އަންނަ މަހު މެލޭޝިއާގައި ކުރިއަށްދާ އައިސީސީ ޓީ20 ކްރިކެޓް ވޯލްޑް ކަޕް ކޮލިފައިންގައި ވާދަކުރުމުގެ ކުރިން ރާއްޖޭގެ ގައުމީ ކްރިކެޓް ޓީމުން ސްރީ ލަންކާގައި ނުވަ ދުވަހުގެ ޓްރެއިނިން ކޭމްޕެއް ކުރިއަށްގެންދިއުމަށް މިއަދު ފުރައިފި އެވެ.
އަންނަ މަހު ފަސް ވަަނަ ދުވަހު ލަންކާގައި މި ޓްރެއިނިން ކޭމްޕް ކުރިއަށްދާއިރު، ޓީ20 ވޯލްޑް ކަޕް ކޮލިފައިން ސަބް ރީޖަނަލް ކޮލިފައިން އޮތީ އަންނަ މަހު 6-15 އަށެވެ. ރާއްޖެ ހިމެނެނީ ގްރޫޕް ބީގަ އެވެ. ދެން، އެ ގްރޫޕްގައި އޮތީ ޗައިނާ، ސައުދީ އަރަބިއްޔާ، ސިންގަޕޫރު، މެލޭޝިއާ، ހޮންގް ކޮންގް އެވެ. ކޮންމެ ގްރޫޕަކުން ވެސް އެއް ވަަނަ އާއި ދެ ވަނަ ރީޖަނަލް ފައިނަލްސް އަށް ހޮވޭއިރު، ގްރޫޕް އޭގައި ވާދަކުރަނީ، ބަހުރެއިން، ކުވެއިތު، މޮންގޯލިއާ، މިޔަންމާ، ގަތަރު އަދި ތައިލެންޑް އެވެ.
ލަންކާގައި ކުރިއަށްގެންދާ ޓްރެއިނިން ކޭމްޕްގެ ތެރެއިން ދެ މެޗެއް ކުޅޭ ގޮތަށް ވަނީ ހަމަޖެހިފަ އެވެ. ގޯލް އިންޓަނޭޝަނަލް ކްރިކެޓް ސްޓޭޑިއަމްގައި ކުޅޭ މި ދެ މެޗަކީ، ޓީ20 ވޯލްޑް ކަޕް ކޮލިފައިންގެ ކުރިން ރާއްޖެ އަށް މެޗު ފިޓްނަސް އާއި ނެޗުރަލް ޓާފުގައި ކުޅެލައި، އެހެނިހެން ކަންކަމަށް މަސައްކަތް ކުރަން ލިބޭ ފުރުސަތެއް ކަމަށް ކްރިކެޓް ބޯޑް އޮފް މޯލްޑިވްސް (ސީބީއެމް) އިން ވަނީ ފާހަގަކޮށްފަ އެވެ.
ޓްރެއިނިން ކޭމްޕްގެ ކަންކަން ގައުމީ ކްރިކެޓް ޓީމުން ކުރިއަށްގެންދަނީ ދާދި ފަހުން ކްރިކެޓް ޓީމުގެ ކޯޗަކަށް ގެނައި އަފްގާނިސްތާންގެ އަސަދުﷲ ހާން (އަސަދު)ގެ ބެލުމުގެ ދަށުންނެވެ. ކޭމްޕް ނިންމާލުމަށް ފަހު، މެލޭޝިއާ އަށް ދާން ގައުމީ ޓީމު ލަންކާ މަގުން ފުރާނީ އަންނަ މަހު ފަސް ވަނަ ދުވަހު އެވެ. ކޮލިފައިން ފުރަތަމަ މެޗު އޮތީ އަންނަ މަހު އަށް ވަނަ ދުވަހު ޗައިނާއާ ދެކޮޅަށެެވެ.
މި ފަަހަރުގެ ކޮލިފައިންގައި ރާއްޖޭގެ ކެޕްޓަނަކީ ހަސަން ހާޒިގެވެ. އަދި، ވައިސް ކެޕްޓަނަކީ ޔޫސުފް އަޒްޔާން އެވެ. ޓީމުގައި ދެން ހިމެނެނީ، މުހައްމަދު ރިޝްވާން، އިސްމާއިލް ނަޒްވާން، ހަރްޝާ އަމަރަސިންގޭ، އިގްބާލް ޝެރާޒް، އާދަމް ނާސިފް، އަހުމަދު އަމީލް، އިސްމާއިލް އަލީ، މަބްސަރު އަބްދުﷲ، އިބްރާހިމް ރިޒާން، އަޝަން ޔާޕާ، ތަރުޝާ ކަވިންދާ އަދި ޝަފްރާޒް ޖަލީލް އެެވެ.
ކޯޗު އަސަދުﷲ ހާން އަށް އެހީވުމަށް އެސިސްޓަންޓް ކޯޗަކަށް މުހައްމަދު ޖާވިދު މަސައްކަތްކުރާއިރު، ފިޒިއޯ އަކީ ދަނުޝްކާ ސްރިމަލް އެެެވެ. އަދި، ޓީމުގެ މެނޭޖަރަކީ އާރިފް ރިޒާ އެވެ.
ރާއްޖޭން ކޮލިފައިން ދެ ވަނަ މެޗުގައި, ނުވަ ވަނަ ދުވަހު ސިންގަޕޫރާ ކުޅުމަށް ފަހު, 11 ވަނަ ދުވަހު މެލޭޝިއާއާ ވާދަކުރާނެ އެވެ. އަންނަ މަހު 12 ވަނަ ދުވަހު ހޮންގް ކޮންގާ ކުޅުމަށް ފަހު، ގްރޫޕްގެ ފަހު މެޗުގައި 14 ވަނަ ދުވަހު ސައުދީ އަރަބިއްޔާއާ ވާދަކުރާނެ އެވެ.
