ހަމާސް ހަމާއަތުގެ މުޖާހިދުންގެ ނިމުން ގާތްވެފައިވާ ކަމަށް ވިދާޅުވެ އަމާން ދިނުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިއްޔެ ގޮވާލައްވައިފި އެވެ.
"ހަނގުރާމަ އަދިވެސް ހިނގަމުން އެބަދޭ، އެކަމަކު މިއީ ހަމާސްގެ ނިމުމުގެ ފެށުން. ހަމާސް އަށް ގޮވާލަން ބޭނުން ވަނީ [ޔަހްޔާ] ސިންވާރަށްޓަކައި މަރުނުވާށޭ. މިހާރުން މިހާރަށް އަމާން ދޭށޭ،" ހަމާސް ޖަމާއަތުގެ ވެރިޔާ، ޔަހްޔާ ސިންވާރަށް އިޝާރާތް ކުރައްވައި ނަތަންޔާހޫ ނެރުއްވި ބަޔާނެއްގައި ވިދާޅުވެފައިވެ އެވެ.
ނަތަންޔާހޫ ވިދާޅުވީ ވޭދުވެދިޔަ ދުވަސްތަކުގައި ހަމާސްގެ އެތައް ބަޔަކު އަމިއްލަ އަށް އިޒްރޭލު ސިފައިންނާ ހަވާލުވެފައިވާ ކަމަށެވެ. އެފަދަ އެއްވެސް ހެއްކެއް ދެއްކިފައި ނުވާއިރު، ހަމާސްއިން ވަނީ ނަތަންޔާހޫ ފަތުރަމުންދަނީ ދޮގު ކަމަށް ބުނެފަ އެވެ.
މިހާތަނަށް ހަނގުރާމައިގައި ބޮޑު ކާމިޔާބެއް ލިބިފައިވާ ކަމަށާއި މިފަހަރު އިޒްރޭލުގެ މައްޗަށް ކުރި ހޯދާނެ ކަމަށް ހަމާސްއިން ދަނީ ބުނަމުންނެވެ.
މިހާރު ކުރިޔަށްދާ ހަނގުރާމަ ފެށިތާ ދެމަސް ދުވަސް ވެފައިވާއިރު ފަލަސްތީނުގެ ރައްޔިތުންގެ ތެރެއިން 17،000 އަށް ވުރެ ގިނަ މީހުން ވަނީ ޝަހީދުކޮށްލައިފަ އެވެ. އަދި އިޒްރޭލްގެ ސިފައިންގެ 1،300 މީހަކު މަރުވެފައިވެ އެވެ.
