ހަނގުރާމަ މެދުކަނޑާލަން ނިންމުމުން އިޒްރޭލުގެ ސިޔާސީންގެ ކަންބޮޑުވުން

ފަލަސްތީނުގައި ކުރިއަށްދާ ހަނގުރާމަ ހަތަރު ދުވަހަށް މެދުކަނޑާލަން އިޒްރޭލުގެ ބޮޑުވަޒީރު ހަމާސްއާއެކު އެއްބަސްވުމަކަށް އައުމުން އިޒްރޭލުގެ ސަރުކާރުގެ ބައެއް އިސްވެރިންނާއި ސިޔާސީން ކަންބޮޑުވުން ފާޅުކޮށްފި އެވެ.

އިޒްރޭލުގެ ބައެއް ކެބިނެޓު މިނިސްޓަރުން ވެސް ހިމެނޭހެން މީސްމީޑިއާއާއި އެހެނިހެން ޕްލެޓުފޯމުތަކުގައި ފާޅުކުރަމުންދާ ކަންބޮޑުވުންތަކުގައި އެމީހުން ބުނެފައި ވަނީ ހަނގުރާމަ ހުއްޓާލަން އެއްބަސްވުމަކީ ހަމާސްގެ ހަމަލާތައް އިތުރަށް ވަރުގަދަވެ ހިންދެމިލަން ދެވޭ ފުރުސަތެއް ކަމަށެވެ.

ހަތަރު ދުވަހަށް ހަނގުރާމަ ހުއްޓައިލަން އިޒްރޭލާއި ހަމާސްއިން އެއްބަސްވުމަކަށް އައިސްފައި ވަނީ ގަތަރު މެދުވެރިކޮށް ކުރަމުން ގެންދިޔަ މަޝްވަރާގެ ތެރެއިންނެވެ. ހަނގުރާމަ މެދުކަނޑައިލާނެ ވަގުތެއްގެ ގޮތުގައި ކަނޑައަޅާފައި ވަނީ ރާއްޖެ ގަޑިން ހެނދުނު 7:00 އެވެ. ނަމަވެސް އެ ވަގުތަށް ހަނގުރާމަ ހުއްޓައިނުލައިފާނެ ކަމުގެ އިޝާރާތްތަކެއް އިޒްރޭލުގެ އަސްކަރިއްޔާއާ ހަވާލީދީ އިޒްރޭލު މީޑިއާތަކުން ވަނީ ދީފަ އެވެ.

ހަނގުރާމަ މެދުކަނޑައިލަންވި އެއްބަސްވުމުގައި؛

• ހަތަރު ދުވަހަށް ހަނގުރާމަ މެދުކަނޑައިލާނެ
• އޮކްޓޫބަރު 7 ވަނަ ދުވަހު ހަމާސްއިން ރަހީނު ކުރި 237 ޔަހޫދީންގެ ތެރެއިން 50 މީހުން މިނިވަން ކުރާނެ
• އިޒްރޭލު ޖަލުތަކުގައި ތިބި 8200 ފަލަސްތީނީންގެ ތެރެއިން 150 މީހުން މިނިވަން ކުރާނެ
• އިތުރަށް ހަމާސްއިން މިނިވަން ކުރާ ކޮންމެ 10 އަސީރަކަށް އިތުރު އެއް ދުވަސް ހަނގުރާމަ ހުއްޓާލައިފައި ބާއްވާނެ
• ގާޒާއަށް ވަދެގަނެފައިވާ އިޒްރޭލުގެ އަސްކަރީ ޓޭންކުތަކާއި ފައުޖުތައް އެ ސަރަހައްދު ދޫކޮށް ނުނިކުންނާނެ
• އެ މުއްދަތުގައި އިންސާނީ އެހީގެ ގާފިލާތަކަށް އެއްވެސް ހުރަހެއް ނެތި ގާޒާއަށް ވަދެވޭނެ
• އިޒްރޭލުގެ ޖާސޫސީ ޑުރޯންތައް ގާޒާގެ މަތިން އުދުއްސުން ކޮންމެ ދުވަހަކު ހަ ގަޑިއިރަށް މެދުކަނޑައިލަން ޖެހޭނެ

ހަނގުރާމަ ހުއްޓައިލުމަށްވި އެއްބަސްވުމަށް އެންމެ ބޮޑަށް ފާޑު ކިޔާފައި ވަނީ އިޒްރޭލުގެ ނެޝަނަލް ސެކިއުރިޓީ މިނިސްޓަރު, އިތަމާ ބެން ގްވިރް އެވެ. އެކްސްގައި އޭނާ ކުރި ޕޯސްޓެއްގައި ބުނެފައި ވަނީ މިއީ ހަމާސްއިން ބޭނުންވި ގޮތް ކަމަށާއި ހަނގުރާމަ މެދުކަނޑައިލުމުން އެމީހުންގެ ހަމަލާތައް އިތުރަށް ވަރުގަދަ ކުރުމުގެ ދޮރު ހުޅުވިގެންދާނެ ކަމަށެވެ.

އަދި މިއީ 2011 ވަނަ އަހަރު އިޒްރޭލުން އެޅި ކަހަލަ ޅަ އެއްޗެއް ކަމަށް ވެސް އޭނާ ބުނެފައިވެ އެވެ.

2011 ވަނަ އަހަރު ހަމާސްއިން ރަހީނު ކުރި އިޒްރޭލު ސިފައިންގެ މީހެއްގެ ބަދަލުގައި އިޒްރޭލުގެ ޖަލުތަކުގައި ތިބި 1000 ފަލަސްތީނީން މިނިވަން ކުރި އެވެ.

ބެން ގްވިރް އިތުރަށް ބުނެފައި ވަނީ އިޒްރޭލުގައި މާބޮޑު އެއްބައިވަންތަކަމެއް އޮތް ކަމަށް ގަބޫލު ނުކުރާ ކަމަށާއި ހަނގުރާމަ ހުއްޓައިލުމަށް ނިންމި ނިންމުމުގެ ސަބަބުން ލިބޭ ގެއްލުން އަންނަން އޮތް ޖީލުތަކަށް ދެމިގެންދާނެ ކަމަށެވެ.

ހަނގުރާމަ ހުއްޓައިލުމަށް ނިންމި ނިންމުމާ މެދު ކަންބޮޑުވުން ފާޅު ކުރަމުން އިޒްރޭލުގެ ސެޓުލްމެންޓުސް އެންޑު ނެޝަނަލް މިޝަންސް މިނިސްޓަރު، އޯރިޓް ސްޓްރޮކް ބުނެފައި ވަނީ ކެބިނޭތު ބައްދަލުވުމުގައި އެ އެއްބަސްވުން ފާސް ކުރުމަށް ވޯޓު ދިނީ ރުހުމުގައި ނޫން ކަމަށާއި އެކަން އޮގޮތަށް ކުރެވުނީ އޮތް މަޖުބޫރީ ހާލަތެއްގެ ސަބަބުން ކަމަށެވެ.

ހަނގުރާމަ ހުއްޓައިލުމަށްވި އެއްބަސްވުމުގެ ސަބަބުން އިއާދަ ނުކުރެވޭ ވަރުގެ ގެއްލުން ލިބޭނެ ކަމަށް ބުނެ އިޒްރޭލުގެ އަލްމަގޯ ޓެރާ ވިކްޓިމްސް އެސޯސިއޭޝަނުން ވަނީ އިޒްރޭލުގެ ހައި ކޯޓަށް މައްސަލައެއް ވެސް ހުށަހަޅައިފަ އެވެ. ނަމަވެސް އެ މައްސަލަ ވަނީ އެ ކޯޓުން ބަލައިނުގަނެ ބޭރު ކޮށްލައިފަ އެވެ.

އޮކްޓޯބަރު 7، ގައި ފެށި ހަނގުރާމައަށް ދޮޅު މަސް ވާން ގާތްވެފައިވާއިރު މިހާތަނަށް އިޒްރޭލުގެ ހަމަލާތަކުގައި ފަލަސްތީނުގެ 14،000 އަށްވުރެ ގިނަ މީހުން ވަނީ މަރާލައިފަ އެވެ. އޭގެތެރެއިން 5600 ކުޑަކުދިން ވެސް ހިމެނެ އެވެ.

ވައިގެ ހަމަލާތަކުގެ އިތުރުން އިޒްރޭލުން ގާޒާގެ އުތުރަށް ވަނީ ވަދެގަނެފަ އެވެ. ޓޭންކަރުތަކާއި އެއްގަމު ސިފައިން ބޭނުންކޮށްގެން އިޒްރޭލު އަސްކަރިއްޔާއިން ދަނީ އުތުރު ގާޒާ ސުންނާފަތި ކުރަމުންނެވެ