ރަތް ކަނޑުން ދަތުރު ކުރަމުންދިޔަ ނޯވޭގެ ތެޔޮ ޓޭންކަރަކަށް ދިން މިސައިލްގެ ހަމަލާގެ ޒިންމާ ޔަމަނުގެ ހޫތީ ހަނގުރާމަވެރިން ނަގައިފި އެވެ.
އިސްރާއީލަށް ދަތުރުކުރާ އުޅަނދު ފަހަރަށް ހަމަލާދޭނެ ކަމުގެ އިންޒާރު ހޫތީން ކުރިން ދީފައިވެ އެވެ.
ހޫތީންގެ ތަރުޖަމާނު ޔަހިޔާ ސަރޭ ބުނީ ނޯވޭގެ ޓޭންކަރަށް މިސައިލް ފޮނުވައިލީ ދިން ހުރިހާ އިންޒާރެއް އެ ބޯޓުގެ ފަޅުވެރިން ބޮލާލައި ޖަހައި އިޒްރޭލަށް ދަތުރުކުރަމުން ދިޔުމުން ކަމަށެވެ. އެ ޖަމާއަތުން ދީފައިވާ އިންޒާރާ އެއްގޮތަށް ގިނަ އުޅަނދުފަހަރުން އަމަލުކުރާ ކަމަށާއި އަދި އެއްބާރުލުން ވެސް ދޭ ކަމަށް ތަރުޖަމާނު ފާހަގަ ކުރި އެވެ.
"ފާއިތުވި ދެ ދުވަހު ޔަމަނުގެ އަސްކަރީ ފައުޖުތަކުން ވަނީ ގިނަ އުޅަނދުތަކެއް އިޒްރޭލަށް ކުރަމުންދިޔަ ދަތުރު ހުއްޓުވައި ކާމިޔާބު ހޯދާފައި،" ތަރުޖަމާނު ފާހަގަ ކުރި އެވެ.
ގާޒާގައި ކުރަމުންދާ ހަނގުރާމައިގައި އިޒްރޭލު ސިފައިން ހިންގަމުންދާ ގަތުލްއާންމާ ދެކޮޅު ހެދުމުގެ ގޮތުން ހޫތީން އެންމެ ފުރަތަމަ ބޯޓެއް ހިފަހައްޓައި ބެލުމުގެ ދަށަށް ގެންދިޔައީ މިދިޔަ ނޮވެމްބަރު 19 ވަނަ ދުވަހު އެވެ. އެއީ ރަތް ކަނޑުން ދަތުރުކުރަމުން ދިޔަ އިޒްރޭލުގެ ގެލެކްސީ ލީޑަރެވެ.
