އުރުދުން އިން އަސްކަރީ މަތިންދާބޯޓުތަކެއް ބޭނުންކޮށްގެން، އިޒްރޭލުން ބަންދުކޮށްފައިވާ ފަލަސްތީނުގެ ގާޒާއަށް ސިއްހީ އެހީގެ 'ކްރޭޓުތަކެއް' ނުވަތަ ފޮށިތަކެއް ވައްޓާލައިފި އެވެ.
އުރުދުންގެ ރަސްގެފާނު އަބްދުﷲ ރޭ ކުރެއްވި ޓުވީޓެއްގައި ވިދާޅުވީ ގާޒާގައި ހުންނަ އެ ގައުމުން ހިންގާ ފީލްޑު ހޮސްޕިޓަލަށް ބޭނުންވާ އެހީ ފޯރުކޮށްދީފައިވަނީ ރޭ ދަންވަރުގެ ވަގުތެއްގައި ކަމަށެވެ. އަދި އެ އެހީގެ ފޮށިތައް އަސްކަރީ މަތިންދާ ބޯޓަށް ބަރުކުރާ ފޮޓޯތަކެއްވެސް ރަސްގެފާނު ވަނީ ހިއްސާކުރައްވާފަ އެވެ.
މި އޮޕަރޭޝަނާ ގުޅޭގޮތުން އަސްކަރިއްޔާއިން ނެރުނު ބަޔާނެއްގައި ބުނީ އެ ފޮށިތައް ގާޒާއަށް ފޯރުކޮށްދިނީ ޕެރަޝޫޓުގެ އެހީގައި ކަމަށާއި މި އޮޕަރޭޝަން ކުރިއަށް ގެންދަން ޖެހުނު މައިގަނޑު އެއް ސަބަބަކީ މިސްރުގެ ރަފާހު ބޯޑަރު ހުރަސްކޮށް އެހީ ފޯރުކޮށްދިނުމަށް ދަތިވުން ކަމަށެވެ.
މީގެ މަހެއް ކުރިން ފަލަސްތީނުގެ ހަމާސް ޖަމާއަތުން ދިން ހަމަލާއަށްފަހު، ވޭތުވެދިޔަ 75 އަހަރު އިޒްރޭލުން ފަލަސްތީނުގައި ހިންގަމުންދާ ގަތުލުއާއްމު ވަރުގަދަކޮށް ހަނގުރާމަ އިއުލާނުކުރުމަށްފަހު ގާޒާ ވަނީ އެއްކޮށް ބަންދުކޮށްފަ އެވެ. ކަރަންޓާއި ފެން ކަނޑާލާ އެހީ ފޯރުކޮށްދޭ މަގުތައްވެސް ވަނީ ބަންދުކޮށްފަ އެވެ.
ހަމަލާތަކާ ގުޅިގެން އަނިޔާވާ މީހުންނަށް ފަރުވާ ދެމުންދާ ހޮސްޕިޓަލުތަކުންވެސް ކަރަންޓާއި ސަޕްލައި ހުސްވެ ހިދުމަތް ދިނުމަށް ދަނީ ދަތިވަމުންނެވެ. އެގޮތުން ގިނަ ހޮސްޕިޓަލުތަކަކަށް ކަރަންޓު ފޯރުކޮށްދޭ ޖަނަރޭޓަރުތަކުން ތެޔޮ ހުސްވެ މިހާރު ވަނީ ހިދުމަތް ހުއްޓާލާފަ އެވެ.
ވޭތުވެދިޔަ މަސްދުވަސް ތެރޭގައި ރަފާހު ބޯޑަރު ހުރަސްކޮށް ގާޒާއަށް ވަދެވައިފާ 200 އަށްވުރެ މަދު އެހީގެ އުޅަނދެވެ. އޭގެ ކުރިން ދުވާލެއްގެ މައްޗަށް ގާޒާއަށް 100 އެއްހާ އުޅަނދު މުދާ ހިފައިގެން ވަދެ އެވެ.
އިޒްރޭލުން ފެން ކަނޑާލުމަށްފަހު ދަނީ ގާޒާގައި ހުރި ފެން ވަޅުތަކާއި، މަސްވެރިންގެ މަސް ބޯޓުތަކަށްވެސް ހަމަލާދެމުންނެވެ.
ހަމާސްގެ ހަމަލާތަކުގައި އިޒްރޭލުގެ 1400 އަށްވުރެ ގިނަ މީހުން މަރާލި އިރު، އިޒްރޭލުން ވަނީ މިދިޔަ މަސްދުވަހުގެ ތެރޭ 9،700 އަށްވުރެ ގިނަ މީހުން ޝަހީދުކޮށްލާފަ އެވެ. އޭގެ ތެރޭގައި ގާޒާ އަދި ވެރިވެގަނެފައިވާ ހުޅަނގު އައްސޭރިން ޝަހީދުވި މީހުން ހިމެނެ އެވެ.
