އިޒްރޭލާއި ހަމާސްއާ ދެމެދު ވެފައި އޮތް އެއްބަސްވުމުގެ ދަށުން ހަތަރު ދުވަހަށް ހަނގުރާމަ ހުއްޓާލާފައި އޮއްވައި ހުޅަނގު އައްސޭރީގެ ޖެނިންއަށް އިޒްރޭލުން ވަދެގަނެ ފަސް މީހުން ޝަހީދުކޮށްލައިފި އެވެ.
ޖެނިންއަށް އިޒްރޭލުން ވަދެގަނެފައި ވަނީ އަސްކަރީ އޮޕަރޭޝަނެއް ހިންގުމުގެ ނަމުގައި ރޭގެ ވަގުތެއްގައި ކުއްލިއަކަށެވެ. ގާތްގަނޑަކަށް 12 ގަޑިއިރަށް ދިގުދެމިގެންދިޔަ އެ އޮޕަރޭޝަނުގައި އިޒްރޭލު ސިފައިން ވަނީ ފަލަސްތީނުގެ ފަސް މީހުން ޝަހީދު ކޮށްލައި 18 މީހުން ޒަހަމުކޮށްލައިފަ އެވެ. އޭގެތެރެއިން ދެމީހުންގެ ހާލު ސީރިއަސް ކަމަށް ސިއްހީ އިދާރާތަކާ ހަވާލާދީ އަލްޖަޒީރާއިން ރިޕޯޓު ކޮށްފައިވެ އެވެ.
އެ އޮޕަރޭޝަންތަކުގައި ޒަހަމުވި މީހުންނަށް ސިއްހީ އެހީ ފޯރުކޮށްދިނުމަށް ވެސް އިޒްރޭލުން ހުރަސް އެޅި ކަމަށް ފަލަސްތީނުގެ ރެޑް ކުރެސެންޓާ ހަވާލާދީ އަލްޖަޒީރާގައި ރިޕޯޓުކޮށްފައިވެ އެވެ. އެގޮތުން އިޒްރޭލުން ދިން ހަމަލާއެއްގައި މެއަށް ވަޒަން އަރައި ޒަހަމުވި 18 އަހަރުގެ މަހުމޫދު އަބޫ ހައިޖާ މަރުވަންދެން ކުއްލި ފަރުވާ ފޯރުކޮށްދިނުމަށް އިޒްރޭލުން ހުރަސްއެޅި ކަމަށް ރެޑް ކުރެސެންޓުން ބުނެފައިވެ އެވެ.
އެ އޮޕަރޭޝަނުގައި އިޒްރޭލު ސަފައިން ވަނީ ޖެނިންގެ އެންމެ ބޮޑު ދެ ހޮސްޕިޓަލް ވަށާލައި އެތަނުގެ އެމްބިއުލޭންސްތައް ފާސްކޮށްފަ އެވެ. އެ އޮޕަރޭޝަނުގައި އެމްބިއުލޭންސްތަކުގައި މަސައްކަތް ކުރާ ދެ މީހުން އިޒްރޭލުން އަސީރު ކުރި އެވެ.
އިޒްރޭލުން ހަމާސްއާ ވެފައިވާ އެއްބަސްވުމުގެ ދަށުން ހަމަލާދިނުން ހުއްޓާލައިފައި ވަނީ ގާޒާއަށެވެ. ޖެނިންގައި ރޭގައި އިޒްރޭލުން ހިންގި ފަދަ އޮޕަރޭޝަންތަކަކީ ހަނގުރާމައިގެ ކުރިން ވެސް އިޒްރޭލުން އާންމުކޮށް ހިންގާ ޖަރީމާތެކެކެވެ. އިޒްރޭލުގެ ޖަލުތަކުގައި ތިބި ގިނަ ފަލަސްތީނީންނަކީ ފަލަސްތީނުގެ އަވަށްތަކަށް އެގޮތަށް ވަދެގަނެ އިޒްރޭލުން އަސީރުކޮށްފައިވާ މީހުންނެވެ. އާންމުކޮށް އިޒްރޭލުން އަސީރު ކުރާ ފަލަސްތީނީންނަކީ ފަލަސްތީނުގެ މިނިވަން ދައުލަތެއް ގާއިމުކުރުމުގެ ވިސްނުން ފާޅުކޮށް، އިޒްރޭލާ ދެކޮޅު ޝުއޫރު ފާޅު ކުރާ މީހުންނެވެ.
ހުޅަނގު އައްސޭރިއަށް ވަދެގަނެ އިޒްރޭލުން އަސްކަރީ އޮޕަރޭޝަނެއް ހިންގާފައި ވާއިރު، ހަނގުރާމަ މެދުކަނޑައިލުމަށް އިޒްރޭލުން ވި އެއްބަސްވުމާ އެއްގޮތަށް މިނިވަން ކުރި ފަލަސްތީނީންނަށް މަރުހަބާ ކިޔުމުގެ ހަރަކާތްތަކެއް ފާއިތުވި ދެ ހަފުތާގެ ތެރޭގައި ވަނީ ކުރިއަށް ގެންގޮސްފަ އެވެ. އެ ހަރަކާތްތަކުގެ ތެރޭގައި ބައެއް ފަލަސްތީނީން ވަނީ ހަމާސްއަށް ތާއީދުކޮށް ހަމާސްގެ ދިދަ ވެސް ވިހުރުވައިފަ އެވެ.
