ޑެބްރެޗެން، ހަންގޭރީ (ސެޕްޓެމްބަރު 27) - ޔުއެފާ ނޭޝަންސް ލީގުގައި މިރޭ އިޒްރޭލާ ދެކޮޅަށް ކުޅޭ މެޗުގައި ނުކުޅެން އަޔަލެންޑުގެ ކުޅުންތެރިން ނިންމަން ފެށުމާ ގުޅިގެން، އެ މެޗު ކުޅުމާ ގުޅޭ ގޮތުން މުޅި ޓީމުގެ މެދުގައި ވޯޓެއް ނަގާފައިވާ ކަމަށް އަޔަލެންޑްގެ ފުޓްބޯލް އެސޯސިއޭޝަންގެ ޖެނެރަލް ސެކްރެޓަރީ ޑޭވިޑް ކޫރެލް ވިދާޅުވެއްޖެ އެވެ.
ހަންގޭރީގައި މިރޭ ކުޅޭ މެޗަށް، ވޯޓެއް ނެގުމަށް އަޔަލެންޑުން ނިންމިއިރު، ގިނަ ކުޅުންތެރިން ނިންމީ ޕްރޮފެޝަނަލް ނިންމުމެއް ނިންމަން ޖެހޭތީ މެޗު ކުޅޭ ގޮތަށް ކުރިއަށްދިއުމަށެވެ. އަޔަލެންޑްގެ ގިނަ ކުޅުންތެރިންތަކެއް މި މެޗުގައި ނުކުޅެން ނިންމި މައިގަނޑު ސަބަބަކީ، ފަލަސްތީނަށް އަރައި އިޒްރޭލުން ހިންގަމުން އަންނަ ލާއިންސާނީ އަމަލުތަކާ މެދު ނުރުހުން ފާޅުކޮށް، ފުޓްބޯޅައިގެ ރަސްމީ އިދާރާތަކުން އިޒްރޭލަށް ފިޔަވަޅު ނާޅާތީވެ، އެކަމާ ހިތްހަމަނުޖެހުމުގެ ޝުއޫރު ފާޅުކުރުމުގެ ގޮތުންނެވެ.
"މެޖޯރިޓީ ކުޅުންތެރިން ބޭނުންވީ މެޗު ކުޅެން، މިއީ ވޯޓުގެ ނަތީޖާ،" ކޫރެލް ވިދާޅުވި އެވެ.
މި މެޗު ކުޅެން ނިންމި ނަމަވެސް، އަޔަލެންޑްގެ އެއް ކުޅުންތެރިއަކު އެ މެޗުގައި ކުޅެން ބޭނުންނުވާކަން އެ ޓީމުގެ ކޯޗު، ހެއިމިރް ހޯލްގްރިމްސަން އަށް ވަނީ އަންގައިފަ އެވެ.
"އެއްވެސް މީހަކު ނެތް މި މެޗު ހަމަޖެހިލައިގެން ކުޅެން ބޭނުންވާ. ކޮންމެ މީހެއްގެ ވެސް ސަބަބުތަކެއް އެބަހުރި. ދެން، އަހަރެމެން މި މަސައްކަތް ކުރަނީ މި ކަމާ ކުރިމަތިލާނެ ރަނގަޅު ގޮތެއް،" ކަނޑައަޅާފައި އޮތް ވަގުތަށް ވުރެން ލަހުން ފަށަން ޖެހުނު ނޫސްވެރިންގެ ބައްދަލުވުމުގައި ސުވާލަކަށް ޖަވާބުދެމުން، ހޯލްގްރިމްސަން ބުންޏެވެ.
މި ހުރިހާ ކަމަކާ ހުރެ، އަޔަލެންޑް އެފްއޭ އިން ވަނީ، މި ފަހަރުގެ އިންޓަނޭޝަނަލް ބްރޭކުގައި ދެން އެއްވެސް ކުޅުންތެރިއަކު ރަސްމީކޮށް މީޑިއާއާ ވާހަކަ ނުދައްކާނެކަން އިއުލާނުކޮށްފަ އެވެ.
ނޭޝަންސް ލީގުގައި އިޒްރޭލާއި އަޔަލެންޑް ދެ ފަހަރެއްގެ މަތިން ކުޅެން އެބައޮތެވެ. އެއް މެޗު އޮތީ އިޒްރޭލްގެ ހޯމް މެޗެއްގެ ގޮތުގައި ކުޅެން ހަންގޭރީގަ އެވެ. އަނެއް މެޗު ކުޅޭނީ އަންނަ މަހު ހަތަރު ވަނަ ދުވަހު ޑަބްލިންގަ އެވެ. އެ މެޗަށް ސެކިއުރިޓީ ވަރުގަދަ ކުރަން އަޔަލެންޑް އެފްއޭ އިން ވަނީ ނިންމައިފަ އެވެ.
ރިޕޯޓްތައް ބުނާގޮތުން، އަޔަލެންޑް އެފްއޭ އިން ވަނީ ކުޅުންތެރިންގެ އެދުމާ އެއްގޮތަށް، އިޒްރޭލާ ދެކޮޅަށް ކުޅޭ މެޗުގައި ސަލާމްކުރުމާއި ޕެނަންޓް އެކްސްޗޭންޖް ވެސް ނޯންނާނެ ކަމަށް ބުނެފަ އެވެ. އަދި، މިރޭގެ މެޗުގައި، އަޔަލެންޑް ކުޅުންތެރިން ހާއްސަ ކަޅު ބޭންޑެއް ބޭނުންކުރާނެ އެވެ. އެއީ، އިޒްރޭލުގެ ހަމަލާތަކުގައި މަރުވެފައިވާ ފަލަސްތީނުގެ މީހުންގެ ހައްގުގައި މެސެޖެއް ލިޔެފައިވާ ކަޅު ބޭންޑެކެވެ.
އަޔަލެންޑަކީ ފަލަސްތީނުގެ ސަޕޯޓަރުން ނިސްބަތުން ވަރަށް ގިނަ ގައުމެކެވެ. އަދި، ފަލަސްތީނުގެ ހައްގުތައް ދިފާއުކުރުމަށް ގިނަ ކެމްޕެއިންތަކެއް ހިންގާ އަޔަލެންޑުގައި އިޒްރޭލުން މެޗު ކުޅުމަކީ އެންމެ ރައްކާތެރި ގޮތެއް ނޫން ކަމަށް ވެސް އިޒްރޭލުގެ ބައެއް ސަޕޯޓަރުން އަންނަނީ ބުނަމުންނެވެ.
