އިޒްރޭލު ސފިައިން، އުތުރު ގާޒާގައި ހުންނަ އެންމެ ބޮޑު ހޮސްޕިޓަލު ކަމަށްވާ އަލް ޝިފާ ހޮސްޕިޓަލުގެ ޑިރެކްޓަރު ޑރ. މުހައްމަދު އަބޫ ސަލްމިޔާ އަދި އެ ހޮސްޕިޓަލުގެ ގިނަ އަދަދެއްގެ ޑޮކްޓަރުން އަސީރުކޮށްފި އެވެ.
ނަމަވެސް, އެ ފަރާތްތައް އަސީރު ކުރި ސަބަބެއް އިޒްރޭލު ސިފައިން ދީފައި ނުވާ ކަމަށް އެ ހޮސްޕިޓަލުގެ ޑޮކްޓަރަކާ ހަވާލާދީ އަލްޖަޒީރާއިން ވަނީ ރިޕޯޓުކޮށްފަ އެވެ.
އުތުރު ގާޒާއަށް އެއްގަމު މަގުން އަރައިގެން އިޒްރޭލު ސިފައިން ޝިފާ ހޮސްޕިޓަލަށް ވަދެގަތީ މި މަހުގެ 15 ގަ އެވެ. ވަދެގަނެފައިވަނީ އެ ހޮސްޕިޓަލަކީ ހަމާސްގެ މައި މަރުކަޒެއް ހިންގާ ތަނެއް ކަމަށް ބުނެ އެވެ. ނަމަވެސް މިވީ ތިން ދުވަހުގެ ތެރޭގައި އިޒްރޭލަށް އެ ހޮސްޕިޓަލުން އެކަށީގެންވާ ހެއްކެއް ހޯދިފައެއް ނުވެ އެވެ.
އެއަށްފަހު މި މަހު 18 ގައި އިޒްރޭލުން ވަނީ އެ ހޮސްޕިޓަލު އެކީގައި ހުސްކުރުމަށް ގަޑީރެއްގެ މުހުލަތުވެސް ދީފަ އެވެ. ނަމަވެސް އެ ދުވަހު އިޒްރޭލުން ހޮސްޕިޓަލަށް މާ ވަރުގަދަ ހަމަލާތަކެއް ނުދެ އެވެ.
އެ ދުވަހު ޝިފާ ހޮސްޕިޓަލުގެ އިސް އޮފިޝަލަކު އަލް ޖަޒީރާއަށް ވިދާޅުވި ގޮތުގައި، ފަރުވާ ހޯދަން ވަދެ ތިބި މީހުންނާއި އިޒްރޭލުން ކެނޑިނޭޅި ދޭ ހަމަލާތަކުން ހިމާޔަތް ހޯދަން ވަދެ ތި މީހުންނާ އެކު ޖުމްލަ 7،500 އަށްވުރެ ގިނަ މީހުން އެ ހޮސްޕިޓަލުގައި އެބަތިއްބެވެ. އޭގެ ތެރޭގައި ހާލު ބޮޑު 300 އެއްހާ ބަލިމީހުން ވެސް ހިމެނެ އެވެ.
މިދިޔަ ހަފުތާގެ ތެރޭގައި އެ ހޮސްޕިޓަލާއި ބެއިތު ހަނޫން ހޮސްޕިޓަލަށް ދިން ހަމަލާތަކުގައި ޝަހީދުވި 100 އަށްވުރެ ގިނަ މީހުން އިއްޔެ ވަނީ ގާޒާގައި އެއް ވަޅެއްގައި ވަޅުލާފަ އެވެ. އޭގެ ތެރެއިން ގިނަ މީހުންނަކީ ކޮން ބައެއްކަން ދެނެގަނެވިފައިނުވާ ކަމަށް މީޑިއާ ރިޕޯޓުތައް ބުނެ އެވެ.
މިދިޔަ މަހުގެ ހަތެއްގައި ހަނގުރާމަ އިއުލާނުކޮށް މެދުކެނޑުމެއްނެތި ދެމުންދާ ހަމަލާތަކުގައި ހުކުރު ދުވަހާ ހަމައަށް ގާޒާއިން މަރުވި މީހުންގެ އަދަދު ވަނީ 14،500 އަށްވުރެ މައްޗަށް އަރާފަ އެވެ. އޭގެ ތެރޭގައި 5،600 އަށް ވުރެ ގިނަ ކުޑަކުދިން ހިމެނެ އެވެ.
ރަސްމީ ހިސާބުތައް ދައްކާގޮތުން މި ހަމަލާތަކުގެ ފުރަތަމަ މަހު އިޒްރޭލުން ވަނީ ދުވާލަކަށް އެވްރެޖުކޮށް 320 މީހުން މަރާލާފަ އެވެ. ހަމާސް ޖަމާއަތާ ދެކޮޅަށް ކަމަށް ބުނެ ދޭ މި ހަމަލާތަކުގައި މަރުވާ މީހުންގެ 98 އިންސައްތަ އަކީ އާންމުންނެވެ. އޭގެ ތެރެގައި ގިނަ އަދަދެއްގެ ކުޑަކުދިން ހިމެނެ އެވެ. ހަމަލާތަކުގައި ޒަހަމްވި މީހުންގެ އަދަދު އުޅެނީ 27،500 އިން މަތީގަ އެވެ.
