ބޭރުގެ ޓޫރިސްޓު އުޅަނދުތަަކަށް ރާއްޖޭގައި ކްރޫޒިން ޕާމިޓް ދޫކުރާ މުއްދަތާއި އެކަމަށް ދައްކަންޖެހޭ ފީތަކަށް ބޮޑެތި ބަދަލުތަކެއް ގެނެސް މިދިޔަ ސަރުކާރުން ހެދި އާ ގަވާއިދު ބަދަލުކުރުމުގެ މަސައްކަތް ފަށައިފި އެވެ.
ރާއްޖެއަށް އަންނަ ބޭރުގެ ސަފާރީތަކާއި ޔޮޓް އަދި ކްރޫޒްލައިނާތައް ރާއްޖޭގެ ކަނޑުގެ ސަރަހައްދުގައި ދުއްވުމާއި ބަނދަރުކުރުމާއި ބެހޭ އާ ގަވާއިދެއް އެކުލަވާލައި އާއްމުކުރީ މިދިޔަ އޮކްޓޯބަރު 12 ވަނަ ދުވަހު އެވެ. އާ ގަވާއިދުގައި ސަރުކާރުން ވަނީ ބޭރުގެ ޓޫރިސްޓު އުޅަނދުތަައް ރާއްޖޭގެ ކަނޑުގެ ސަރަހައްދުގައި އޮޕަރޭޓުކުރާއިރު ދައްކަންޖެހޭ ފީތަކަށް ބޮޑެތި ބަދަލުތަކެއް ގެނެސްފަ އެވެ.
އާ ގަވާއިދާއި ގުޅިގެން ރާއްޖެ އަންނަ ކްރޫޒް ލައިނާތައް ރާއްޖެ ދޫކޮށް އެހެން ގައުމުތަކަށް ޑައިވާޓު ކުރާތީ މޯލްޑިވްސް އެސޯސިއޭޝަން އޮފް ޔޮޓް އެޖެންޓް (މާޔާ) އިންވެސް ވަނީ ކަންބޮޑުވުން ފާޅުކޮށްފަ އެވެ.
އެ ކަންބޮޑުވުންތަކާ ގުޅިގެން ޓޫރިޒަމް މިނިސްޓަރު އިބްރާހިމް ފައިސަލް މިއަދު "އެކްސް"ގައި ލިޔުއްވި ޕޯސްޓެއްގައި ވިދާޅުވީ ކުރޫޒު ލައިނާ ތަކާ ގުޅޭގޮތުން ނިމިދިޔަ ސަރުކާރުން ހަދާފައިވާ ގަވާއިދު އިސްލާހުކުރުމުގެ މަސައްކަތް ކުރަމުންދާ ކަމަށެވެ. އަދި މިހާރު ކުރިމަތިވެފައިވާ ދަތިތަކަށް ވަރަށް އަވަހަށް ހައްލު ލިބިގެންދާނެކަމުގެ ޔަގީންކަން އަރުވާ ކަމަށް މިނިސްޓަރު ވިދާޅުވި އެވެ.
މިދިޔަ ސަރުކާރުން އެކުލަވާލި އާ ގަވާއިދުގައި ވާގޮތުން 20 މީޓަރަށްވުރެ ކުދި ބޭރުގެ ޓޫރިސްޓު އުޅަނދުފަހަރުތަކަށް އެއްވެސް ފީއަކާ ނުލައި ރާއްޖޭގެ ސަރަހައްދުގައި 90 ދުވަސްވަންދެން ދުއްވައި ބަނދަރުކުރެވޭނެ އެެވެ. އިންޓަނޭޝަނަލް މެރިޓައިމް އޮގަނައިޒޭޝަންގައި ރަޖިސްޓްރީކޮށްފައިވާ އުޅަނދެއް ނަމަ 90 ދުވަސް ހަމަވުމުން މުއްދަތު އިތުރުކުރާ ކޮންމެ ދުވަހަކަށް 50 ޔޫއެސް ޑޮލަރުގެ ފީއެއް ދައްކާގޮތައް 275 ދުވަހާ ހަމަޔަށް ކްރޫޒިން ޕާމިޓްގެ މުއްދަތު އިތުުރުކުރެވޭނެ އެެވެ.
އެއާ ހިލާފަށް 20 މީޓަރަށްވުރެ ދިގު އުޅަނދުތަކަށް ކްރޫސިން ޕާމިޓް ދޫކުރާނީ 1،000 ޔޫއެސް ޑޮލަރުގެ ފީއެއް ދެއްކުމުންނެވެ. މި ޕާމިޓުގެ މުއްދަތަކީ އިންވާޑް ކްލިއަރެންސް ދޭ ދުވަހުން ފެށިގެން 90 ދުވަހެވެ. މި އުޅަނދުތައް ރާއްޖޭގެ ސަރަހައްދުގައި ދުއްވައ،ި ބަނދަރުކޮށްހަދާ މުއްދަތަށް، ދުވާލަކަށް 100 ޔޫއެސް ޑޮލަރުގެ ފީއެއް ދައްކަންޖެހޭނެ އެވެ.
އިންޓަނޭޝަނަލް މެރިޓައިމް އޯގަނައިޒޭޝަންގައި ރަޖިސްޓްރީކޮށްފައިވާ 20 މީޓަރަށްވުރެ ދިގު އުޅަނދެއް ނަމަ ކްރޫޒިން ޕާމިޓް އެއް އަހަރަށް އިތުރުކުރެވިދާނެ އެވެ. ނަމަވެސް އެ ހުއްދަ އެއް އަހަރަށްވުރެ އިތުރުކުރާ ނަމަ 3،500 ޔޫއެސް ޑޮލަރުގެ ފީއެއް ދައްކަންޖެހޭނެ އެވެ.
މި އާ ގަވާއިދާއެކު "ޗާޓަ ލައިސެންސް" ދޫކުރާ އަގުތަކަށް ވެސް ވަނީ ބަދަލުގެނެސްފަ އެވެ.
