އދ. ގެ ސަލާމަތީ މަޖިލީހުން ހުކުރު ދުވަހު ފާސްކުރި ގަރާރަށް ފަހު އިޒްރޭލް ސިފައިން ދިން ހަމަލާތަކުގައި އދ.ގެ އޮފިޝަލަކާއި އޭނާގެ އާއިލާގެ 70 އަށް ވުރެ ގިނަ މީހުން ޝަހީދު ކޮށްލައިފި އެވެ.
ހުކުރު ދުވަހު ދިން ހަމަލާތަކުގައި ޝަހީދުވީ ޔޫއެންޑީޕީގައި ތިން ދަހަރު މަސައްކަތް ކުރި އީސާމް އަލް މުޣުރާބީ، 56، އެވެ. އެ ހަމަލާގައި އޭނާގެ އަންހެނުންނާއި ދަރިންގެ އިތުރުން އެ އާއިލާއަށް ނިސްބަތްވާ 70 މީހުން ޝަހީދުކޮށްލާފައިވެ އެވެ.
މިއީ ހުކުރު ދުވަހު އދ. ގެ ސަލާމަތީ މަޖިލީހުން ފާސްކުރި ގަރާރަށް ފަހު އިޒްރޭލުން ދިން އެންމެ ވަރުގަދަ ހަމަލާ އެވެ.
ޔޫއެންޑީޕީގެ އެޑްމިނިސްޓްރޭޓަރު އާޗިމް ސްޓެއިނާ ނެރުއްވި ބަޔާނެއްގައި ވިދާޅުވީ ވޭތުވެދިޔަ 30 އަހަރު އީސާމް ވަނީ ޔޫއެންޑީޕީއާއެކު ފަލަސްތީނުގެ ރައްޔިތުންނަށް އެހީތެރިކަން ފޯރުކޮށް ދިނުމަށް މަސައްކަތްކޮށްފައި ކަމަށާއި އޭނާ ގެއްލިގެން ދިޔުމަކީ ފުން އަސަރެއް ކުރުވި ކަމެއް ކަމަށެވެ.
"އދ. ގެ މުވައްޒަފުންނާއި ގާޒާގެ އާންމުންނަކީ ހަނގުރާމައިގެ އަމާޒަކަށް ވެގެން ނުވާނެ،" އެ ބަޔާނުގައި ވިދާޅުވެފައިވެ އެވެ.
އީސާމްގެ ޝަހީދުކޮށްލުމާ ގުޅިގެން ދުނިޔޭގެ ސިއްހަތު ޖަމިއްޔާގެ ވެރިޔާ ޓެޑްރޯސް އޭނާގެ އެކްސްގައި ކުރެއްވި ޕޯސްޓެއްގައި ވިދާޅުވީ އިންސާނިއްޔަތަށްޓަކައި މަސައްކަތްކުރާ މީހުން ހަނގުރާމައިގެ ޝިކާރައަކަށް ވެގެން ނުވާނެ ކަމަށެވެ. އޭނާ ވަނީ އިޒްރޭލް ސިފައިންނާއި ހަމާސްއާ ދެމެދު ކުރަމުންދާ ހަނގުރާމަ ހުއްޓާލައި ސުލުހަ ގާއިމު ކުރުމަށް ވެސް ގޮވާލައިފަ އެވެ.
އޮކްޓޯބަރު 7 ގައި އިޒްރޭލު ސިފައިންނާއި ހަމާސްގެ ހަނގުރާމަ ފެށިފަހުން ޝަހީދުވި ފަލަސްތީނު މީހުންގެ އަދަދު 20،000 އަށް ވުރެ މައްޗަށް ވަނީ އަރައިފަ އެވެ.
