އޮކްޓޯބަރު 7، އިން ފެށިގެން އިޒްރޭލުން ފަލަސްތީނަށް ދެމުންދާ ހަމަލާތައް ހަތަރު ދުވަހުގެ މުހުލަތަކަށް ވަގުތީ ގޮތުން މެދުކަނޑާލަން ހަމާސް އަދި އިޒްރޭލުން އެއްބަސްވެއްޖެ އެވެ.
މި އެއްބަސްވުމަކީ ގަތަރު މެދުވެރިވެގެން އިޒްރޭލް އަދި ފަލަސްތީނުގެ އޮތޯރިޓީއާއެކު ކުރިއަށް ގެންދިޔަ މަޝްވަރާތަކުގެ ތެރެއިން އާދެވުނު އެއްބަސްވުމެކެވެ. ގަތަރުގެ ފޮރިން މިނިސްޓްރީން ނެރުނު ބަޔާނެއްގައި ބުނީ ހަމަލާތައް ހުއްޓާލުން ފަށާ ވަގުތު ކުރިއަށް އޮތް 24 ގަޑީރުގެ ތެރޭގައި ހާމަކުރާނެ ކަމަށެވެ.
ހަމާސްއިން މި އެއްބަސްވުމަށް ފެހި ސިގްނަލް ދިނީ އިއްޔެ އެވެ. އިޒްރޭލުން ހަމަލާތައް ހުއްޓާލުމަށް ރަސްމީކޮށް އެއްބަސްވީ މިއަދު ބޭއްވި ވަޒީރުންގެ މަޖިލީހުން އެކަމަށް ފާސްކޮށްގެންނެވެ.
ގަތަރުން ބުނާ ގޮތުގައި މި އެއްބަސްވުމުގެ ދަށުން އޮކްޓޯބަރު 7، ގައި ހަމާސްއިން ހައްޔަރު ކުރި އިޒްރޭލުގެ 50 ކުޑަކުދިންނާއި އަންހެނުން މިނިވަންކުރާނެ އެވެ. އަދި ބަދަލުގައި އިޒްރޭލުގެ ޖަލުތަކުގައި ތިބި ފަލަސްތީނުގެ ކުޑަކުދިންނާއި އަންހެނުންވެސް މިނިވަންކުރާނެ އެވެ.
"މި އެއްބަސްވުމުގެ ދަށުން ހަމަލާތައް މެދުކަނޑާލުމުގެ އިތުރުން، ގާޒާގެ ހުރިހާ ސަރަހައްދަކަށް އެހީގެ އުޅަނދުތައް ވަދެވޭނެ މަގު ފަހިކޮށްދިނުމުގެ ފުރުސަތާއި އަނިޔާވެފައިވާ މީހުން އެހެން ގައުމުތަކަށް ފަރުވާއަށް ފޮނުމުވުގެ ފުރުސަތުވެސް ލިބިގެންދާނެ" އިއްޔެ ގަތަރުގެ އަލް ޖަޒީރާއަށް މައުލޫމާތު ދިން ހަމާސްގެ އިސް އޮފިޝަލަކު ބުނެފައިވެ އެވެ.
އޮކްޓޯބަރު 7، ގައި ފެށި ހަނގުރާމައަށް ދޮޅު މަސް ވާން ގާތްވެފައިވާއިރު މިހާތަނަށް އިޒްރޭލުގެ ހަމަލާތަކުގައި ފަލަސްތީނުގެ 14،000 އަށްވުރެ ގިނަ މީހުން ވަނީ މަރާލައިފަ އެވެ. އޭގެތެރެއިން 5600 ކުޑަކުދިން ވެސް ހިމެނެ އެވެ.
ވައިގެ ހަމަލާތަކުގެ އިތުރުން އިޒްރޭލުން ގާޒާގެ އުތުރަށް ވަނީ ވަދެގަނެފަ އެވެ. ޓޭންކަރުތަކާއި އެއްގަމު ސިފައިން ބޭނުންކޮށްގެން އިޒްރޭލު އަސްކަރިއްޔާއިން ދަނީ އުތުރު ގާޒާ ސުންނާފަތި ކުރަމުންނެވެ.
