އިޒްރޭލުގެ ގަތުލްއާއްމު ހުއްޓާލުމަށް ގޮވާލައި އދ. ގެ އާންމު މަޖިލީހުގެ 153 ގައުމުގެ ތާއިދާއެކު ގަރާރެއް ފާސްކޮށްފި އެވެ.
ގަރާރު ފާސްކުރަން ފެންނަ ކަަމަށް 193 ގައުމުގެ ތެރެއިން 153 ގައުމަކުން ވޯޓު ދިންއިރު،. ގަރާރާ ދެކޮޅަށް 10 ގައުމަކުން ވޯޓު ދިނެވެ. އަދި 23 ގައުމަކުން ވަކި ކޮޅަކަށް ވޯޓެއް ނުދެ އެވެ.
ގަރާރާ ދެކޮޅަށް ވޯޓު ދިން ގައުމުތަކުގެ ތެރޭގައި އިޒްރޭލާއި، އެ ގައުމުގެ އެންމެ ބޮޑު ވާގިވެރިޔާ، އެމެރިކާ ވެސް ހިމެނެ އެވެ.
އެ ގަރާރުގައި ހަމަލާތައް ހުއްޓާލުމުގެ އިތުރުން ހަމާސްގެ ބެލުމުގެ ދަށުގައި ތިބި ހަނގުރާމައިގެ އަސީރުން ދޫކޮށްލުމަށް ވަނީ ގޮވާލާފައިވެ އެވެ.
އާންމު މަޖިލީހުން ފާސްކުރާ މިފަދަ ގަރާރުތަކުގައި ގާނޫނީ ބުރަދަނެއް ނެތަސް ބޮޑު އަގުލަބިއްޔަތަކުން ގަރާރު ފާސްވެގެން ދިޔުމަކީ އިޒްރޭލުގެ އަނިޔާވެރިކަމާ ދެކޮޅަށް ދުނިޔޭ ދެކޮޅުކަން ސާފުވެގެންދާ ކަމެކެވެ.
ވޯޓަށް ފަހު ސައުދީ އަރަބިއްޔާގެ ސަފީރު ވެސް ވިދާޅުވީ މި ނިންމުމުން ބައިނަލްއަގުވާމީ ދުނިޔޭގެ ބަސް އިއްވައިފި ކަމަށެވެ.
އިޒްރޭލުން ބުނެފައިވަނީ ގަރާރު ފާސްކުރިޔަސް ބޯނުލަނބާނެ ކަމަށެވެ.
މި ގަރާރު ފާސްވެފައި މިވަނީ އދ.ގެ ސަލާމަތީ މަޖިލީހަށް ހުށަހެޅި އެތައް ގަރާރެއް އެމެރިކާއިން ވީޓޯ ކޮށްފައިވަނިކޮށެވެ. އެންމެ ފަހުން އެމެރިކާއިން ވީޓޯކުރި ވޯޓު ނެގީ މިދިޔަ ހުކުރު ދުވަހު އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމަށް 75 އަހަރުވެފައިވާއިރު، މިހާރު ކުރިޔަށްދާ ހަނގުރާމައިގައި، އޮކްޓޯބަރު 7 އިން ފެށިގެން މެދުކެނޑުމެއް ނެތި އިޒްރޭލުން ދަނީ ގާޒާއަށް ބޮން އަޅަމުންނެވެ. އެ ހަމަލާތަކުގައި ޝަހީދުވި ފަލަސްތީނު މީހުންގެ އަދަދު 18،000 އަށް ވުރެ މައްޗަށް އަރަ އެވެ. އޭގެ ތެރޭގައި 8،000 އަށްވުރެ ގިނަ ކުޑަކުދިން ހިމެނެ އެވެ.
މި ހަމަލާތަކާ ގުޅިގެން ގާޒާގެ ޖުމްލަ އާބާދީ ކަމަށްވާ 2.3 މިލިއަން މީހުން އެކީހެން ވަނީ ހާލުގައި ޖެހިފަ އެވެ. އޭގެތެރެއިން މިލިއަނެއްހާ މީހުންގެ ގެދޮރު ގެއްލިފައިވާއިރު 25،000 އެއްހާ ކުޑަކުދިން ވަނީ ޔަތީމުވެފަ އެވެ.
