މިއަހަރުގެ މިހާތަނަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދު ދޮޅު މިލިއަނުން މައްޗަށް ހިނގައްޖެ އެވެ.
ޓޫރިޒަމް މިނިސްޓަރީން އާއްމު ކޮށްފައިވަ ތަފާސް ހިސާބުތަކަށް ބަލާއިރު، ފާއިތުވި އޮކްޓޫބަރު މަހުގެ ނިޔަލަށް ރާއްޖެއަށް 1،525،332 ފަތުރުވެރިން ޒިޔާރަތް ކޮށްފައިވެ އެވެ. އެއީ ކުރީ އަހަރުގެ މި މުއްދަތާ އަޅާ ބަލާއިރު 13 އިންސައްތައިގެ ކުރި އެރުމެކެވެ.
ސަރުކާރުން ވަނީ މި އަހަރު ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު 1.8 މިލިއަނުން މައްޗަށް ދާނެ ކަމަށް ލަފާކޮށް އެކަމަށް އަމާޒު ހިފައިފަ އެވެ. މި އަހަރު މިހާތަނަށް ފަތުރުވެރިން ރާއްޖެއަށް ޒިޔާރަތް ކުރި އަދަދަށް ބަލާއިރު އެ އަމާޒަށް ވާސިލުވުމަށް ބޭނުންވަނީ މި އަހަރުގެ ކުރިއަށް މިއޮތް ނުވަ ހަފުތާގައި އިތުރު ތިންލައްކަ ފަތުރުވެރިންނެވެ.
ޓޫރިޒަމް މިނިސްޓަރީގެ ތަފާސްހިސާބުތައް ދައްކާ ގޮތުން ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރާ ގައުމުތަކުގެ ލިސްޓުގައި އަދިވެސް ރަސްކަން ކުރަމުން އަންނަނީ މިދިޔަ އަހަރު އެ ލިސްޓުގެ ދެ ވަނައިގައި އޮތް ރަޝިޔާއިންނެވެ. އެގައުމުން އެކަނި ވެސް މިދިޔަ މަހުގެ ނިޔަލަށް ރާއްޖެއަށް 175،714 ފަތުރުވެރިން ޒިޔާރަތްކޮށްފައިވެ އެވެ. އެ ލިސްޓުގެ ދެ ވަނައިގައި އިންޑިއާ އޮތްއިރު ތިން ވަނައިގައި އޮތީ ކޮވިޑުގެ ކުރިން ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރި ޗައިނާ އެވެ.
ރާއްޖެއަށް ޒިިޔާރަތް ކުރާ ފަތުރުވެރިންގެ އަދަދު 2013 ވަނަ އަހަރު، އެއް މިލިއަނުން މައްޗަށް އަލަށް އެރުމާ ހަމައިން ކޮންމެ އަހަރަކު ވެސް ކުރިއެރުންތަކެއް ހޯދަމުން އައިސް އެއްކޮށް ވަޅުޖެހުނީ 2019 ގައި ކުރިމަތިވި ކޮވިޑުގެ ވަބާއާ ގުޅިގެންނެވެ. ކޮވިޑާ ގުޅިގެން ދުނިޔޭގެ އެކި ގައުމުތަކުން ގެންގުޅުނު ހަރުކަށި ސިޔާސަތުތަކަށް ލުއިދޭން ފެށުމާ އެކު ރާއްޖޭގެ ފަތުރުވެރިކަމަށް ކިރިޔާ ހަމަ ނޭވައެއް ލެވުނީ މިދިޔަ އަހަރު އެވެ. މިދިޔަ އަހަރު ރާއްޖެއަށް ޖުމުލަ 1.6 މިލިއަން ފަތުރުވެރިން ޒިޔާރަތް ކުރި އެވެ.
