ގާޒާއަށް ވަދެގަނެ ގަތުލުއާއްމުތައް ހިންގަމުންދާ އިޒްރޭލު ސިފައިންގެ މެދުގައި ލެޔާއެކު ބޭރަށް ހިންގާ ނުރައްކާތެރި ރޯގާ، ސިގެއްލާ އާދަޔާހިލާފު ބާރުމިނެއްގައި ފެތުރެން ފަށައިފި އެވެ.
އިޒްރޭލު ސިފައިންގެ މެދުގައި ސިގެއްލާ ބަލި އާދަޔާހިލާފު ބާރުމިނުގައި ފެތުރެމުން ދާކަން އެންމެ ފުރަތަމަ ރިޕޯޓުކޮށްފައި ވަނީ އިޒްރޭލުގެ ޔެޑިއޮތު އައްރޮނޮތު ނޫހުގަ އެވެ. އެ ނޫހުގައި ބުނެފައި ވަނީ ސިގެއްލާ ބަލި ފެތުރެމެން ދަނީ ސިފައިން ކެއުމަށް ބޭނުން ކުރާ ކާނާގެ ސަބަބުން ކަމަށެވެ.
އިޒްރޭލުން ގަދަކަމުން ވެރިވެގަނެފައިވާ އަޝްދޮދުގައި ހުންނަ އަސޫޓާ ޖެނެރަލް ހޮސްޕިޓަލުގެ ޑޮކްޓަރު، ތަލް ބްރޮޝް ބުނެފައި ވަނީ ސިގެއްލާ އެންމެ ފުރަތަމަ ފެތުރުނީ ގާޒާގެ އުތުރުގައި ހަރަކާތްތެރިވަމުން ދިޔަ އިޒްރޭލު ސިފައިންގެ ތެރޭގައި ކަމަށެވެ. ނަމަވެސް ފަހުން ގާޒާގެ ތެރެއަށް ވަދެގަތް މީހުންގެ ތެރޭގައި ވެސް އެ ބަލި ފެތުރެން ފެށީ ކަމަށް އޭނާ ބުންޏެވެ.
އޮކްޓޯބަރު ހަތްވަނަ ދުވަހު ހަމާސްގެ މުޖާހިދުން އިޒްރޭލަށް ދިން ކުއްލި ހަމަލާއަށްފަހު އިޒްރޭލުން ހިންގަން ފެށި ޖަރީމާތައް އިތުރަށް ފުޅާކޮށް ފައިމަގުން ގާޒާއަށް ވަދެގަތުމުގެ މަސައްކަތް ފެށި ދުވަހުން ފެށިގެން އިޒްރޭލުގެ އާންމުން ދަނީ އިޒްރޭލު ސިފައިންނަށް ކާނާ ހަދިޔާ ކުރަމުންނެވެ. ނަމަވެސް ސިގެއްލާ ފަދަ ރޯގާއެއް ފެތުރެން މެދުވެރިވެފައި ވަނީ އިޒްރޭލުގެ އާންމުން ހަދިޔާ ކުރާ ކާނާ އެންމެ ރަނގަޅަށް ނުބެލެއްހެއްޓުމުގެ ސަބަބުން ކަމަށް އިޒްރޭލުގެ ސިއްހީ މާހިރުންނާ ހަވާލާދީ ހިބްރޫ މީޑިއާތަކުގައި ރިޕޯޓުކޮށްފައިވެ އެވެ.
ސިގެއްލާއަކީ ސިގެއްލާ ނަމަކަށް ކިޔާ ބެކްޓީރިއާއަކުން ޖެހޭ ފުރާނައަށް ވެސް ނުރައްކާވާ ރޯގާއެކެވެ. ފަސޭހައިން އެކަކު އަނެކަކު ގަޔަށް އަރާ ސިގެއްލާ ރޯގާ ޖެހުމުން ލެޔާ އެކު ބޭރަށް ހިންގުމުގެ އިތުރުން ބޯ އަނބުރައި ހޮޑުލައި ގަދައަށް ހުން އައުމުގެ އިތުރުން ބަނޑުގައި ވެސް ރިއްސަ އެވެ.
