އިޒްރޭލުން ހިންގަމުންދާ ގަތުލުއާންމާ ގުޅިގެން އިޒްރޭލުގައި ތިބި ދެކުނު އެފްރިކާގެ ޑިޕްލޮމެޓުން އަނބުރާ ގެނައުމަށް އެ ގައުމުން ނިންމައިފި އެވެ.
މިއީ ގާޒާއަށް ބޮން އަޅައި ދެމުންދާ ހަމަލާތަކާ ދެކޮޅު ހެދުމުގެ ގޮތުން ދެކުނު އެފްރިކާއިން އެޅި ފިޔަވަޅެކެވެ. އެގޮތުން, ފަލަސްތީނުގެ އެތައް ރައްޔިތުންނަށް ޝަހީދުކޮށް ދެމުންދާ ހަމަލާތަކަކީ ބަޔަކަށް އަދަބު ދިނުމުގެ ގޮތުން ހިންގާ ގަތުލުއާންމެއްގެ ގޮތުގައި ދެކުނު އެފްރިކާއިން ވެސް ސިފަކުރި އެވެ.
ހުރިހާ ހަމަލާއެއް ހުއްޓާލުމަށް ގޮވާލާފައިވާއިރު މިއީ ދެކުނު އެފްރިކާ ގާޒާގެ ރައްޔިތުންނާ އެކުގައި ތިބިކަން ހާމަކުރުމުގެ ގޮތުން އެޅި ފިޔަވަޅެކެވެ.
ދުނިޔޭގެ އެހެން ބައެއް ގައުމުތަކުން ވެސް ވަނީ އިޒްރޭލުގައި ތިބި އެ ގައުމުތަކުގެ ޑިޕްލޮމެޓުން އަނބުރާ ގައުމަށް ގެނެސްފަ އެވެ. އޭގެ ތެރޭގައި ނޭޓޯގެ މެމްބަރު ގައުމެއް ކަމަށްވާ ތުރުކީ އާއި ބަހުރެއިން, ބޮލީވިއާ އަދި ޖޯޑަން ހިމެނެ އެވެ.
އޮކްޓޯބަރު 7 އިން ފެށިގެން އިޒްރޭލުން ދެމުންދާ ހަމަލާތަކުގައި މިހާތަނަށް ގާޒާއިން 10,000 އަށްވުރެ ގިނަ މީހުން ޝަހީދުކޮށްލާފައިވެ އެވެ.
