ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އެކްސްޓްރާ އޯޑިނަރީ ކޮންގްރެސްއެއް އަންނަ ހުކުރު ދުވަހު ބޭއްވުމަށް ތާވަލުކޮށްފި އެވެ.
އާ އިންތިހާބެއް ބާއްވަން ތައްޔާރުވަމުން އަންނަ ވީއޭއެމުން އެކްސްޓްރާ އޯޑިނަރީ ކޮންގްރެސްއެއް ބާއްވަން ނިންމާފައި މިވަނީ މެންބަރު ކުލަބުތަކުގެ އެދުމުގެ މަތިންނެވެ. އެސޯސިއޭޝަނުގެ މެންބަރު 18 ކުލަބުގެ ތެރެއިން 11 ކުލަބަކުން ސޮއިކޮށް، އެކްސްޓްރާ އޯޑިނަރީ ކޮންގްރެސްއެއް ބާއްވައި ދިނުމަށް ވީއޭއެމްގައި އެދުނީ މިދިޔަ ހަފްތާގަ އެވެ.
ވޮލީބޯޅަ އެސޯސިއޭޝަންގެ އަހަރީ އާންމު ޖަލްސާ ނުބާއްވާތާ ތިން އަހަރު ފަހުން މިމަހުގެ ތިން ވަނަ ދުވަހު ވަނީ ޖަލްސާ ބާއްވާފަ އެވެ. މި ޖަލްސާގައި އެ އިދާރާގެ އަސާސީ ގަވާއިދަށް ބަދަލުތަކެއް ގެނެސް، އާ އިންތިހާބެއް ބާއްވަން ވަނީ ފާސްކޮށްފަ އެވެ.
ވީއޭއެމުގެ އަހަރީ އާންމު ޖަލްސާގައި ނިންމާފައި އޮތީ 10 ދުވަހުގެ ތެރޭގައި އާ އިންތިހާބު ބޭއްވުމަށެވެ. ނަމަވެސް އެ މުއްދަތު ހަމަވެފައިވާތީ މެންބަރު ކުލަބުތަކުންވަނީ ހިތްހަމަ ނުޖެހުން ފާޅުކޮށް އިންތިހާބު އަވަސްކޮށްދިނުމަށް ގޮވާލާފަ އެވެ.
ވޮލީގެ ބައެއް ކުލަބުތަކުން ދާދި ފަހުން ވަނީ ނޫސްވެރިންގެ ބައްދަލުވުމެއްވެސް ބާއްވާފަ އެވެ. މި ބައްދަލުވުމުގައި އެކުލަބުތަކުން ވަނީ ވީއޭއެމްގެ އަސާސީ ގަވާއިދާ އެއްގޮތަށް ކަންކަން ކުރިއަށްގެންދިޔުމަށް ކުލަބުތައް ގުޅިގެން މަސައްކަތްކުރާނެކަމަށް ބުނެފަ އެވެ. އަދި އެކްސްޓްރާ އޯޑިނަރީ ކޮންގްރެސްއަކާ އެކު ވީއޭއެމްގެ ކަންކަން ހަރުދަނާ ކުރުމަށް ހަރުދަނާ ކުރުމަށް މަސައްކަތްކުރާނެކަން ފާހަގަކުރި އެވެ. މީގެ އިތުރުން އެސޯސިއޭޝަނުގެ ކަންކަން ގަވާއިދާ އެއްގޮތަށް ކުރުމަށް ކުލަބުތަކުން ގޮވާލި އެވެ.
އައު އަސާސީ ގަވާއިދާ އެއްގޮތަށް ވީއޭއެމުން އައު އިންތިޚާބެއް ބާއްވަން މަސައްކަތްކުރަމުން އަންނައިރު، އެ އެސޯސިއޭޝަނުގެ ރައީސްއަށް ހުރީ މުހައްމަދު ރަނޭޝް އިންތިޚާބުކޮށްފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގަ އެވެ.
