަމާޒަށް ވާސިލްވުމަށްޓަކައި، ބައިނައްލަގުވާމީ ފެންވަރުގައި ރާއްޖެ އިތުރަށް މާކެޓު ކުރަން ޖެހޭ ކަމަށެވެ.
އެގޮތުން, އެމްއެމްޕީއާރްސީއާ ގުޅިގެން އިތުރު މާކެޓުތަކަށް ވާސިލުވެ، ރާއްޖެ އިޝްތިހާރު ކުރުމަށް ގިނަ މަސައްކަތްތަކެއް ކުރައްވާނެ ކަމުގައި ވިދާޅުވި އެވެ.
"އެމްއެމްޕީއާރުސީގައި ވަރަށް ގާބިލު މެނޭޖިން ޑިރެކްޓަރެއް އެ ހުންނެވީ. އަދި މުޅި ޓީމާ އެކީގައި، ޓޫރިޒަމް މިނިސްޓްރީއާ އެކީގައި އަޅުގަނޑުމެން އެންމެން ގުޅިގެން މި ކުރެވޭ މަސައްކަތުން ހަމަ [ފަތުރުވެރިންގެ އަދަދު] ދެ މިލިއަނަށް ވުރެ އިތުުރުވުމަކީ ވެސް ގާތްކަމެއް،" ފައިސަލް ވިދާޅުވި އެވެ.
ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ މަސައްކަތް އަންނަ އަހަރު ނިންމުމަށް ސަރުކާރުން އަމާޒު ހިފައިފައިވާ ކަމަށް ވެސް ވިދާޅުވި އެވެ. އަދި, އައު ޓާމިނަލާ އެކު ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެ ކަން ފާހަގަކުރެއްވި އެވެ.
އޭގެ އިތުރުން ގައުމީ އެއާލައިނުން ރާއްޖެއަށް މިހާރު އެންމެ ގިނައިން ފަތުރުވެރިން އަންނަ ރަޝިއާ، ޔޫކޭ، ޗައިނާ އަދި ޖަރުމަނު ފަދަ ގައުމުތަކަށް ސީދާ ދަތުރުތައް ފެށުމުގެ މަސައްކަތް ވެސް ސަރުކާރުން ކުރަމުން އަންނަ ކަމަށް ފައިސަލް ވިދާޅުވި އެވެ.
"ރާއްޖެއަށް އެންމެ ގިނައިން ފަތުރުވެރިން އަންނަ ޑެސްޓިނޭޝަންތަކަށް ޑައިރެކްޓް ފްލައިޓް މޯލްޑިވިއަނުން ކުރެވޭނަމަ، ވަރަށް ބޮޑު ކުރިއެރުމަކަށް ވެގެންދާނެ. ވަރަށް އަވަހަށް ޕޮޓެންޝަލް ޑެސްޓިނޭޝަންތަކަށް ދަތުރުތައް ފެށިގެންދާނެ،" ފައިސަލް ފާހަގަކުރެއްވި އެވެ.
ފައިސަލް ވަނީ މިހާރު ކުރިއަށްދާ ރަޝިއާ-ޔޫކްރޭން ހަނގުރާމައިގެ އިތުރުން އިޒްރޭލުން ފަލަސްތީނަށް ދެމުންދާ ހަމަލާތަކުގެސަބަބުން ދަތުރު ކުރުމުގައި ގޮތް ނުނިންމާ މީހުން ގިނަ ކަން ފާހަގަކުރައްވާފަ އެވެ. އަދި ރާއްޖޭގެ މާކެޓިން ވަރުގަދަ ކުރަން ޖެހެނީ މިފަދަ ސަބަބުތަކާއި ހުރެކަމަށް ވިދާޅުވި އެވެ.
އަންނަ އަހަރު ރާއްޖޭގައި އަލަށް 15 ވަރަކަށް ރިސޯޓު ހުޅުވޭނެ ކަމަށް އަންދާޒާ ކުރެވޭ ކަމަށް ފައިސަލް ވިދާޅުވި އެވެ. އަދި އޭގެ ސަބަބުން 1،000 އެއްހާ އެނދު އިތުރުވެގެން ދާނެ ކަން ފާހަގަކުރެއްވި އެވެ.
