އަންނަ މަހުގެ އެއް ވަނަ ދުވަހު (އަންނަ ބުރާސްފަތި ދުވަހު)، ހުޅުމާލެ ސިންތެޓިކް ޓްރެކްގެ މަސައްކަތް ފަށަން ނިންމާފައިވާ ކަމަށް ކުޅިވަރާ ބެހޭ ވަޒީރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ކޮންމެ ދެ މަހަކުން އެއް މަހު ބާއްވާނެ ކަމަށް ބުނެ މި ސަރުކާރުން ފެށި އަހާ ފޯރަމް ސިލްސިލާގެ ފޯރަމެއް އަހަރު ދުވަސް ފަހުން, މިރޭ ސަލްޓަން ޕާކުގައި ކުރިއަށްދިޔައިރު، ސްޕޯޓްސް މިނިސްޓަރު، ރާފިއު ވަނީ ކުޅިވަރާ ގުޅުން ހުރި ސުވާލުތަކަކަށް ޖަވާބު ދެއްވައިފަ އެވެ.
އެ ގޮތުން، ރާފިއު ވިދާޅުވީ، ހުޅުމާލޭ ސިންތެޓިކް ޓްރެކް ސްޓޭޑިއަމްގައި މި ވަގުތު އޮތް ސިންތެޓިކް ޓްރެކަކީ ބައިނަލްއަގްވާމީ ފެންވަރަށް ހެދިފައިވާ ޓްރެކެއް ނޫން ކަމަށެވެ.
އެކަމުގެ ސަބަބުން، އެތުލީޓުން ގައުމީ ރެކޯޑެއް ހެދިކަމުގައިވިޔަސް، ވޯލްޑް އެތުލެޓިކްސްގެ އުސޫލު އޮންނަ ގޮތުން ރެކޯޑް ގުނަނީ ހަމައެކަނި ވޯލްޑް އެތުލެޓިކްސް އެސޯސިއޭޝަން ގަބޫލުކުރާ ފެންވަރުގެ ޓްރެކްގައި ހަދާ ރެކޯޑްތައް ރާފިއު ފާހަގަކުރެއްވި އެވެ.
މި ހުރިހާ ކަމަކަށް ބަލައި، ހުޅުމާލޭ ސިންތެޓިކް ޓްރެކްގެ މަސައްކަތް މިހާރު ފަށަން ތައްޔާރުވެފައިވާއިރު، ރާފިއު ވިދާޅުވީ، ދެން ހަދާ ޓްރެކަކީ ބައިނަލްއަގުވާމީ މިންގަނޑުތަކަށް ފެތޭ ގޮތަށް ހަދާ ސިންތެޓިކް ޓްރެކެއް ކަމަށެވެ.
އަންނަ ބުރާސްފަތި ދުވަހު، ސިންތެޓިކް ޓްރެކުގެ މަސައްކަތް ފަށާއިރު، އެ ތަނުގައި އަޅާ ސިންތެޓިކްގެ މެޓީރިއަލް މުޅިން ހެން ބަދަލުކުރާއިރު، ދެން ފެންނާނީ އެންމެ ރަނގަޅު ފެންވަރުގެ ޓްރެކެއް ކަމަށް ވެސް ރާފިއު ވިދާޅުވި އެވެ. އަދި، އަމާޒަކީ އަންނަ ޖެނުއަރީ މަހަށް ޓްރެކުގެ މަސައްކަތް ނިންމުން ކަމަށް ވެސް އޭނާގެ ވާހަކައިގައި ފާހަގަކުރެއްވި އެވެ.
ރާފިއު ވިދާޅުވީ، މިހާރު އޮތް ޓްރެކްގެ ބަދަލުގައި ދެން ގާއިމުކުރާ ޓްރެކް ވެގެންދާނީ ވޯލްޑް އެތުލެޓިކްސްއިން ގަބޫލުކުރާ ފެންވަރުގެ ޓްރެކަކަށް ކަމަށެވެ. އަދި އެ ޓްރެކްގެ މެޓީރިއަލް އެއްކޮށް ބަދަލުކޮށް އަލުން ޓްރެކް އެޅުމުގެ މަސައްކަތް އަންނަ މަހުގެ 1 ވަނަ ދުވަހުން ފެށިގެން އަމަލީ ގޮތުން ފެށިގެންދާނެ ކަމަށެވެ. އަދި އަންނަ ޖަނަވަރީ މަހަށް ޓްރެކްގެ މަސައްކަތް ނިންމާނެ ކަމަށް ވަޒީރު ވިދާޅުވިއެވެ.
"(ސިންތެޓިކް) ޓްރެކް ހަދަން މި ޖެހެނީ ވޯލްޑް އެތުލެޓިކްސް ގަބޫލުކުރާ ފެންވަރަށް. އަޅުގަނޑުމެންގެ އެތުލީޓުން ނެރޭ ނަތީޖާ ގަބޫލުކުރާ ފެންވަރަށް. ދެން އެ ގޮތުގެ މަތިން އަޅުގަނޑުމެން ސިންތެޓިކްގެ މެޓީރިއަލް އެއްކޮށް ބަދަލުކޮށް އިރާދަކުރެއްވިއްޔާ މުޅި އެއްކޮށް ބޭސް ނަގާ އަލުން ޓްރެކެއް އަޅަން މި ޖެހެނީ،" ރާފިއު ވިދާޅުވި އެވެ.
އޭނާ ވަނީ، މާލޭގައި އަޅާފައިވާ ސިންތެޓިކް ޓްރެކު ވެސް ބައިނަލްއަގުވާމީ މިންގަނޑަށް ގެނައުމަށްޓަކައި މަސައްކަތް ކުރަމުން އަންނަ ކަމަށް ވިދާޅުވެފަ އެވެ.
ހުޅުމާލޭގައި އޮތީ 2017 ވަނަ އަހަރު ރައީސް އަބްދުﷲ ޔާމީންގެ ސަރުކާރުގައި އަޅާފައިވާ ސިންތެޓިކް ޓްރެކް އެކެވެ. އެއީ، ޗައިނާ ކުންފުންޏަކާ ހަވާލުކޮށްގެން ކުރި މަސައްކަތެކެވެ. އެއީ، މޯލްޑިވްސް އެއާޕޯޓްސް ކޮޮމްޕެނީ (އެމްއޭސީއެލް) މެދުވެރިކޮށެވެ. މާލޭގައި ސިންތެޓިކް ޓްރެކް އެޅީ 2021 ވަނަ އަހަރު ރައީސް، އިބްރާހިމް މުހައްމަދު ސޯލިހުގެ ސަރުކާރުގަ އެެވެ. އެއީ، އިންޑިއާ ސަރުކާރުގެ އެހީގައި ކުރިއަށްގެންދިޔަ މަސައްކަތެކެވެ.
