އިންޑިއާ އާއި ނޭޕާލުން ރާއްޖެއަށް އަންސްކިލްޑް ލޭބަރުން އަލުން ގެނެވޭ ގޮތަށް މިއަދު ހޯމްލޭންޑް ސެކިއުރިޓީ މިނިސްޓްރީން ހަމަޖައްސައިފި އެވެ.
ބަންގަލަދޭޝްގެ ލޭބަރުން އަލުން ރާއްޖެ ގެނެވޭ ގޮތް ހަދައި އެހެން ގައުމުތަކުން ރާއްޖެއަށް އަންސްކިލްޑް ލޭބަރުން ގެނައުން ވަގުތީ ގޮތުން އޮތީ މަޑުޖައްސާލާފަ އެވެ. ހޯމްލޭންޑް ސެކިއުރިޓީ މިނިސްޓްރީން އެގޮތަށް ނިންމާފައިވާކަން އިއުލާނުކުރީ މިދިޔަ އާދީއްތަ ދުވަހު އެވެ.
ނަމަވެސް މިއަދު ބޭއްވި ނޫސްވެރިންގެ ބައްދަލުވުމުގައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާނު ވިދާޅުވީ ރާއްޖެއަށް އެހެން ގައުމުތަކުގެ އަންސްކިލްޑް ލޭބަރުން ގެނައުމުގައި ބަލަންޖެހޭ ކަންތައްތައް ބެލުމަށްފަހު މިއަދުން ފެށިގެން އިންޑިއާ އާއި ނޭޕާލުން ރާއްޖެއަށް ލޭބަރުން ގެނެވޭ ގޮތަށް ބޯޑަރު ހުޅުވާލަން ނިންމާފައިވާ ކަމަށެވެ.
"މާނަ އަކީ އިންޑިއާ އާއި ނޭޕާލުން އަންސްކިލްޑް ލޭބަރުން މިއަދުން ފެށިގެން ރާއްޖެއަށް އެތެރެކުރެވޭނެ ގޮތް މިހާރު ވާނީ ހަދާފައި،" އޭނާ ވިދާޅުވި އެވެ.
އެހެންކަމުން މިހާރު ރާއްޖެއަށް ލޭބަރުން ގެނެވޭނީ ބަންގްލަދޭޝް އާއި އިންޑިއާ އަދި ނޭޕާލުން އެކަންޏެވެ.
މިނިސްޓަރު ވިދާޅުވީ މި ތިން ގައުމުގެ އިތުރުން އެހެން ގައުމުތަކުންވެސް ލޭބަރުން ގެނައުމަށް މިނިސްޓްރީން މިހާރު އެސެސްމެންޓްތަކެއް ހަދަމުންދާ ކަމަށެވެ. އަދި އެސެސްމެންޓް ހަދައި ނިމުމުން ކުރިއެކޭ އެއްގޮތަށް ލޭބަރުން ގެނައުމުގެ ކަންތައްތައް ކުރިއަށް ގެންދެވޭނެ ކަމަށް ވިދާޅުވި އެވެ.
ބަންގްލަދޭޝްގެ ލޭބަރުން އަލުން ރާއްޖެ ގެނެވޭ ގޮތް ސަރުކާރުން ނިންމާފައި މިވަނީ، ގަވާއިދާ ހިލާފަށް އުޅޭ ބިދޭސީންގެ މައްސަލަ ބޮޑުވެ ބަންގަލަދޭޝް އިން ރާއްޖެއަށް ލޭބަރުން ގެނައުން ސަރުކާރުން މަނާކޮށްފައި އޮންނަތާ ގާތްގަނޑަކަށް ހަތަރު އަހަރު ފަހުންނެވެ.
މިނިސްޓަރު އިހުސާނު ކުރިން ވިދާޅުވެފައިވާ ގޮތުގައި ރާއްޖެއަށް އަންސްކިލްޑް ލޭބަރުން ގެންނަން ހުއްދަ ދިނުމުގައި ބަންލަދޭޝަށް އިސްކަން ދިން އެއް ސަބަބަކީ ވިޔަފާރިވެރިންގެ ޝަކުވާ އެވެ. އެގޮތުން ރައީސް ޑރ. މުހައްމަދު މުއިއްޒު ރިޔާސީ އިންތިހާބަށް ކުރެއްވި ކެމްޕެއިނުގައި ބައްދަލުވި އެތައް ބަަޔަކު އެ ޝަކުވާ ކުރި ކަމަށް ވެސް އޭނާ ވިދާޅުވި އެވެ.
އަދި ބަންގްލަދޭޝް މީހުން ގެންނަން ހުއްދަ ދޭން ގާނޫނީ ހުރަހެއް ނެތް ކަމަށާ އެހެން ނަމަވެސް ބަންގްލަދޭޝުން މީހުން ގެންނަން ހުޅުވައިލީ ބަލަން ޖެހޭ ކަންކަން ބެލުމަށް ފަހުގައި ކަމަށް ވެސް އިހުސާނު ވަނީ ވިދާޅުވެފަ އެވެ.
ގާނޫނު ގައި މިހާރު އޮތް ގޮތުން އެއް ގައުމަކުން ގެނެވޭނީ އެންމެ ގިނަވެގެން އެއް ލައްކަ މީހުންނެވެ. ރާއްޖޭގައި މިހާރު ވެސް އެ އަދަދަށް ވުރެ ގިނައިން ބަންގްލަދޭޝް ރައްޔިތުން ތިބި ކަމަށް އިކޮނޮމިކް މިނިސްޓްރީން އެންމެ ފަހުން އާންމުކުރ ތަފާސްހިސާބުތަކުން ދައްކަ އެވެ. ނަމަވެސް އެ ރިޕޯޓު މިހާރު ޑިލީޓް ކޮށްލާފައިވާއިރު ސަރުކާރުން ބުނަމުންދަނީ ރާއްޖޭގައި ތިބީ 90،000 ބަންގްލަދޭޝް މަސައްކަތްތެރިން ކަމަށެވެ.
