އިރާނުގެ ޖައްވީ ޕްރޮގުރާމުގެ ދަށުން، ދިރޭ ޖަނަވާރު ހިމެނޭ ކެޕްސޫލަކާއެކު ދުނިޔޭގެ ސަތަހައިން ބޭރަށް އެގައުމުގައި އަމިއްލައަށް އުފައްދާފައިވާ ރޮކެޓެއް ފޮނުވައިފި އެވެ.
އިރާނުގެ ދައުލަތުގެ މީޑިއާއިން އިއްޔެ ރިޕޯޓުކޮށްފައި ވާގޮތުގައި އެ ރޮކެޓު ފޮނުވާފައި ވަނީ ޖައްވަށް އިންސާނުން ފޮނުވުމަށް ތައްޔާރުވުމަށް އެގައުމުން ކުރަމުންދާ މަސައްކަތުގެ ތެރެއިން ކަމަށެވެ.
ސަލްމާނުގެ ނަމުން ނަން ދީފައިވާ ރޮކެޓުގައި އިރާނުން ފޮނުވި ކެޕްސޫލުގެ ބަރުދަނުގައި 500 ކިލޯ ހުރި ކަމަށް އެގައުމުގެ މީޑިއާތަކާ ހަވާލާދީ އަލްޖަޒީރާއިން ރިޕޯޓުކޮށްފައިވެ އެވެ. އެ ކެޕްސޫލަކީ އިރާނުގެ ޖައްވީ ޕްރޮގުރާމުގެ ތާރީހުގައި މިހައިތަނަށް ދުނިޔެއިން ބޭރަށް ފޮނުވި އެންމެ ބަރު ކެޕްސޫލެވެ.
އިރާނުގެ ސްޕޭސް އޭޖެންސީގެ އޯޑަރުގެ ދަށުން އެ ކެޕްސޫލް ޑިވެލޮޕް ކޮށްފައި ވަނީ އެގައުމުގެ މިނިސްޓަރީ އޮފް ސައިންސް، ރިސާޗް އެންޑު ޓެކްނޮލޮޖީގެ އެއިރޮސްޕޭސް ޑިވިޝަނުންނެވެ. ކެޕްސޫލް އުފުލި ރޮކެޓު އުފައްދާފައި ވަނީ އިރާނުގެ ޑިފެންސް މިނިސްޓަރީގެ އެއިރޮސްޕޭސް ގޮފިންނެވެ.
ޖައްވަށް ޖަަނަވާރު ފޮނުވަން އިރާނުން ފެށީ ދެހާހުގެ މެދުތެރޭގަ އެވެ. އެ މަސައްކަތް ފުރަތަމަ ފަހަރަށް އެ ގައުމުން ކާމިޔާބު ކުރީ 2010 ވަނަ އަހަރު އެވެ. 2013 ވަނަ އަހަރު އިރާނުން ވަނީ ކާމިޔާބު ކަމާއެކު ޖައްވަށް ދެ ރާމާމަކުނު ފޮނުވުމަށްފަހު އަނބުރާ ދުނިޔޭގެ ސަތަހައަށް ގެނެސްފަ އެވެ
