އިޒްރޭލަށް ހަތިޔާރު ވިއްކުން މިހާރުން މިހާރަށް ހުއްޓައިލުމަށް ސައުދީ އަރަބިއްޔާގެ ވަލީއަހުދު، މުހައްމަދު ދުނިޔޭގެ ހުރިހާ ގައުމުތަކަށް ގޮވައިލައްވައިފި އެވެ.
އިޒްރޭލާއި ހަމާސްއާ ދެމެދު ހިނގަމުންދާ ހަނގުރާމައަށް ހައްލެއް ހޯދުމަށްޓަކައި ކުރިއަރަމުން އަންނަ ބޮޑެތި އިގުތިސާދުތަކުގެ މައްޗަށް އެކުލެވޭ، ބްރިކްސް (ބްރެޒިލް، ރަޝިޔާ، ޗައިނާ، ސައުތު އެފްރިކާ) ގެ ލީޑަރުން އިއްޔެ ބޭއްވެވި ބައްދަލުވުމުގައި ވާހަކަ ދައްކަވަމުން ވަލީއަހުދު މުހައްމަދު ވިދާޅުވީ ސައުދީ އަރަބިއްޔާއިން ގޮވައިލަނީ 1967 ގެ ބޯޑަރުތަކަށް ރުޖޫއަވެ، ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ކަމަށެވެ.
ބައިނަލްއަގުވާމީ މުޖުތަމައުތަކުން ދެ ދައުލަތުގެ ހައްލު ގަބޫލުކޮށްގެން މެނުވީ ފަލަސްތީނަށް ރައްކާތެރިކަމާއި ހަމަޖެހުން ގެނެވޭނެ އެއްވެސް މަގެއް ނެތް ކަމަށާއި ސައުދީ އަރަބިއްޔާގެ ރައުޔަކީ އެއީ ކަމަށް އެމަނިކުފާނު ވިދާޅުވި އެވެ.
ހަތަރު ގައުމުގެ މައްޗަށް އެކުލެވޭ ބްރިކްސްގައި ބައިވެރިވުމަށް ސައޫދީ އަރަބިއްޔާއަށް ދައުވަތު ދިނީ މި އަހަރުގެ ކުރީކޮޅު އެވެ.
ހަނގުރާމަ ފެށުނީއްސުރެ މިއަދާ ހަމައަށް ގާޒާގެ ރައްޔިތުންނަށް ރައްކާތެރިކަން ހޯދައިދިނުމަށް މަސައްކަތް ކުރެއްވި ކަމަށް ވިދާޅުވެ، ވަލީއަހުދު، މުހައްމަދު ވަނީ އިޒްރޭލުން ގާޒާގައި ހިންގަމުންދަނީ އަނިޔާވެރި ޖަރީމާތަކެއް ކަމަށް ސިފަ ކުރައްވައިފަ އެވެ.
އިޒްރޭލު އަސްކަރިއްޔާއިން ހަމާސްއާ ދެކޮޅަށް ހަނގުރާމަ އިއުލާނުކޮށް ފަލަސްތީނުގެ ނަސްލު ނައްތައިލުމުގެ މަސައްކަތް ފެށީ މިދިޔަ އޮކްޓޯބަރު 7 ގައި ހަމާސްއިން އިޒްރޭލަށް ދިން ކުއްލި ހަމަލާއާ ގުޅުވައިގެން އެވެ.
އިޒްރޭލުގެ ހަމަލާތަކުގައި މިހައިތަނަށް ފަލަސްތީނުގެ 13،000 މީހުން ޝަހީދުވެ އެތައް ހާސް ބަޔަކު ވަނީ ޒަހަމުވެފަ އެވެ. ޝަހީދުވި މީހުންގެ ބޮޑު ބަޔަކީ ކުޑަކުދިންނާއި އަންހެނުންނެވެ.
