ލޮސް އެންޖެލްސް، ޔުނައިޓެޑް ސްޓޭޓްސް (ޑިސެމްބަރު 11) - ޖަޕާންގެ ބޭސްބޯލް ތަރި، ޝޮހޭއީ އޮޓާނީ 10 އަހަރު ދުވަހުގެ އެއްބަސްވުމެއްގައި އެމެރިކާގެ އެލްއޭ ޑޮޖާސް އަށް ބަދަލުވުމަށް ނިންމައިފި އެވެ.
އޮޓާނީ ،29، އެލްއޭ ޑޮޖާސްއާ އެކު އެއްބަސްވި ކޮންޓުރެކްޓްގެ އަގަކީ 700 މިލިއަން ޑޮލަރެވެ. އެހެންކަމުން، އޮޓާނީ އަކީ އެމެރިކާގެ ބޭސްބޯލްގެ ތާރީހުގައިވެސް އެންމެ އަގުބޮޑު ކުޅުންތެރިޔާ އެވެ. އަދި މިއީ، އެމެރިކާގެ ކުޅިވަރުގައި ވެސް މިހާތަނަށް ކުޅުންތެރިޔަކަށް ދޭން އެއްބަސްވި އެންމެ ބޮޑު އަގެވެ.
މިހާރު މުޅި ދުނިޔޭގައިވެސް އެންމެ ބޮޑު އާމްދަނީއެއް ލިބޭ އެތުލީޓުންގެ ލިސްޓުގައި އޮޓާނީ ހިމެނޭނެ އެވެ.
އެލްއޭ އެންޖަލްސްއާ އެކު އޮޓާނީ ހަދާފައިވާ ކޮންޓުރެކްޓް ހަމަވުމާ އެކު، މޭޖާ ލީގު ބޭސްބޯލްގެ ގިނަ ޓީމުތަކުން އޮޓާނީ ހޯދަން މަސައްކަތްކުރި އެވެ. އެލްއޭ އެންޖަލްސްގައި އޮޓާނީ ހަ އަހަރު ހޭދަކުރިއެެެވެ.
އޮޓާނީ އަލަށް ގުޅުނު އެލްއޭ ޑޮޖާސް އަކީ އޭނާގެ ކުރީގެ ޓީމު އެލްއޭ އެންޖަލްސްގެ އެންމެ ބޮޑު އެއް ވާދަވެރިޔާ އެވެ.
"އަހަރެން ދެން ކުޅޭނެ ޓީމެއް ނިންމަން މިހާ ގިނަ ވަގުތު ހޭދަވީތީ ސަޕޯޓަރުންނަށް މާފަށް އެދެން. އަހަރެން ދެން ފެންނާނީ އެލްއޭ ޑޮޖާސް އިން،" އޮޓާނީ އޭނާގެ އިންސްޓަގްރާމްގައި ބުނެފައިވެ އެވެ.
އޮޓާނީ ވަނީ މޭޖާ ލީގު ބޭސްބޯލްގެ އެންމެ މޮޅު ކުޅުންތެރިޔާގެ މަގާމު ހޯދައިފަ އެވެ. އެއީ 2021 ވަނަ އަހަރާއި 2023 ވަނަ އަހަރެވެ.
