ނިމިދިޔަ ސަރުކާރުގެ "ގެދޮރުވެރިޔާ" ސްކީމުގެ ދަށުން ދީފައިވާ ފްލެޓު ހަވާލު ކުރުން ހުއްޓުވުމުގެ ގާނޫނީ ބާރު އެންޓި ކޮރަޕްޝަން ކޮމިޝަން (އޭސީސީ) އަށް ނެތް ކަމަށް ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގެ ބައެއް މެމްބަރުން މިއަދު ވިދާޅުވެއްޖެ އެވެ.
ގެދޮރުވެރިޔާ ސްކީމުގެ ދަށުން ދޫކޮށްފައިވާ ފްލެޓުތަކާއި ގުޅިގެން މި ސަރުކާރުން ނިންމާފައިވާ ކަންކަމާ ގުޅޭ މައުލޫމާތު ސާފުކުރުމަށް، އާ ހައުސިން މިނިސްޓަރު ޑރ. އަލީ ހައިދަރު އަހުމަދު ހާޒިރުކޮށް މިއަދު ބޭއްވި ގައުމީ ތަރައްގީ އާއި ތަރިކައިގެ ކޮމިޓީ ބައްދަލުވުމުގައި ބައެއް މެމްބަރުން ކަންބޮޑުވުން ފާޅުކުރެއްވީ ފްލެޓު ދިނުން ހުއްޓިފައި އޮތް އޮތުމާ މެދުގަ އެވެ.
"ގެދޮރުވެރިޔާ ސްކީމު"ގެ ނަމުގައި ކުރީ ސަރުކާރުން ހިންގި ފްލެޓު މަޝްރޫއުން ފްލެޓު ލިބޭ މީހުންގެ ދާއިމީ ލިސްޓު ނެރުމާއެކު، ސަރުކާރުން މަސައްކަތް ކުރަނީ އުސޫލުން ބޭރުން ކޮރަޕްޝަން އެކުލެވޭ ގޮތަށް ފްލެޓް ބަހައިލަން ކަމަށް ތުހުމަތުކޮށް އޭސީސީއަށް ބަޔަކު މައްސަލަ ހުށަހެޅި އެވެ. އެ މައްސަަލަ ހުށަހެޅުމުން ހުށަހަޅެމުން އޭސީސީން އެންގީ ފްލެޓު ދިނުން މަޑުޖައްސައިލުމަށެވެ.
އެ މައްސަލާގައި އޭސީސީން ފުރަތަމަ އެންގީ ފްލެޓް ލިބޭ މީހުންގެ ލިސްޓަށް ޝަކުވާ ހުށަހަޅަން އެކަށީގެންވާ މުއްދަތެއް ދިނުމަށްފަހު މަޝްރޫއު ކުރިއަށް ގެންދިއުމަށެވެ. އެއާއެކު ޕްލޭނިން މިނިސްޓްރީން ޝަކުވާ ހުށަހަޅަން ފަސް ދުވަހުގެ މުއްދަތެއް ދިނުމަށްފަހު ފްލެޓު ލިބޭ މީހުންގެ ދާއިމީ ލިސްޓެއް ނެރެ, ގުރު ނަގައި އެގްރީމަންޓުތަކުގައި ސޮއިކުރަން ފެށުމާއެކު އޭސީސީން ވަނީ އެގްރީމަންޓުތަކުގައި ސޮއިކުރުމާއި، އެ ފުލެޓްތައް ހަވާލުކުރުމާ ގުޅުންހުރި އެންމެހައި މަސައްކަތްތައް ހުއްޓައިލަން އެންގި އެވެ.
ފްލެޓުތައް ހަވާލުކުރުމުގެ މަސައްކަތް މި ސަރުކާރުން އަލުން ފަށަން ރާވާފައިވަނީ ކޮންއިރަކުތޯ މިއަދުގެ ކޮމިޓީ ބައްދަލުވުމުގައި މެމްބަރަކު ސުވާލުކުރުމުން މިނިސްޓަރު ވިދާޅުވީ އަލުން އެ މަސައްކަތް ފަށާނީ އޭސީސީން ބަލަމުންދާ މައްސަލަ ނިންމައި ވަކި ގޮތެއް އެންގުން ކަމަށެވެ. އެކަމަށް 20 ދުވަހުގެ މުއްދަތެއް ހޭދަވާނެ ކަމަށް އޭސީސީން މިނިސްޓްރީއަށް އަންގާފައިވީ ނަމަވެސް އެއަށްވުރެ ގިނަ ދުވަސް ހޭދަވާނެ ކަމަށް ބެލެވޭ ކަމަށް ވެސް އޭނާ ވިދާޅުވި އެވެ.
"ދުވަސް ހޭދަވާނެ ކަމަށް. ނަމަވެސް ވިދާޅުވީ ޖިނާއީ ތަހުގީގެއް ކަމަށްވާތީ ހެކީގެ ސައްހަކަން ކަށަވަރުކުރުމަށްޓަކާ އޭސީސީން ވަކިގޮތެއް އަންގަންދެން ޕޯޓަލްގެ އެކްސެސް އެކޮމިޝަން ފިޔަވައި އެހެން ފަރާތްތަކަށް ވަގުތީ ގޮތުން ކަނޑާލަން. އެހެންވީމަ އެއަށްވުރެ ދުވަސް ނަގާފާނެ ޖިނާއީ ތަހުގީގެއް ވީމަ،" ހައިދަރު ވިދާޅުވި އެވެ.
އެހެން ނަމަވެސް ހޮޅުދޫ ދާއިރާގެ މެމްބަރު ޔޫނުސް އަލީ ވިދާޅުވީ ސަރުކާރުން ހިންގާ އެއްވެސް މަޝްރޫއެއް ހުއްޓުވުމުގެ ގާނޫނީ ބާރެއް އޭސީސީއަށް ނޯންނާނެ ކަމަށެވެ. އެއީ އޭސީސީގެ މެންޑޭޓުގައި ހިމެނޭ ކަމެއް ނޫން ކަމަށް ވެސް ވެސް އޭނާ ވިދާޅުވި އެވެ.
"އޭސީސީގެ މެންޑޭޓުތެރޭގަ ނުހިމެނޭ ކަމެއް އެ ބޭފުޅުން ކުރައްވާއިރު މިނިސްޓަރު ކީއްވެތޯ ތިހުންނަވަނީ ޖިނާއީ ތަހުގީގެެއް ހިންގުމުގެ ފުރަސަތު އެބޭފުޅުންނަށް ދެއްވައިގެން؟" ޔޫނުސް ވިދާޅުވި އެވެ.
ފްލެޓު ދިނުން ހުއްޓުވުމުގެ ގާނޫނީ ބާރެއް އޭސީސީއަށް ނެތްކަމުގެ ހުއްޖަތެއް ކަމަށް މެމްބަރު ޔޫނުސް ދެއްކެވީ ރާއްޖޭގައި ބޯޑާކޮންޓްރޯލް ސިސްޓަމެއް ގާއިމުކުރުމުގެ މަސައްކަތް ނެކްސްބިޒް ޕްރައިވެޓް ލިމިޓެޑާ ހަވާލުކުރުމުން އޭސީސީން އެދިގެން އެ މަސައްކަތް ހުއްޓާލަން ހައިކޯޓުން ނެރެދިން ވަގުތީ އަމުރާއި ގުޅިގެން ސުޕްރީމްކޯޓުގައި އިސްތިއުނާފުކުރި މައްސަލައަށް 2012 ވަނަ އަހަރު އެ ކޯޓުން ކުރި ހުކުމެވެ.
އެ ހުކުމުގައި ވާ ގޮތުން އޭސީސީގެ ފަރާތުން ދައުލަތުގެ އިދާރާތަކަށް އަންގާ އެފަދަ އިދާރީ އެންގުންތަކަށް އަމަލުކުރުން އެ އިދާރާތަކުގެ މައްޗަށް ގާނޫނީ ގޮތުން ލާޒިމްވެގެންވާކަމުގެ އިހްތިމާލެއް އޮތް ކަމަށް ހައިކޯޓުން ބުނި ނަމަވެސް އެފަދަ އިހްތިމާލެއް ވުޖޫދުގައި ނެތެވެ.
އުނގޫފާރު ދާއިރާގެ މެމްބަރު މުހައްމަދު ވަހީދުވެސް ވިދާޅުވީ އޭސީސީން މައްސަލަ ބެލި ނަމަވެސް ފްލެޓު ދިނުމުގެ މަސައްކަތް ހުއްޓުވަން އެ ކޮމިޝަނަކަށް ނޭންގޭނެ ކަމަށެވެ. އަދި ޖިނާއީ ތަހުގީގެއް ހިންގަން ފުރުސަތު ވެސް އޭސީސީއަށް ދެވިގެން ނުވާނެ ކަމަށާއި އެފަދަ ތަހުގީގެއް ހިންގުމުގެ ގާނޫނީ ބާރު އެ ކޮމިޝަނަށް ނުލިބޭތީ ކަމަށް ވިދާޅުވި އެވެ.
ކޮމިޓީގެ މުގައްރިރު ބާރަށު ދާއިރާގެ މެމްބަރު އަހުމަދު އަބްދުﷲ ވެސް ސުޕްރީމް ކޯޓުގެ އެ ރޫލިން އަށް ރިއާޔަތްކުރައްވައި ވިދާޅުވީ އެފަދަ ބާރެއް އޭސީސީއަށް ލިބިގެން ނުވާ ކަމަށެވެ. އެހެން އެކަން އޮތް އިރު އެ އެންގުމާއި އެއްގޮތަށް އަމަލުކުރަން ސަރުކާރުން ފުރުސަތު ދީފައި އޮތީ ކޮން އުސޫލަކުންތޯ އޭނާ މިނިސްޓަރާ ސުވާލުކުރެއްވި އެވެ.
"ގާނޫނާ ހިލާފު ނިންމުމެއް ކަމަށްވަންޏާ އެ ނިންމުމާ އެއްގޮތައް އަމަލުނުކޮށް ކުރިއަށްދާންޖެހޭނެ ކަމަށް އަޅުގަނޑު ގަބޫލުކުރަނީ. އެހެންވީމަ އެފަދައިން ކަނޑައަޅާފައިވާނަމަ، އެކަން(ފްލެޓް ދިނުން) ހުއްޓިފަ އޮވެގެން ނުވާނެ، ކުރިއަށްގެންދަންޖެހޭނެ. އެއީ ދިވެހި އެތައް ރައްޔިތެއްގެ ބޯހިޔާވަހިކަމާ ގުޅުންހުރި ހައްސާސީ މައްސަލައަކަށްވާތީވެ" އަހުމަދު އަބްދުﷲ ވިދާޅުވި އެވެ.
މިނިސްޓަރު ވިދާޅުވީ އޭސީސީގެ އެންގުމާ އެއްގޮތައް އެ މަަސައްކަތް ހުއްޓާލީ ކުރީ ސަރުކާރުން ކަމަށާއި މި ސަރުކާރުގެ ވިސްނުމަކީ އޭސީސީން އެފަދައިން އަންގާފައިވާތީ އެ އެންގުމަށް އިހުތިރާމުކުރުން ކަމަށެވެ.
