މާޒިޔާގެ އެސިސްޓެންޓް ކޯޗު އަހުމަދު ސުޒައިރު 10 މެޗަށް ސަސްޕެންޑުކޮށް، 15،000 ރުފިޔާއިން ޖޫރިމަނާ ކުރަން ފުޓްބޯލް އެސޯސިއޭޝަން އޮފް މޯލްޑިވްސް އިން މިރޭ ނިންމައިފި އެވެ.
އެފްއޭއެމް އިން ނެރުނު ބަޔާނެއްގައި ބުނީ ސުޒެއިރު ސަސްޕެންޑު ކުރަން ނިންމީ ސެޕްޓެމްބަރު 17، ގައި ނިއުރޭޑިއަންޓާއި މާޒިޔާ ކުޅު މެޗުގައި "ހިނގައިދިޔަ ކުޅިވަރުގެ ރޫހާ ހިލާފް އަމަލުތައް" އެ އެސޯސިއޭޝަންގެ ޑިސިޕްލަނަރީ ކޮމިޓީއިން ބެލުމަށްފަހު ކަމަށެވެ.
ޖޫރިމަނާގެ ފައިސާ 15 ދުވަހުގެ ތެރޭގައި ދެއްކުމަށް އެފްއޭއެމް އިން ވަނީ ސުޒައިރަށް އަންގައިފަ އެވެ. އަދި ޑިސިޕްލިނަރީ ކޮމިޓީގެ ނިންމުން އެޕީލް ކުރަން ބޭނުންވާނަމަ ތިން ދުވަހުގެ މުއްދަތެއްގެ ތެރޭގައި އެކަން ކުރަން އެފްއޭއެމް އިން ވަނީ އަންގައިފަ އެވެ.
ނިއުރޭޑިއަންޓުގެ އެސިސްޓެންޓު ކޯޗު ލޫޝިއާނޯ ބާބޯސާއަށް ހަމަލާދިން ކަމަށް ބުނެ ނިއު އިން ވަނީ އެ މައްސަލަ ފުލުސް އޮފީހަށް ވެސް ހުށަހަޅައިފަ އެވެ. ނަމަވެސް އެ މައްސަލަ ވަނީ ފަހުން އަނބުރާ ގެންގޮސްފަ އެވެ.
ނިއު ރޭޑިއަންޓުން ފުލުހަށް ހުށަހެޅި މާޒިޔާގެ ސުޒެއިރުގެ މައްސަލަ އަނބުރާ ގެންގޮސްފި
ދިވެހި ލީގުގައި ނިއު އާއި މާޒިޔާ ބައްދަލުކުރި މެޗުގައި ހިނގި ހަމަނުޖެހުމާ ގުޅިގެން، މާޒިޔާގެ އެސިސްޓަންޓް ކޯޗު ސުޒެއިރުގެ މައްސަލަ ފުލުހަށް ހުށަހެޅުމަށްފަހު ނިއު އިން މިހާރު ވަނީ އެ މައްސަލަ އަނބުރާ ގެންގޮސްފައި. ނިއު އިން މި މައްސަލަ އަނބުރާ ގެންދިޔައީ އެފްއޭއެމްގެ ޑިސިޕްލިނަރީ ކޮމިޓީން މިހާރު އެ މައްސަލަ ބަލަމުންދާތީ ކަމަށް އެ ކްލަބުން ބުނޭ
ނިއު އާއި މާޒިޔާ ބައްދަލުކުރި މެޗުގައި ހިނގައިދިޔަ ހަމަނުޖެހުން
ނިއު އާއި މާޒިޔާ ކުޅުނު އެ މެޗުގެ 73 ވަނަ މިނިޓްގައި ހިނގަދިިޔަ ހަމަނުޖެހުމެއްގެ ސަބަބުން، ހަތް ވަރަކަށް މިނިޓަށް މެޗުގެ ކުޅުން މެދުކަނޑާލަން ޖެހުމުންނެވެ. ހަމަނުޖެހުން ހިނގީ، ރެފްރީ ފައުލަކަށް ކަށިގަނޑު ފުމެފައިވަނިކޮށް، ނިއުގެ ލައިބީރިއާ މިޑްފީލްޑަރު ޔާޔާ ބިލީޓީ ޖެހި ބޯޅައެއް މާޒިޔާގެ އަބްދުﷲ ލޫތު އިބްރާހިމް ގައިގައި ޖެހުމުންނެވެ.
އެ ވަގުތު ދަނޑަށް ދެ ޓީމުގެ ކުޅުންތެރިންނާއި އޮފިޝަލުން އެރިއިރު، ވަގުތުތަކަކަށް މެޗުގެ ކުޅުން ހުއްޓާލަން ޖެހުނެވެ. އެ ވަގުތުގައި ހިނގައިދިޔަ ހަމަނުޖެހުންތަކަށް ބަލައި، ނިއުގެ ބިލިޓީ އާއި އީތަން އިބްރާހިމް ޒަކީ އަދި މާޒިޔާގެ އިޔާން އަބްދުލް އަލީމް އަށް ރީނދޫ ކާޑެއް ދެއްކިއިރު، މާޒިޔާގެ ހަސަން ޝިފާޒް (ޑުންގާ) އާއި ނިއުގެ އަބްދުﷲ މައިސާން (މައި) އަށް ރަތް ކާޑެއް ދެއްކި އެވެ. އަދި، ސުޒެއިރަށް ވެސް ވަނީ ރަތް ކާޑެއް ދައްކައިފަ އެވެ.
މީގެ ކުރިން ވެސް އެފްއޭއެމްގެ ޑިސިޕްލިނަރީ ކޮމިޓީން މި ފަދަ މައްސަލަތަކުގައި ފިޔަވަޅު އަޅައި، ޖޫރިމަނާކޮށް ސަސްޕެންޝަންތައް ދީފައިވެ އެވެ. އަދި، ސަޕޯޓަރުން ދަނޑަށް އަރައިގެން ހިނގާފައިވާ ހަމަނުޖެހުންތަކުގެ މައްސަލަތައް ފުލުހުން ވެސް ބަލާފައިވެ އެވެ. އެކަމަކު، އެފްއޭއެމް ޑިސިޕްލިނަރީ ކޮމީޓީން ދެ ޓީމެއްގެ އޮފިޝަލެއްގެ މި ފަދަ މައްސަލައެއް ބަލަމުންދަނިކޮށް، ފުލުހަށް މި ގޮތަށް މައްސަލައެއް މި ހުށަހެޅީ ފުރަތަމަ ފަހަރެވެ.
ފުލުހުން އެންމެފަހުން ގަލޮޅު ދަނޑުގައި ހިނގި މާރާމާރީއެއްގެ މައްސަލަ ބަލާފައިވަނީ، 2024 ވަނަ އަހަރުގެ ދެ ވަނަ ޑިވިޝަން މެޗެއްގެ ތެރެއިން، ސަޕޯޓަރުން ވެސް ދަނޑަށް އަރައިގެން ހިނގި ހަމަނުޖެހުމެއްގެ މައްސަލަ އެވެ.
