ދޯހާ, ގަތަރު (ނޮވެމްބަރު) - އަންނަ އަހަރުގެ ޖެނުއަރީ މަހު ގަތަރުގައި ބޭއްވުމަށް ހަމަޖެހިފައިވާ އޭޝިއަން ކަޕް 2023ގެ ޓިކެޓު ވިއްކައިގެން ލިބޭ ހުރިހާ ފައިސާއެއް ފަލަސްތީނަށް ހަދިޔާކުރަން ގަތަރުން ނިންމައިފި އެވެ.
ގަތަރުގައި މުބާރާތް ހިންގާ އޯގަނައިޒިން ކޮމެޓީން ބުނީ ފަލަސްތީނާ ދެކޮޅަށް އިޒްރޭލުން ދެމުންދާ ހަމަލާތަކާ ގުޅިގެން ގާޒާގައި ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން، އޭޝިއަން ކަޕްގެ މެޗުތަކަށް ޓިކެޓު ވިއްކައިގެން ލިބޭ ފައިސާ ފަލަސްތީނަށް ހަދިޔާކުރަން ނިންމާފައިވާ ކަމަށެވެ.
"ފަލަސްތީނަށް އެހީވުމަށް ކުރިއަށް ގެންދާ ހަރަކާތްތަކަށް އޭޝިއަން ކަޕްގެ ޓިކެޓު ވިއްކައިގެން ލިބޭ ފައިސާ ހަދިޔާކުރަން ވާނީ ނިންމައިފަ،" ކޮމެޓީގެ ޗެއާމަން ބުންޏެވެ.
ހަމާްސް އާއި އިޒްރޭލާ ދެމެދު ހިނގަމުންދާ ހަނގުރާމަ ފެށުނީ މިދިޔަ މަހުގެ ކުރީކޮޅުއެވެ. ހަމާސްއާ ދެކޮޅަށް ކުރަމުންދާ ހަނގުރާމައެއްގެ ނަމުގައި، އިޒްރޭލުން ދަނީ ހުއްޓުމެއް ނެތި ގާޒާ ހަމަލާތައް ދެމުންނެވެ. މި ހަމަލާތަކުގެ ސަބަބުން ފަލަސްތީނުގެ އެތައް ހާސް ރައްޔިތުން މަރުވެ، އެތައް ހާސް ބަޔަކު ވަނީ ހާލުގައި ޖެހިފައެވެ.
ގަަތަރުގެ ސަރުކާރުން ވަނީ ފަލަސްތީނުގެ ރައްޔިތުންނަށް ބޮޑެތި އެހީތަކެއް ފޯރުކޮށްދީފައެވެ. ގަތަރުން ދިން އެހީ ގާޒާ އަށް ފޯރުކޮށްދިނީ މިސްރު މަގުންނެވެ.
މި އަހަރު ބާއްވަން އޮތް އޭޝިއަން ކަޕް ޖެނުއަރީ އަށް ފަސްކުރީ ގަތަރުގެ މޫސުމާއި 2023 ވަނަ އަހަރުގެ ގޯލްޑް ކަޕްގައި ގަތަރު ބައިވެރިވާތީއެެވެ. ފީފާ ވޯލްޑް ކަޕް 2022 ވަނަ އަހަރު ހޯސްޓްކުރި ގަތަރުގައި އޭޝިއަން ކަޕް ކުރިއަށްދާނީ ޖެނުއަރީ މަހުގެ 12 އިން ފެބްރުއަރީ މަހުގެ 10 ވަނަ ދުވަހަށެވެ.
