ކޮމިޝަނާ އޮފް ޕޮލިސްގެ މަގާމުގައި މީހަކު ނެތި މުއައްސަސާ ހިންގާތާ 25 ދުވަސް ފާއިތުވި ނަމަވެސް ފުލުހުންގެ މަސައްކަތްތައް ހުއްޓުމެއް ނެތި ބަރާބަރަށް ކުރިއަށްދާ ކަމަށް ރައީސް އޮފީހުގެ ސްޓްރެޓެޖިކް ކޮމިއުނިކޭޝަން މިނިސްޓަރު އިބްރާހީމް ހަލީލް ވިދާޅުވެއްޖެ އެވެ.
ސީޕީއަކު އައްޔަންކުރާނެ ދުވަހަކާ ގުޅޭ ގޮތުން ސުވާލު ކުރުމުން ރައީސް އޮފީހުގެ ކޮމިއުނިކޭޝަން މިނިސްޓަރު ހަލީލް މިއަދު ވިދާޅުވީ، ސީޕީގެ މަގާމުގައި ބޭފުޅަކު ނެތް ނަމަވެސް ފުލުހުންގެ މުއައްސަސާ ހިންގަން ދަތިނުވާ ކަމަށެވެ.
"މިވަގުތު ސީޕީއެއް މި ސަރުކާރުން އައްޔަންކުރެވިފައި ނެތުން އެއީ ފުލުހުންގެ މަސައްކަތަށް އަދި އެއްވެސް ކަހަލަ ހުއްޓުމެއް އަންނަނާނެ ކަމެއް ނޫން،" ހަލީލް ވިދާޅުވި އެވެ.
ދެން އެ މަގާމަށް ބޭފުޅަކު އައްޔަން ކުރެވޭނެ ތާރީހަކާ ގުޅޭ ގޮތުން އަދި އެއްޗެއް ދަންނަވަން ނޭނގޭ ކަމަށް ވެސް ހަލީލު ވިދާޅުވި އެވެ.
އެންމެ ފަހުން ސީޕީގެ މަގާމުގައި ހުންނެވި މުހައްމަދު ހަމީދު އިސްތިއުފާ ދެއްވީ ނޮވެމްބަރު 16، ގަ އެވެ. އޭގެ ފަހުން 25 ދުވަސް ފާއިތުވެފައިވާއިރު، ގާނޫނުގައި ބުނާ ގޮތުން އެ މަގާމު ހުސްވާތާ 45 ދުވަހުގެ ތެރޭގައި މީހަކު އައްޔަންކުރަން ޖެހެ އެވެ. އެ މުއްދަތު ހަމަވާނީ ޖެނުއަރީ 1، ގަ އެވެ.
ފުލުހުންގެ އެންމެ އިސްވެރިޔާގެ މަގާމު ހުސްވެފައިވާތާ ގިނަ ދުވަސްތަކެއް ފާއިތުވިއިރު، މާލެ އަދި އައްޑޫގައި މާރާާމާރީތައް ވަނީ އިތުރުވެފަ އެވެ. އެކަމާ ގުޅިގެން މިހާރު އިދިކޮޅުގައި އޮތް އެމްޑީޕީއިން ވެސް ވަނީ ކަންބޮޑުވުން ފާޅުކޮށްފަ އެވެ.
