އިޒްރޭލުން ފަލަސްތީނުގައި ހިންގަމުންދާ ގަތުލުއާންމު ވަރުގަދަކޮށް ދެމުންދާ ހަމަލާތަކުގައި ގާޒާއިން މަރުވާ މީހުންގެ އަދަދު ނުބެލެހެއްޓޭ ހިސާބަށް ގޮސްފި ކަމަށް އދ. އިން ބުނެފި އެވެ.
އދ. އިން ބުނި ގޮތުގައި ގާޒާގައި މަރުވާ މީހުންގެ އަދަދުގެ އަދާހަމައެއް އެންމެ ފަހުން ލިބުނީ ހުކުރު ދުވަހު ކަމަށެވެ. މިވީ ތިން ދުވަހުގެ ތެރޭގައި މަރުވި އަދި ޒަހަމްވި މީހުންގެ އަދަދު، ގާޒާގެ ހެލްތު މިނިސްޓްރީން ހާމަކޮށްފައެއް ނުވެ އެވެ. އދ. ގެ އޮފިޝަލުންނަށް ވެސް އަންގާފައި ނުވެ އެވެ.
މިދިޔަ މަހުގެ ހަތެއްގައި ހަނގުރާމަ އިއުލާނުކޮށް މެދުކެނޑުމެއްނެތި ދެމުންދާ ހަމަލާތަކުގައި ހުކުރު ދުވަހާ ހަމައަށް ގާޒާއިން މަރުވި މީހުންގެ އަދަދު އުޅެނީ 11,078 ގަ އެވެ.
އެއީ އެ މުއްދަތުގައި ދުވާލަކަށް އެވްރެޖުކޮށް 320 މީހުންނެވެ. ހަމާސް ޖަމާއަތާ ދެކޮޅަށް ކަމަށް ބުނެ ދޭ މި ހަމަލާތަކުގައި މަރުވާ މީހުންގެ 98 އިންސައްތަ އަކީ އާންމުންނެވެ. އޭގެ ތެރެގައި ގިނަ އަދަދެއްގެ ކުޑަކުދިން ހިމެނެ އެވެ.
ހުކުރު ދުވަހު އދ. އިން ދިން އަދާހަމާގައި ބުނެފައިވާ ގޮތުން މަރުވި މީހުންގެ އިތުރުން، ގެއްލިފައިވާ މީހުންގެ އަދަދު 2،700 އަށް އަރަ އެވެ. އޭގެ ތެރޭގައިވެސް 1،500 އެއްހާ ކުޑަކުދިން ހިމެނެ އެވެ. ހަމަލާތަކުގައި ޒަހަމްވި މީހުންގެ އަދަދު އުޅެނީ 27،500 އިން މަތީގަ އެވެ.
ހުކުރު ދުވަހުގެ ފަހުންވެސް އިޒްރޭލުން ވަނީ ވައިގެ މަގުން އަދި އުތުރު ގާޒާއަށް އެއްގަމު މަގުން ވަދެ ހަމަލާތައް ދެމުންނެވެ. އެގޮތުން އެންމެ ވަރުގަދަ ހަމަލާތަކެއް ދީފައިވަނީ ގާޒާގައި ހުންނަ އަލް ޝިފާ ހޮސްޕިޓަލަށެވެ.
އިޒްރޭލުން ބުނާ ގޮތުން ޝިފާ ހޮސްޕިޓަލުގެ ބިމު އަޑީގައި ހަމާސްއިން ދަނީ އެމީހުންގެ މައި މަރުކަޒު ހިންގަމުންނެވެ.
އެ ބުނުމަށް އެއްވެސް ހެއްކެއް އިޒްރޭލަށް ދެއްކިފައި ނުވާއިރު، ހަމާސްއިން ދަނީ އެކަން ދޮގުކުރަމުންނެވެ. އަދި މިއީ އާންމުންނަށް އަމާޒުކޮށް ހިންގާ ހަނގުރާމައިގެ ޖަރީމާއެއްގެ ނިވާފަތްގަނޑެއްގެ ގޮތުން ދައްކާ ވާހަކައެއް ކަމަށްވެސް ހަމާސްއިން ބުނެ އެވެ.
ނަމަވެސް، އިޒްރޭލުން ދަނީ ކެނޑިނޭޅި ވައިގެ މަގުން އެ ހޮސްޕިޓަލާއި ވަށައިގެންވާ ސަރަހައްދަށް ހަމަލާދެމުންނެވެ. އަދި، އެއްގަމު މަގުން އުތުރު ގާޒާއަށް ވަދެގަނެފައިވާ އިޒްރޭލުގެ ސިފައިންނާއި ޓޭންކުތަކުންވެސް އެ ހޮސްޕިޓަލަށް މިހާރު ހަމަލާ ދެމުންދާ ކަމަށް އެ ހޮސްޕިޓަލުގެ ޑިރެކްޓަރު ގަތަރުގެ އަލް ޖަޒީރާއަށް ދެއްވި އިންޓަވިއުއެއްގައި ވިދާޅުވެފައި ވެ އެވެ.
