ކަޓަލޫނިއާ، ސްޕެއިން (ޖެނުއަރީ 31) - ފަލަސްތީނުގައި ހިނގަަމުން އަންނަ ލާއިންސާނީ ކަންތައްތަކާ ދެކޮޅަށް ދުނިޔޭގެ ގިނަ ބަޔަކު ވަނީ ފަލަސްތީނުގެ އަޑުއެހުން ހުއްޓާލައިފައި ކަމަށާއި އެކަމަކު، އޭނާ އަކީ އަބަދުވެސް ފަލަސްތީނުގެ ހައްގުގައި ބަސްބުނާނެ މީހެއް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
މީގެ ކުރިން ވެސް ތަކުރާރުކޮށް އެކި އިވެންޓްތަކުގައި ގާޑިއޯލާ ވަނީ ފަލަސްތީނުގެ ހައްގުގައި އަޑުއުފުލައިފަ އެވެ. އެންމެ ފަހުން، އޭނާ އެކަން ކޮށްފައިވަނީ، މިދިޔަ ބުރާސްފަތި ދުވަހުގެރޭ ކެޓަލޫނިއާ ސަރަހައްދުގެ އިވެންޓެއްގެ ތެރެއިންނެވެ.
ގާޑިއޯލާ ބުނީ، އިޒްރޭލާއި ފަލަސްތީނުގެ ކަންކަމުގައި ބައެއް މީހުން ބުނާހެން ވަކިކޮޅަކަށް ބުރަނުވެ ހުރި މީހެއް ގޮތަށް އޭނާ ހުންނަން ބޭނުންނުވާ ކަމަށާއި އޭނާ އަކީ ފަލަސްތީނުގެ ސަޕޯޓަރެއް ކަމަށެވެ.
"މިދިޔަަ ދެ އަހަރު އަހަންނަށް ފަލަސްތީނުގެ ކޮންމެ މީހެއްގެ ވެސް މެެސެޖެއްގެ ގޮތުގައި ލިބެނީ، ސޯޝަލް މީޑިއާ އިން ވެސް ފެންނަނީ، އަހަރެމެން ގާތުގައި އެހީވާން އަންނާށޭ ބުނާތަން، އެ މަންޒަރުތައް، ދެން ފެންނަނީ، މަރުވެފައި ތިބި ކުޑަކުދިންގެ ވީޑިއޯ އާއި ފޮޓޯ. މި ކަންކަން މިހެން ފެންނާތީވެ، އަހަންނަށް ހީވަނީ އަހަރެމެން މި ތިބީ އެ މީހުން ދޫކޮށްލައިގެންނޭ،" ގާޑިއޯލާ ބުންޏެވެ.
"ޔަގީންކަމެއް، އަހަރެން މި އަޑު އުފުލުމެއް ހުއްޓައެއް ނުލާނަން. އެހީވެސް ވެވެން އޮތް ގޮތަކަށް ވާނަން. އަހަރެން މި ހުރީ ފަލަސްތީނާ އެކު،"
މީގެ ކުރިން، ސްޕެއިނުގެ އާރްއޭސީ1 އަށް ދިން އިންޓަވިއުއެއްގައި ގާޑިއޯލާ ބުނީ، ދުނިޔޭގެ ގިނަ ބަޔަކު ފަލަސްތީނުގެ މަތިން ހަނދާން ނުކުރުމަކީ އަނިޔާއެއް ކަމަށެވެ.
"ދުނިޔޭން ފަލަސްތީނު މަތިން ހަނދާން ނައްތާލައިފިހެން ކަންކަން އޮތީ، އަހަރެމެންނަށް ކުރެވުނު އެއްވެސް ކަމެއް ނެތް. ފަލަސްތީނު މީހުންގެ ކުށެއް ނޫން އެ ތަނަށް އެ މީހުން އުފަންވުމަކީ، އަހަރެން މި ތިބީ ތަނެއް ނެތިކޮށްލަން ދެން ބަލަހައްޓައިގެން. ގައްޒާގައި އެ ހިނގާ ލާއިންސާނީ އަމަލުތަކުގެ ދިފާއުގައި ވާހަކަ ދެއްކޭނެ އެކަކު ވެސް ހުންނާނެ ކަމަށް އަހަންނެއް ގަބޫލެއް ނުކުރަން. އަހަރެމެންގެ ދަރިން ވެސް ތަނަށް އުފެންވެފައި ހުރިނަމަ މަރުވާނެ. އަހަންނަށް އޮތީ ގައުމުތަކުގެ ލީޑަރުންނަށް ވަރަށް ކުޑަ އުންމީދެއް، ބާރުގައި ހުންނަން އެ މީހުން ކޮންމެ ފަދަ ކަމެއް ވެސް ކޮށްފާނެ،" ގާޑިއޯލާ ބުންޏެވެ.
އިޒްރޭލުން ފަލަސްތީނަށް އަރައި ދެމުން އަންނަ ގެއްލުންތައް ހުއްޓުވަން ކުރާ މަސައްކަތުގައި އެކި ގައުމުތަކުގެ އާންމުން އެ ގައުމެއްގެ ސަރުކާރަށް ޕްރެޝަރުކުރަންޖެހޭ ކަމަށް ވެސް މީގެ ކުރިން ގާޑިއޯލާ ވަނީ ބުނެފަ އެވެ.
