ގާޒާގެ ރައްޔިތުންގެ ސިއްހީ ހިދުމަތުން މަހުރޫމުކުރަން އިޒްރޭލުން ހިންގާ ޖަރީމާ ފުޅާކޮށް، އިންޑޮނީޝިއަން ހޮސްޕިޓަލުގައި ތިބި މީހުން އެތަނުން ނެރެން ފަށައިފި އެވެ.
ފަލަސްތީނުގެ ހެލްތު މިނިސްޓްރީގެ އޮފިޝަލަކާ ހަވާލާދީ އަލްޖަޒީރާ ނޫހުން ބުނީ އިންޑޮނީޝިއަން ހޮސްޕިޓަލްގައި ތިބި މީހުން އެތަނުން ނުކުންނަން އިޒްރޭލު ސިފައިން ދިނީ އެންމެ ހަތަރުގަޑި އިރުގެ މުހުލަތެކެވެ. އަލްޖަޒީރާ ބުނި ގޮތުގައި އެ އެޖެންސީއަށް މައުލޫމާތު ދެއްވި އޮފިޝަލް ހުންނެވީ ހޮސްޕިޓަލުގެ އެތެރޭގަ އެވެ.
އިޒްރޭލުން ކެނޑިނޭޅި ބޮން އަޅައި ގާޒާގެ ގިނަ އިމާރާތްތައް ބިމާހަމަކުރަމުން ދާއިރު އެ ހަމަލާތަކުން ދިފާއުވާން އާންމުންގެ އެތައް ސަތޭކަ ބަޔަކު ގޮސް ތިބީ އެރަށުގެ ހޮސްޕިޓަލްތަކުގަ އެވެ. އެ ހޮސްޕިޓަލްތަކުގެ ވަށައިގެންވާ ސަރަހައްދުތަކަށް ބޮން އެޅުމަށް ފަހު އިޒްރޭލު ސިފައިން ގާޒާއަށް ވަދެގަނެ، ފުރަތަމަ ވެސް ހަމަލާ ދިނީ ހޮސްޕިޓަލްތަކަށެވެ.
ހޮސްޕިޓަލްތައް ހުއްޓުވަން ހިންގާ ޖަރީމާގައި އިޒްރޭލު ސިފައިން ވަނީ އައް ޝިފާ ހޮސްޕިޓަލް އެމީހުންގެ ބާރުގެ ދަށަށް ގެންފޮސްފަ އެވެ. އެ ހޮސްޕިޓަލަށް އިޒްރޭލު ސިފައިން ވަދެގަތްފަހުން، 100 މީހެއްގެ ހަށިގަނޑު ނެރެފައި ވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
އޮކްޓޯބަރު 7، ގައި ހަނގުރާމަ އިއުލާނުކޮށް މެދުކެނޑުމެއްނެތި ދެމުންދާ ހަމަލާތަކުގައި ހުކުރު ދުވަހާ ހަމައަށް ގާޒާއިން މަރުވި މީހުންގެ އަދަދު ވަނީ 14،500 އަށްވުރެ މައްޗަށް އަރާފަ އެވެ. އޭގެ ތެރޭގައި 5،600 އަށް ވުރެ ގިނަ ކުޑަކުދިން ހިމެނެ އެވެ.
