ރެއާލް މެޑްރިޑާ އެކު ހަދާފައިވާ އެއްބަސްވުން ބްރެޒިލް އެޓޭކަރު ވިނީޝިއުސް ޖޫނިއާ އާކޮށްފި އެވެ.
ބްރެޒިލްގެ ފްލަމިންގޯ އިން 2018 ވަނަ އަހަރު ސްޕެއިންގެ ރެއާލް މެޑްރިޑަށް ވިނީޝިއަސް ބަދަލުވީ އުމުރުން 18 އަަހަރުގަ އެވެ. މިދިޔަ ދެ ތިން އަހަރަށް ބަލާއިރު އެކުލަބުގެ އެންމެ މުހިންމު ކުޅުންތެރިންގެ ލިސްޓުން އޭނާ ވަނީ ޖާގަ ހޯދާފަ އެވެ.
ކޯޗު ކާލޯ އޮންޗެލޮޓީގެ ފޭވަރިޓް ކުޅުންތެރިންގެ ތެރޭގައި ހިމެނޭ ވިނީޝިއަސް ރެއާލްއާއެކު ސޮއިކުރި އާ ކޮންޓްރެކްޓާ އެކު 2027ގެ ނިޔަލަށް އެކްލަބުގައި މަޑުކުރާނެ އެވެ.
ކުރީގެ ކޮންޓްރެކްޓްގައި ވިނީޝިއަސް އަށް ހަފްތާއަކު 186،000 ޕައުންޑުގެ މުސާރައެއް ލިބެ އެވެ. އާ ކޮންޓްރެކްޓާއެކު އޭނާ އަށް 360،000 ޕައުންޑްގެ މުސާރައެއް ލިބޭނެ އެވެ. މިއާ އެކު އެކުލަބުގެ އެންމެ މުސާރަ ބޮޑު ކުޅުންތެރިންގެ ތެރޭގައި އޭނާ ހިމެނޭނެ އެވެ.
ވިނީޝިއަސް ވަނީ މިހާތަނަށް ރެއާލް މެޑްރިޑަށް ކުޅުނު 235 މެޗުން 63 ގޯލް ވަނީ ޖަހާފަ އެވެ. 2018 އިން ފެށިގެން މިއަދާ ހަމައަށް އޭނާ ވަނީ ރެއާލް އާއެކު ސްޕެނިޝް ލަލީގާ، ސްޕެނިޝް ކަޕް، ކޮޕް ޑެލްރޭ، އަދި ޔޫރަޕިއަން ސުޕަ ކަޕާއި، ކްލަބު ވޯލްޑްކަޕް ވެސް ހޯދާފަ އެވެ. އަދި ޔޫރަޕްގެ އެންމެ ބޮޑު ކްލަބު ފުޓްބޯޅަ މުބާރަތްކަމަށްވާ ޔުއެފާ ޗެމްޕިއަންސް ލީގުވެސް އޭނާ އެ ކްލަބާ އެކު ހޯދި އެވެ.
ވިނީޝިއަސްގެ ކޮންޓްރެކްޓް ރެއާލް އިން އާކުރިއިރު، އޭނާ އަށް ދާދި ފަހުން ވަނީ ދަނޑުން ބޭރުގައި އިންސާނިއްޔަތަށް ކުރާ މަސައްކަތް ފާހަގަކޮށް ސޮކްރޭޓްސް އެވޯޑް ދީފަ އެވެ. ބެލޮންޑިއޯ ހަފްލާގައި އޭނާ އަށް މި އެވޯޑު ލިބުނުއިރު، ބެލޯންޑިއޯ އެވޯޑުގައި އޭނާ ދިޔައީ ހަ ވަނައަށެވެ.
