ގާޒާގައި ހުންނަ ޖަބަލިއާ ރެފިއުޖީ ކޭމްޕަށް މީގެ ދެ ދުވަސް ކުރިން ދިން ހަމަލާތަކަށްފަހު އެ ސަރަހައްދުގެ މައި ފެންވަޅަށް އިޒްރޭލުން ހަމަލާ ދީފި އެވެ.
މިދިޔަ މަހުގެ ހަތްވަނަ ދުވަހު ފަލަސްތީނުގެ ހަމާސް ގްރޫޕުން ދިން ހަމަލާއަށްފަހު އިޒްރޭލުން ހަނގުރާމަ އިއުލާނުކޮށް ވޭތުދެވިޔަ 75 އަހަރު ހިންގަމުން އަންނަ ގަތުލުއާންމު ވަރުގަދަކޮށް ދެމުންދާ ހަމަލާތަކުގައި ވަނީ ރެފިއުޖީ ކޭމްޕުތަކުގެ އިތުރުން، ސްކޫލުތަކާއި ހޮސްޕިޓަލުތައް އަދި މިސްކިތްތަކާއި ފައްޅިތަކަށް ވެސް ވަނީ ހަމަލާ ދީފަ އެވެ.
މިއީ ވޭތުދިޔަ ހަތަރު ދުވަސްތެރޭ އިޒްރޭލުން ޖަބަލިއާ ކޭމްޕަށް ދިން ތިންވަނަ ހަމަލާ އެވެ. ފުރަތަމަ ދެ ހަމަލާގައި ޝަހީދުވި މީހުންގެ އަދަދު 80 އިން މައްޗަށް އަރާ ކަމަށް ރިޕޯޓުތައް ބުނެ އެވެ.
ރޭގެ ހަމަލާ އަމާޒުވެފައިވާ ފެން ވަޅަކީ ޖަބަލިއާ ސަރަހައްދުގެ ގިނަ ގެ ތަކަށް ފެން ފޯރުކޮށްފޭ ވަޅެވެ. މިދިޔަ މަހު 10 ގައި އިޒްރޭލުން ގާޒާއިން ފެން ކަނޑާލިފަހުން އެ ސަރަހައްދުގައި ދިރިއުޅޭ އެތައް ހާސް ބަޔަކު ފެން ހޯދަމުންދިޔައީ މި ވަޅުންނެވެ.
ހަމަލާތައް ދޭން ފެށިތާ މަހެއް ވާން ކައިރިވާއިރު އިޒްރޭލުން ގާޒާ އަދި ހުޅަނގު އައްސޭރީގައި ޝަހީދު ކޮށްލި މީހުންގެ އަދަދު 9500 އަށްވުރެ މައްޗަށް ވަނީ އަރާފަ އެވެ. ހަމާސްގެ ހަމަލާތަކުގައި އިޒްރޭލުގެ 1400 އަށްވުރެ ގިނަ މީހުން ވަނީ މަރާލާފަ އެވެ.
އިޒްރޭލުން އުތުރު ގާޒާއަށް އެއްގަމު މަގުން ވަނުމަށް މަސައްކަތް ކުރަމުންދާއިރު، އިޒްރޭލުގެ ވައިގެ ހަމަލާތައް ވަނީ ހޮސްޕިޓަލުތަކަށާއި ސްކޫލުތައް އަދި މިސްކިތްތަކާއި ރެފިއުޖީ ކޭމްޕުތަކުގެ އިތުރުން ފައްޅިތަކަށް ވެސް އަމާޒުވެފަ އެވެ.
ހަމަލާތައް ހުއްޓާލާ ގާޒާއަށް އިންސާނީ އެހީ ފޯރުކޮށްދިނުމަށް ބައިނަލްއަގުވާމީ މުޖުތަމައާއި ގައުމުތަކުން ގޮވާލި ނަމަވެސް، އދ. ގެ ސަލާމަތީ ކައުންސިލަށް މިހާތަނަށް އެ މަގުސަދުގައި ހުށަހެޅި ހުރިހާ ހުށަހެޅުމެއް ވަނީ އެމެރިކާއިން ވީޓޯ ކޮށްފަ އެވެ. ހަމަލާތައް މެދުކަނޑާލުމަށް ގޮވާލާ އދ. ގެ އާއްމު މަޖިލީހުން ފާސްކުރި ގަރާރަށް ބޯ ނުލަބާނެ ކަމަށް އިޒްރޭލުން ވަނީ ބުނެފަ އެވެ.
