ފަލަސްތީނުގެ ނޫސްވެރިޔެއް ކަމަށްވާ މުހައްމަދު އަބޫ ހާސިރާ ހިމެނޭހެން އޭނާގެ އާއިލާގެ 42 މެމްބަރުން, އިޒްރޭލުން ބޮން އަޅައި ޝަހީދުކޮށްލައިފި އެވެ.
ވަފާ ނިއުސް އޭޖެންސީން ރިޕޯޓުކޮށްފައިވާ ގޮތުގައި އިޒްރޭލުގެ ޖެޓުތަކުން އޭނާގެ ގެއަށް ބޮން އެޅީ އާދީއްތަ ދުވަހުގެ ރޭގެ ވަގުތެއްގަ އެވެ. މިއީ ސީދާ އޭނާ ޝަހީދުކޮށްލަން އަމާޒުކޮށް ދިން ހަމަލާއެކެވެ.
އޮކްޓޯބަރު 7 އިން ފެށިގެން އިޒްރޭލުން މެދުކެނޑުމެއްނެތި ބޮން އަޅައި މިހާތަނަށް 37 ނޫސްވެރިޔަކު ވަނީ ޝަހީދުކޮށްލައިފަ އެވެ. އޭގެ ތެރޭގައި ފަލަސްތީނަށް ނިސްބަތްވާ 32 ނޫސްވެރިންނާއި އިޒްރޭލުގެ ހަތަރު ނޫސްވެރިންނާއި ލުބުނާންގެ ނޫސްވެރިޔެއް ހިމެނެ އެވެ.
އޮކްޓޯބަރު 25 ވަނަ ދުވަހު އިޒްރޭލުން ދިން ހަމަލާއެއްގައި އަލްޖަޒީރާގެ ނޫސްވެރިޔަކާއި އޭނާގެ އާއިލާ ޝަހީދުކޮށްލި އެވެ. އޭގެ ތެރޭގައި އޭނާގެ އަންހެނުންނާއި ފިރިހެން ދަރިފުޅާއި އަންހެން ދަރިފުޅާއި ކާފަދަރިފުޅު އަދި އާއިލާގެ އިތުރު ބައެއް މެމްބަރުން ހިމެނެ އެވެ.
އިޒްރޭލުގެ ހަމަލާތަކުގައި ފަލަސްތީނުގެ 10,000 އަށްވުރެ ގިނަ ރައްޔިތުން ޝަހީދުކޮށްލާފައިވާއިރު 1.5 މިލިއަން މީހުން ވަނީ ގެދޮރު ދޫކޮށް ދާން މަޖުބޫރުވެފަ އެވެ.
